Jharkhand Students : ఫలించని చర్చలు.. అసెంబ్లీ ముట్టడికి విద్యార్థులు.!

జార్ఖండ్ రాష్ట్రంలో ప్రభుత్వ ఉద్యోగ నియామక పరీక్షల్లో జరిగిన తీవ్ర అక్రమాలు, ప్రశ్నాపత్రాల లీకేజీలకు వ్యతిరేకంగా నిరసన తెలుపుతున్న విద్యార్థి లోకం సమరశంఖం పూరించింది. ముఖ్యమంత్రి హేమంత్ సోరెన్ ప్రభుత్వంతో ఆదివారం జరిపిన చర్చలు ఎలాంటి ఫలితాన్ని ఇవ్వకపోవడంతో, విద్యార్థులు సోమవారం ప్లాన్ చేసినట్లుగానే రాజధాని రాంచీలోని శాసనసభ ముట్టడి (అసెంబ్లీ మార్చ్)కి శ్రీకారం చుట్టారు.

మూడు విడతల చర్చలు విఫలం.. వీడని డెడ్‌లాక్

జెఎస్ఎస్సి (JSSC) కంబైన్డ్ గ్రాడ్యుయేట్ లెవల్ (CGL) పరీక్షను పూర్తిగా రద్దు చేయాలని, ఈ కుంభకోణంపై సెంట్రల్ బ్యూరో ఆఫ్ ఇన్వెస్టిగేషన్ (CBI) చేత పారదర్శకంగా విచారణ జరిపించాలని విద్యార్థులు డిమాండ్ చేస్తున్నారు. అయితే ప్రభుత్వం తమ 98 శాతం డిమాండ్లను అంగీకరించామని చెప్తున్నప్పటికీ, సీబీఐ విచారణ , జేఎస్ఎస్సీ సీజీఎల్ పరీక్ష రద్దుపై మొండిచేయి చూపించడంతో చర్చలు విఫలమయ్యాయి. శనివారంతో 17వ రోజుకు చేరుకున్న ఈ ఆందోళనలో పలువురు విద్యార్థులు ఆమరణ నిరాహార దీక్ష చేస్తున్నారు. సీబీఐ విచారణే తమ ప్రధాన అజెండా అని, అది నెరవేరే వరకు శాంతియుతంగా పోరాటం కొనసాగిస్తామని విద్యార్థి నాయకులు స్పష్టం చేశారు.

హెచ్చరికలు త్రోసిపుచ్చి పోరుబాట.. సీఐడీ విచారణతో జేపీఎస్సీ సభ్యుల రాజీనామా

ఒకవైపు విద్యార్థులు 8 రోజులుగా దీక్ష చేస్తూ ఆరోగ్యం క్షీణించినా లొంగడం లేదని, మరొకవైపు ఈ అక్రమాల ఊబిలో జేపీఎస్సీ (JPSC) ఉన్నతాధికారుల పేర్లు బయటపడుతున్నాయి. పరీక్షల లీకేజీ వ్యవహారంలో జార్ఖండ్ సీఐడీ విచారణకు నోటీసులు జారీ చేయడంతో, జేపీఎస్సీకి చెందిన ముగ్గురు కీలక సభ్యులు అజీతా భట్టాచార్య, అనిమా హన్స్ దా, జమాల్ అహ్మద్‌లు ఆదివారం తమ పదవులకు రాజీనామా చేశారు. గవర్నర్ సంతోష్ కుమార్ గంగ్వార్ వీరి రాజీనామాలను ఆమోదించారు. ఇదివరకే జేపీఎస్సీ ఛైర్మన్ ఎల్. ఖియాంగ్తే కూడా రాజీనామా చేయడం, ఆయనను అధికారులు గంటల తరబడి విచారించడం ఇక్కడ పరిస్థితి తీవ్రతకు అద్దం పడుతోంది.

రాంచీ వ్యాప్తంగా 144 సెక్షన్.. భారీ భద్రత

విద్యార్థుల భారీ అసెంబ్లీ మార్చ్ నేపథ్యంలో రాంచీ నగరం పోలీసుల దిగ్బంధంలోకి వెళ్లిపోయింది. శాసనసభ భవనం చుట్టూ 750 మీటర్ల పరిధిలో ఆగస్టు 6 నుంచి 12 వరకు 144 సెక్షన్ (నిషేధాజ్ఞలు) అమలులో ఉంది. విద్యార్థుల నిరసన ప్రదర్శన దృష్ట్యా నగరంలోని మెజారిటీ పాఠశాలలకు సెలవు ప్రకటించారు. శాంతిభద్రతలకు విఘాతం కలగకుండా పోలీసులు భారీగా బారికేడ్లు ఏర్పాటు చేసి తనిఖీలు చేపట్టగా, పలు జిల్లాల నుంచి రాంచీకి వస్తున్న విద్యార్థులను పోలీసులు అడ్డుకుంటున్నారని విద్యార్థి సంఘాలు ఆరోపిస్తున్నాయి. అయినా సరే, అత్యంత ప్రశాంతమైన రీతిలో తమ నిరసనను అసెంబ్లీ వేదికగా వినిపిస్తామని విద్యార్థులు తేల్చి చెప్పారు.