El Nino Warning: భీకరంగా ఎల్‌ నినో.. నైరుతి రుతుపవనాలపై తీవ్ర ప్రభావం

Severe El Nino Warning: ఉష్ణమండల పసిఫిక్ మహాసముద్రంలో 'ఎల్ నినో' (El Nino) తీవ్రత ఊహించని రీతిలో గణనీయంగా పెరుగుతోంది. ఈ ఏడాది చివరి నాటికి ఇది అత్యంత భీకర స్థాయికి చేరుకుని, 2027 ఫిబ్రవరి వరకు కొనసాగే అవకాశముందని ప్రపంచ వాతావరణ సంస్థ (WMO) సంచలన నివేదిక విడుదల చేసింది. సముద్ర ఉపరితల ఉష్ణోగ్రతలు అసాధారణంగా పెరగడమే ఇందుకు కారణమని, ఆధునిక వాతావరణ పరిశోధనల చరిత్రలోనే ఇది అత్యంత శక్తివంతమైన ఎల్ నినోగా మారే ప్రమాదముందని నిపుణులు హెచ్చరించారు.

ఈ ఎల్ నినో తీవ్రత వల్ల భారత్‌లో నైరుతి రుతుపవనాలపై తీవ్ర ప్రభావం పడి పొడి వాతావరణ పరిస్థితులు తలెత్తే అవకాశాలున్నాయి. భారత వాతావరణ శాఖ (IMD) ముందస్తు అంచనాలకు అనుగుణంగానే ఈ ఏడాది వర్షపాతంలో భారీ లోటు నమోదైంది. మే నెలలో సవరించిన అంచనాల ప్రకారం.. ఈ సీజన్ వర్షపాతం దీర్ఘకాలిక సగటు (LPA)లో కేవలం 90 శాతానికే పరిమితమయ్యే అవకాశాలుండగా, దేశవ్యాప్తంగా ఆగస్టు నెల ముగిసేసరికి ఏకంగా 16 శాతం వర్షపాత లోటు నమోదైంది.

సెప్టెంబర్ నుండి నవంబర్ మధ్య కాలంలో భూభాగాలపై సాధారణం కంటే అధిక ఉష్ణోగ్రతలు నమోదు కావచ్చని డబ్ల్యూఎంవో హెచ్చరించింది. ఎల్ నినో ప్రభావం వల్ల ప్రపంచవ్యాప్తంగా విపరీతమైన వేడి, తీవ్ర కరువు మరియు కొన్ని ప్రాంతాల్లో అకస్మాత్తు వరదలు సంభవించే అవకాశముంది. 2027 ప్రారంభం వరకు ఈ ప్రభావం కొనసాగనున్న నేపథ్యంలో, ఎదురయ్యే వాతావరణ సవాళ్లను తట్టుకునేందుకు అన్ని దేశాల ప్రభుత్వాలు తగిన ముందస్తు జాగ్రత్తలు తీసుకోవాలని అధికారులు సూచించారు.