JPSC : జార్ఖండ్‌లో జాబ్ వార్.. ప్రభుత్వానికి విద్యార్థుల అల్టిమేటం.!

JPSC : జార్ఖండ్ పబ్లిక్ సర్వీస్ కమిషన్ (JPSC), స్టాఫ్ సెలక్షన్ కమిషన్ (JSSC) ఉద్యోగ నియామక పరీక్షల్లో జరిగిన అక్రమాలపై విద్యార్థులు చేస్తున్న ఆందోళనలు తీవ్రరూపం దాల్చాయి. జార్ఖండ్ ప్రభుత్వం , నిరసన తెలుపుతున్న విద్యార్థుల ప్రతినిధి బృందం మధ్య శుక్రవారం జరిగిన మొదటి విడత చర్చలు సానుకూల వాతావరణంలో ముగిసినప్పటికీ, ఎటువంటి స్పష్టమైన ముగింపునకు రాలేకపోయాయి. 14వ జేపీఎస్సీ పరీక్షను రద్దు చేయాలనే ప్రధాన డిమాండ్‌తో పాటు ఇతర డిమాండ్లు నెరవేరే వరకు తమ పోరాటం ఆపేది లేదని విద్యార్థులు తెగేసి చెప్పారు. ఆదివారం లోపు ప్రభుత్వం నుంచి స్పష్టమైన రాతపూర్వక హామీ రాకపోతే, ఆగస్టు 10న ప్లాన్ చేసినట్లుగా జార్ఖండ్ అసెంబ్లీ వైపు నిరసన ప్రదర్శన నిర్వహిస్తామని స్పష్టం చేశారు.

సానుకూలంగా చర్చలు.. కానీ వీడని చిక్కుముడి

ఉన్నత , సాంకేతిక విద్యాశాఖ మంత్రి సుదివ్య కుమార్ నాయకత్వంలోని ప్రభుత్వ ప్యానెల్‌తో 'జేపీఎస్సీ-జేఎస్ఎస్సీ సంస్కరణల మంచ్'కు చెందిన 10 మంది సభ్యుల ప్రతినిధి బృందం సమావేశమైంది. గతంలో ప్రతిపాదించిన బృందంలో ఒక న్యాయవాది ఉండటంపై ప్రభుత్వం అభ్యంతరం వ్యక్తం చేయడంతో, కొత్త జాబితాను సమర్పించిన తర్వాత ఈ చర్చలు జరిగాయి. చర్చల అనంతరం కోర్ కమిటీ సభ్యుడు రవీంద్ర పాశ్వాన్ మాట్లాడుతూ.. సమావేశం సానుకూలంగా జరిగిందని, తమ అభ్యర్థనలను ముఖ్యమంత్రి హేమంత్ సోరెన్ దృష్టికి తీసుకెళ్తామని మంత్రి హామీ ఇచ్చారని తెలిపారు. జేపీఎస్సీ 14వ నోటిఫికేషన్ పరీక్ష రద్దుతో పాటు ఈ కుంభకోణంపై సీబీఐ (CBI) లేదా రిటైర్డ్ హైకోర్టు న్యాయమూర్తుల కమిటీతో స్వతంత్ర విచారణ జరిపించాలని విద్యార్థులు డిమాండ్ చేస్తున్నారు.

నిరాహార దీక్షలు.. ఆసుపత్రి పాలైన విద్యార్థి నాయకుడు

'జేపీఎస్సీ-జేఎస్ఎస్సీ సంస్కరణల మంచ్' ఆధ్వర్యంలో జులై 25న ప్రారంభమైన ఈ ఆందోళన శనివారానికి 15వ రోజుకు చేరుకుంది. పలువురు విద్యార్థులు ఆమరణ నిరాహార దీక్షలు చేస్తున్నారు. మంగళవారం రాత్రి నుండి దీక్షలో ఉన్న విద్యార్థి నాయకుడు రాహుల్ క్రాంతి ఆరోగ్యం క్షిణించడంతో ఆయనను ఆసుపత్రికి తరలించారు. ప్రతిపక్ష నేత బాబులాల్ మరాండీ, ఆరోగ్య శాఖ మంత్రి ఇర్ఫాన్ అన్సారీలు ఆసుపత్రికి వెళ్లి రాహుల్ క్రాంతిని పరామర్శించారు. విద్యార్థుల సమస్యల పట్ల ప్రభుత్వం సున్నితంగా ఉందనడానికి సీఎం సోరెన్ చర్చలకు సిద్ధమవడమే నిదర్శనమని విద్యార్థులకు మంత్రులు హామీ ఇచ్చారు. మరోవైపు, జేఎల్కేఎమ్ నాయకుడు దేవేంద్రనాథ్ మహతో నేతృత్వంలోని మరో బృందంతో కూడా ప్రభుత్వం చర్చలు జరపడానికి ఆహ్వానించింది.

రాజకీయ వేడి.. శాసనసభ వాయిదా

విద్యార్థుల ఆందోళనకు రాజకీయ పార్టీలు, విద్యార్థి సంఘాల మద్దతు లభిస్తోంది. గిరిజన దిగ్గజం జైపాల్ సింగ్ ముండా కుమారుడు జయంత్ జైపాల్ సింగ్ నిరసన ప్రదేశాన్ని సందర్శించి, అవినీతికి వ్యతిరేకంగా పోరాడుతున్న విద్యార్థులకు సంఘీభావం తెలిపారు. ఐసా (AISA), ఏఐఎస్‌ఎఫ్ (AISF) వంటి వామపక్ష విద్యార్థి సంఘాలు అసెంబ్లీ వైపు చేపట్టిన ప్రదర్శనలో ఐసా జాతీయ అధ్యక్షురాలు నేహా బోరాపై ఒక వ్యక్తి సిరా చల్లడం ఉద్రిక్తతకు దారితీసింది. ఈ నియామక అక్రమాల అంశం జార్ఖండ్ శాసనసభను కూడా ఊపేసింది. పారదర్శక సీబీఐ విచారణకు డిమాండ్ చేస్తూ బీజేపీ ఎమ్మెల్యేలు సభను స్తంభింపజేయడంతో అసెంబ్లీ రోజంతా వాయిదా పడింది.

అసెంబ్లీ వద్ద ఆంక్షలు.. విచారణ వేగవంతం

రాబోయే ఆగస్టు 10న విద్యార్థుల అసెంబ్లీ ముట్టడి పిలుపు నేపథ్యంలో ముందస్తు జాగ్రత్తగా అధికారులు ఆగస్టు 6 నుంచి 12 వరకు అసెంబ్లీ చుట్టూ 750 మీటర్ల పరిధిలో నిషేధాజ్ఞలు (144 సెక్షన్) విధించారు. మరోవైపు జేపీఎస్సీ పరీక్షల అక్రమాల కేసులో ఇప్పటివరకు 19 మందిని పోలీసులు అరెస్ట్ చేయగా, మాజీ జేపీఎస్సీ ఛైర్మన్ ఎల్. ఖియాంగ్తేను జులై 28 నుంచి అధికారులు నాలుగుసార్లు విచారించారు.