Modi- Meloni: మోదీ-మెలోని కెమిస్ట్రీకి కొత్త ట్విస్ట్.. రోమ్లో వైరల్ సీన్..!
Modi- Meloni: అంతర్జాతీయ రాజకీయ వేదికలపై దేశాల మధ్య దౌత్య సంబంధాలు కేవలం ఒప్పందాలు, అధికారిక ప్రకటనలకే పరిమితం కావు. కొన్నిసార్లు నాయకుల
modi meloni melody
Modi- Meloni: అంతర్జాతీయ రాజకీయ వేదికలపై దేశాల మధ్య దౌత్య సంబంధాలు కేవలం ఒప్పందాలు, అధికారిక ప్రకటనలకే పరిమితం కావు. కొన్నిసార్లు నాయకుల మధ్య ఉండే వ్యక్తిగత సాన్నిహిత్యం, స్నేహపూర్వక సంభాషణలు కూడా ప్రపంచవ్యాప్తంగా అందరి దృష్టిని ఆకర్షిస్తాయి. తాజాగా ప్రధానమంత్రి నరేంద్ర మోదీ ఐదు దేశాల పర్యటనలో భాగంగా ఇటలీ రాజధాని రోమ్ చేరుకున్న సందర్భంలో ఇటువంటి ఒక అద్భుతమైన, సరదా సన్నివేశం చోటుచేసుకుంది. ఇటలీ ప్రధానమంత్రి జార్జియా మెలోనితో భేటీ అయిన ప్రధాని మోదీ, ఆమెకు భారతదేశం నుండి ఒక ప్రత్యేకమైన కానుకను తీసుకెళ్లారు. అది మరేదో కాదు.. మనదేశంలో ఎంతో పాపులర్ అయిన 'పార్లే మెలోడీ' (Parle's Melody) చాక్లెట్ ప్యాకెట్. సోషల్ మీడియాలో తమ ఇద్దరిపై వస్తున్న ‘Melodi’ (మెలోని + మోదీ) మీమ్స్, ట్రెండ్స్ను దృష్టిలో ఉంచుకుని మోదీ చేసిన ఈ మధురమైన ఆలోచన ఇప్పుడు నెట్టింట విపరీతంగా వైరల్ అవుతోంది.
థాంక్యూ ఫర్ ద గిఫ్ట్.. వైరల్ వీడియో
ప్రధాని మోదీ ఇచ్చిన ఈ స్వీట్ సర్ప్రైజ్కు సంబంధించిన వీడియోను ఇటలీ ప్రధాని జార్జియా మెలోని తన అధికారిక సోషల్ మీడియా ఖాతాలలో పంచుకుంటూ "గిఫ్ట్ ఇచ్చినందుకు ధన్యవాదాలు" అని రాసుకొచ్చారు. ఆ వీడియోలో మోదీ, మెలోని ఇద్దరూ కలిసి ‘వెరీ వెరీ చాక్లెటీ’ ట్యాగ్లైన్తో వచ్చే ఆ ఇండియన్ క్యాండీ ప్యాకెట్ను పట్టుకుని నవ్వుతూ కనిపించారు. వీడియో క్లిప్లో మెలోని మాట్లాడుతూ, "ప్రధాని మోదీ నాకోసం ఎంతో రుచికరమైన టాఫీని బహుమతిగా తెచ్చారు" అనగా, పక్కనే ఉన్న మోదీ నవ్వుతూ "మెలోడీ" అని అనడం ఇరు దేశాల అభిమానులను ఎంతగానో ఆకట్టుకుంది. గతంలో జరిగిన జీ7 సదస్సులో కూడా మెలోని తన సెల్ఫీ వీడియోకు "హలో ఫ్రమ్ ద మెలోడీ టీమ్" అని క్యాప్షన్ ఇచ్చారు. అయితే.. అప్పటి నుండి గ్లోబల్ ఈవెంట్లలో వీరిద్దరి మధ్య కనిపించే ఈ కెమిస్ట్రీ ఇరు దేశాల దౌత్య సంబంధాలకు ఒక కొత్త రూపాన్ని తెచ్చింది.
కేవలం ఫోటోలకే పరిమితం కాదు..
