Virus Alert: గుజరాత్‌లో చండీపురా వైరస్ కలకలం.. 22 మంది పిల్లల మృతి..!

Virus Alert: గుజరాత్ రాష్ట్రంలో తీవ్రభయాందోళనలు సృష్టిస్తున్న ‘చండీపురా’ వైరస్ రోజురోజుకూ విస్తరిస్తోంది. ఈ ప్రాణాంతక వైరస్ బారిన పడి ఇప్పటివరకు రాష్ట్రవ్యాప్తంగా 22 మంది చిన్నారులు ప్రాణాలు కోల్పోయారు. ఇప్పటివరకు సేకరించిన 184 అనుమానిత శాంపిల్స్‌లో 35 కేసులకు చండీపురా వైరస్ పాజిటివ్‌గా నిర్ధారణ అయిందని, మరో 11 శాంపిల్స్ ఫలితాలు రావాల్సి ఉందని రాష్ట్ర ఆరోగ్య శాఖ మంత్రి ప్రఫుల్ పాన్షేరియా వెల్లడించారు. 15 ఏళ్లలోపు వయస్సు ఉన్న పిల్లల్లో ఈ వ్యాధి లక్షణాలు ఎక్కువగా కనిపిస్తుండటంతో, గుజరాత్ ముఖ్యమంత్రి భూపేంద్ర పటేల్ ప్రత్యక్ష పర్యవేక్షణలో ఆరోగ్య శాఖ యంత్రాంగం రంగంలోకి దిగి పూర్తి స్థాయిలో నిఘా ఏర్పాటు చేసింది.

క్షేత్రస్థాయిలో విస్తరిస్తున్న కేసులు.. చికిత్స వివరాలు

ఈ వైరస్ ప్రభావం ఏ ఒక్క గ్రామానికో లేదా ఒక ప్రాంతానికో పరిమితం కాలేదని, గుజరాత్‌లోని వివిధ జిల్లాల నుంచి ఈ కేసులు వెలుగుచూస్తున్నాయని అధికారులు తెలిపారు. ఇప్పటివరకు పాజిటివ్‌గా నిర్ధారణ అయిన బాధితుల్లో ఆరుగురు చిన్నారులు కోలుకుని ఆసుపత్రుల నుంచి డిశ్చార్జ్ కాగా, మరో ఏడుగురు బాధితులు వివిధ సివిల్ హాస్పిటళ్లలో చికిత్స పొందుతున్నారు. ముఖ్యంగా గాంధీనగర్, సబర్కంతా జిల్లాలోని హిమ్మత్‌నగర్, పటాన్, రాజ్‌కోట్ , భావ్‌నగర్ ప్రాంతాల్లోని ప్రభుత్వ ఆసుపత్రులలో చిన్నారులకు ప్రత్యేక ఐసియు వార్డులు ఏర్పాటు చేసి, అనుభవజ్ఞులైన వైద్యుల పర్యవేక్షణలో చికిత్స అందిస్తున్నారు.

ప్రభుత్వం చేపడుతున్న ముందస్తు నివారణ చర్యలు

వైరస్ విస్తరణను అరికట్టేందుకు ఆరోగ్య శాఖ బృందాలు బాధితులున్న ప్రాంతాల్లో క్షేత్రస్థాయిలో విస్తృతంగా పర్యటిస్తున్నాయి. వ్యాధి వాహకాలు వృద్ధి చెందకుండా ఉండేందుకు గాను పశువులను పాకే ప్రదేశాలలో, పశువుల కాపరుల నివాస ప్రాంతాల్లో క్రిమిసంహారక మందులను భారీగా స్ప్రే చేస్తున్నారు. ప్రాణనష్టం తగ్గించడమే లక్ష్యంగా ప్రభుత్వ, ప్రైవేట్ చిన్నపిల్లల ఆసుపత్రులకు స్పష్టమైన మార్గదర్శకాలు జారీ చేశారు. వైరస్ లక్షణాలు ఉన్న పిల్లలను ఏమాత్రం ఆలస్యం చేయకుండా వెంటనే ఆక్సిజన్ , వెంటిలేటర్ సదుపాయాలు ఉన్న ఐసియు (ICU)లలో చేర్చుకోవాలని, తద్వారా అవయవాలు విఫలమయ్యే తీవ్రమైన కాంప్లికేషన్లను అరికట్టవచ్చని స్పష్టం చేశారు.

ప్రత్యేక టీకా లేదు.. తల్లిదండ్రులకు ముందస్తు హెచ్చరికలు

ప్రస్తుతం చండీపురా వైరస్‌ను అరికట్టడానికి మార్కెట్‌లో ఎటువంటి ప్రత్యేక టీకా (వ్యాక్సిన్) లేదా నిర్దిష్టమైన ఔషధం అందుబాటులో లేదు. అయితే, సమర్థవంతమైన వ్యాక్సిన్ , నివారణ మార్గాలను కనుగొనడానికి ప్రత్యేక వైద్య పరిశోధకుల బృందం శ్రమిస్తోందని మంత్రి తెలిపారు. ముఖ్యంగా గ్రామీణ ప్రాంతాల్లో ఉండే మట్టి ఇళ్లు, గోడల పగుళ్లలోనే ఈ వ్యాధిని వ్యాప్తి చేసే క్రిములు నివాసముంటాయి కాబట్టి, వాటిని వెంటనే పూడ్చివేయాలని ప్రజలకు విజ్ఞప్తి చేశారు. పిల్లల్లో తీవ్రమైన జ్వరం, వాంతులు, ఫిట్స్ (మూర్ఛ) లేదా మరేదైనా విపరీతమైన అనారోగ్య లక్షణాలు కనిపిస్తే స్వయం వైద్యం చేయకుండా, వెంటనే సమీపంలోని ప్రభుత్వ జిల్లా ఆసుపత్రికి తరలించి వైద్య సేవలు అందించాలని అధికారులు విజ్ఞప్తి చేస్తున్నారు.