Delhi: ఢిల్లీలో కుండపోత వర్షాలు చెరువులైన రహదారులు, స్తంభించిన ట్రాఫిక్!

Delhi: దేశ రాజధాని ఢిల్లీలో కురిసిన కుండపోత వర్షాలతో నగరం అతలాకుతలమైంది. ఎడతెరిపి లేకుండా కురుస్తున్న భారీ వర్షానికి ప్రధాన రహదారులన్నీ చెరువులను తలపిస్తూ నీట మునిగాయి. దీంతో ఎక్కడికక్కడ కిలోమీటర్ల మేర భారీగా ట్రాఫిక్ జామ్ ఏర్పడి వాహనాల రాకపోకలు పూర్తిగా స్తంభించిపోయాయి.

పాఠశాలలకు వెళ్లే విద్యార్థులు, కార్యాలయాలకు వెళ్లే ఉద్యోగులు గమ్యస్థానాలకు చేరుకోలేక తీవ్ర అవస్థలు పడ్డారు. రహదారులపై రాకపోకలు నిలిచిపోవడంతో ప్రయాణికులంతా ప్రజా రవాణా వైపు మళ్లడంతో ఢిల్లీ మెట్రో స్టేషన్లు, బస్సులు ప్రయాణికులతో కిక్కిరిసిపోయి తీవ్ర రద్దీ నెలకొంది.

రాబోయే 24 గంటల పాటు నగరంలో భారీ నుంచి అతి భారీ వర్షాలు కురిసే అవకాశముందని వాతావరణ శాఖ హెచ్చరించిన నేపథ్యంలో పరిస్థితులు మరింత ఆందోళనకరంగా మారాయి. మరోవైపు నగర పాలక సంస్థలు, విపత్తు నిర్వహణ అధికారులు రంగంలోకి దిగి ప్రధాన రహదారులు, లోతట్టు ప్రాంతాల్లో నిలిచిన నీటిని భారీ మోటార్ల ద్వారా వేగంగా తొలగిస్తూ ట్రాఫిక్‌ను పునరుద్ధరించేందుకు చర్యలు ముమ్మరం చేశారు.