ప్రపంచానికి ఇది కేవలం ఒక ఇంటర్నెట్ ట్రెండ్లా, ఫోటోలకు ఇచ్చిన పోజ్లా కనిపించినప్పటికీ, దీని వెనుక అత్యంత పటిష్టమైన విదేశాంగ విధానం దాగి ఉంది. ప్రస్తుతం ఐరోపా ఖండంలో, ముఖ్యంగా ఇటలీ.. భారతదేశానికి అత్యంత కీలకమైన అంతర్జాతీయ భాగస్వామిగా అవతరించింది. చైనా నేతృత్వంలోని మౌలిక సదుపాయాల నెట్వర్క్లపై ఆధారపడటాన్ని తగ్గించడానికి , ప్రపంచ వాణిజ్య మార్గాలను మరింత విస్తరించడానికి ఇరు దేశాలు తీవ్రంగా శ్రమిస్తున్నాయి. అయితే.. ఇందులో భాగంగా ఇండియా-మిడిల్ ఈస్ట్-యూరప్ ఎకనామిక్ కారిడార్ (IMEC) ప్రాజెక్టును వేగవంతం చేస్తున్నారు. ఈ కారిడార్ ద్వారా ఇండో-పసిఫిక్ ప్రాంతానికి ఐరోపా ప్రవేశ ద్వారంగా రోమ్ నగరాన్ని నిలబెట్టాలని రెండు దేశాలు లక్ష్యంగా పెట్టుకున్నాయి.
వ్యూహాత్మక భాగస్వామ్యం దిశగా ఆర్థిక బంధం
భారత్, ఇటలీ దేశాల మధ్య ద్వైపాక్షిక వాణిజ్యం ఇప్పటికే 16.77 బిలియన్ డాలర్లను దాటి సరికొత్త రికార్డులను సృష్టిస్తోంది. రెండు దేశాల ఆర్థిక చైతన్యం, సామాజిక సృజనాత్మకత , వేల సంవత్సరాల నాటి నాగరికతలను మిళితం చేస్తూ ఈ బంధం ఉన్నత శిఖరాలకు చేరుకుంటోంది. ఈ నేపథ్యంలో ఇరు నేతలు ఒక సంయుక్త వ్యాసంలో స్పందిస్తూ, భారత్-ఇటలీ సంబంధాలు ఇప్పుడు ఒక నిర్ణయాత్మక దశకు చేరుకున్నాయని పేర్కొన్నారు. ఇటీవలి కాలంలో తమ సంబంధాలు కేవలం ఒక స్నేహ బంధం లాగా కాకుండా.. స్వేచ్ఛ, ప్రజాస్వామ్య విలువలు , ఉమ్మడి భవిష్యత్తును ప్రతిబింబించే ఒక ప్రత్యేక వ్యూహాత్మక భాగస్వామ్యంగా (Strategic Partnership) రూపాంతరం చెందాయని స్పష్టం చేశారు. 2029 నాటికి ఇరు దేశాల మధ్య వాణిజ్యాన్ని 20 బిలియన్ యూరోల లక్ష్యానికి చేర్చడమే కాకుండా, అంతకంటే ఎక్కువ సాధించాలని ఇరు దేశాలు ప్రణాళికలు సిద్ధం చేసుకున్నాయి. అయితే.. ముఖ్యంగా రక్షణ, ఏరోస్పేస్, క్లీన్ టెక్నాలజీస్, మెషినరీ, ఆటోమొబైల్ విడిభాగాలు, కెమికల్స్, ఫార్మాస్యూటికల్స్, టెక్స్టైల్స్ , పర్యాటక రంగాలపై ప్రత్యేక దృష్టి సారిస్తూ 'జాయింట్ స్ట్రాటజిక్ యాక్షన్ ప్లాన్ 2025-2029' ను వేగంగా ముందుకు తీసుకెళ్తున్నారు.
G Krishna
అక్షరంతో మొదలైన ప్రయాణం.. అంకెల్లో చెప్పాలంటే పదేళ్ల అనుభవం..! 2015లో కెరీర్ స్టార్ట్ చేసి, ప్రింట్ మీడియా నుంచి డిజిటల్ విప్లవం వరకు అన్నిటినీ దగ్గరగా చూశాను. అంతర్జాతీయ పరిణామాల నుంచి దేశ రాజధాని రాజకీయాల వరకు, గల్లీ స్థాయి వార్తల నుంచి ఢిల్లీ స్థాయి విశ్లేషణల వరకు ప్రతి అంశాన్ని లోతుగా అధ్యయనం చేస్తూ కథనాలు అందించాను. టెక్నాలజీ స్పీడ్, బిజినెస్ లెక్కలైనా, ఆస్ట్రాలజీ విశ్లేషణ ఏదైనా.. నా నుంచి వచ్చే ప్రతి కథనం ప్రతి వార్త పాఠకుడికి ఇన్ఫర్మేషన్తో పాటు ఇంట్రెస్ట్ను కూడా అందిస్తుంది.