Prashant Kishor: బీజేపీ కోటలో పీకే జెండా.. బంకీపూర్ బైపోల్‌లో ప్రశాంత్ కిశోర్ సంచలన విజయం!

Prashant Kishor: దేశ రాజకీయాల్లో ప్రముఖ ఎన్నికల వ్యూహకర్తగా పేరుగాంచిన జన్ సురాజ్ పార్టీ వ్యవస్థాపకుడు ప్రశాంత్ కిశోర్ (పీకే) ప్రత్యక్ష ఎన్నికల తొలి పోరులోనే సంచలన విజయం నమోదు చేశారు. బిహార్‌లోని అత్యంత ప్రాధాన్యత కలిగిన బంకీపూర్ అసెంబ్లీ నియోజకవర్గ ఉపఎన్నికలో ఆయన ఘనవిజయం సాధించారు. బీజేపీ అభ్యర్థి, తన సమీప ప్రత్యర్థి అయిన నీరజ్ కుమార్ సిన్హాపై 20 వేల ఓట్లకు పైగా భారీ మెజార్టీతో విజయాన్ని అందుకొని తొలిసారి చట్టసభలో అడుగుపెడుతున్నారు.

బంకీపూర్ నియోజకవర్గం నుంచి వరుసగా ఐదుసార్లు ఎమ్మెల్యేగా గెలిచిన నితీన్ నబిన్ 2026 ఏప్రిల్‌లో రాజ్యసభకు ఎన్నికవ్వడంతో ఈ స్థానానికి ఉపఎన్నిక అనివార్యమైంది. బీజేపీ తరఫున నీరజ్ కుమార్ సిన్హా, ఆర్‌జేడీ తరఫున రేఖా కుమారి గుప్తా బరిలోకి దిగారు. జులై 30న పోలింగ్ జరగ్గా, ఆగస్టు 3న ఫలితాలు వెల్లడయ్యాయి.

1995 నుంచి (అప్పట్లో పాట్నా వెస్ట్) బీజేపీకి తిరుగులేని కంచుకోటగా ఉన్న ఈ స్థానంలో మరోసారి గెలుపు ఖాయమని భావించిన కమలం నేతలకు పీకే రూపంలో ఊహించని భంగపాటు ఎదురైంది. మొత్తం 31 రౌండ్ల లెక్కింపులో తొలి రౌండ్ నుంచే పీకే స్పష్టమైన ఆధిక్యాన్ని ప్రదర్శిస్తూ, రౌండ్ రౌండ్‌కూ మెజార్టీని పెంచుకుంటూ విజయాన్ని కైవసం చేసుకున్నారు.

ఐక్యరాజ్యసమితిలో ప్రజారోగ్య నిపుణుడిగా పనిచేసిన ప్రశాంత్ కిశోర్, ఆ తర్వాత పొలిటికల్ కన్సల్టింగ్ సంస్థ 'ఐ-ప్యాక్' (I-PAC) స్థాపించి రాజకీయ వ్యూహకర్తగా మారారు. 2014 మోదీ ప్రచారం, 2015 బిహార్ మహాఘట్‌బంధన్, 2019 ఏపీ వైఎస్సార్‌సీపీ, 2021 బెంగాల్ టీఎంసీ విజయాల్లో ఆయన కీలక పాత్ర పోషించారు.

2021లో వ్యూహకర్త బాధ్యతల నుంచి తప్పుకుని బిహార్‌ వ్యాప్తంగా పాదయాత్ర చేపట్టిన పీకే, 2024 అక్టోబర్ 2న 'జన్ సురాజ్ పార్టీ'ని స్థాపించారు. గత అసెంబ్లీ ఎన్నికల్లో పోటీకి దూరంగా ఉండి ప్రచారానికే పరిమితమైన ప్రశాంత్ కిశోర్, ఈ బంకీపూర్ బైపోల్ ద్వారా నేరుగా ఎన్నికల బరిలోకి దిగి తొలి ప్రయత్నంలోనే ప్రభంజనం సృష్టించారు.