Big Cat Alliance Summit : ఢిల్లీలో జరగాల్సిన తొలి ఇంటర్నేషనల్ బిగ్ క్యాట్ అలయన్స్ సమ్మిట్ వాయిదా

Big Cat Alliance Summit : దేశ రాజధాని ఢిల్లీలో జూన్ 1, 2 తేదీల్లో ఎంతో ప్రతిష్టాత్మకంగా నిర్వహించాలనుకున్న మొట్టమొదటి ఇంటర్నేషనల్ బిగ్ క్యాట్ అలయన్స్ (IBCA) అంతర్జాతీయ శిఖరాగ్ర సదస్సు వాయిదా పడింది. ఈ సదస్సుకు సంబంధించిన కొత్త తేదీలను త్వరలోనే ప్రకటిస్తామని అధికారులు వెల్లడించారు. నాలుగో భారత్-ఆఫ్రికా ఫోరమ్ సమ్మిట్ (IAFS)తో కలిపి ఈ బిగ్ క్యాట్ సదస్సును నిర్వహించాలని కేంద్ర ప్రభుత్వం ముందుగా ప్లాన్ చేసింది. పులులు, సింహాలు, చిరుతపులులు వంటి పెద్ద పిల్లి జాతి జంతువుల సంరక్షణలో, పర్యావరణ సమతుల్యతలో ఆఫ్రికా దేశాల పాత్ర ఎంతో కీలకమైనది కావడంతో రెండు సదస్సులను ఒకేసారి నిర్వహించాలనుకున్నారు.

ఈ ప్రతిష్టాత్మక సదస్సు వాయిదా పడటానికి గల కారణాలను ఒక ఉన్నతాధికారి మీడియాకు వివరించారు. ఆఫ్రికన్ యూనియన్ అధ్యక్షుడు, అలాగే ఆఫ్రికన్ యూనియన్ కమిషన్‌తో భారత్ జరిపిన సంప్రదింపుల తర్వాతే ఈ నిర్ణయం తీసుకున్నట్లు చెప్పారు. కొన్ని అనివార్య కారణాల వల్ల భారత్-ఆఫ్రికా ఫోరమ్ సదస్సును ముందుగా వాయిదా వేయాల్సి వచ్చింది. దాంతో పాటుగా ఆఫ్రికా దేశాలతో సహా ప్రపంచంలోని అన్ని సభ్య దేశాల పూర్తి స్థాయి భాగస్వామ్యాన్ని, చురుకైన హాజరును నిర్ధారించడానికి ఈ బిగ్ క్యాట్ అలయన్స్ సదస్సును కూడా తాత్కాలికంగా వాయిదా వేయడమే మంచిదని కేంద్రం భావించింది. అన్ని దేశాలతో మాట్లాడిన తర్వాత త్వరలోనే కొత్త తేదీలను ఖరారు చేస్తారు.

జీవవైవిధ్య పరిరక్షణ, పర్యావరణ అభివృద్ధి అనే ఉమ్మడి లక్ష్యాల కోసం ప్రపంచ దేశాలన్నింటితో కలిసి పనిచేయడానికి భారతదేశం ఎల్లప్పుడూ కట్టుబడి ఉంటుందని అధికారులు స్పష్టం చేశారు. ఈ ఇంటర్నేషనల్ బిగ్ క్యాట్ అలయన్స్‌ను ప్రధానమంత్రి నరేంద్ర మోదీ 2023 ఏప్రిల్ 9వ తేదీన మైసూర్ వేదికగా ప్రారంభించారు. భారతదేశంలో ప్రాజెక్ట్ టైగర్ ప్రారంభమై 50 ఏళ్లు పూర్తయిన సందర్భంగా జరిగిన వేడుకల్లో మోదీ ఈ ఐడియాను తెరపైకి తెచ్చారు. ఆ తర్వాత 2024 మార్చి 12న ఈ కూటమిని అధికారికంగా స్థాపించడం జరిగింది.

ప్రపంచవ్యాప్తంగా అంతరించిపోతున్న పులులు, సింహాలు, మంచు చిరుతలు, జగ్వార్స్ వంటి ఏడు రకాల పెద్ద పిల్లి జాతుల సంరక్షణే ధ్యేయంగా ఈ కూటమి పనిచేస్తోంది. ప్రస్తుతం ఈ ఇంటర్నేషనల్ బిగ్ క్యాట్ అలయన్స్‌లో 25 సంతకం చేసిన దేశాలు (సభ్య దేశాలు), ఐదు పరిశీలకుల (అబ్జర్వర్) దేశాలు ఉన్నాయి. అయితే త్వరలోనే గల్ఫ్ దేశమైన సౌదీ అరేబియా కూడా ఈ ప్రతిష్టాత్మక కూటమిలో చేరడానికి సిద్ధంగా ఉందని, దీనికి సంబంధించిన ప్రక్రియ కూడా తుది దశకు చేరిందని వాతావరణ శాఖ వర్గాలు తెలిపాయి. కొత్త తేదీలు ఖరారైన వెంటనే ఢిల్లీ వేదికగా ప్రపంచ దేశాల ప్రతినిధులు ఒకే తాటిపైకి రానున్నారు.