దిల్లీ హోటల్ అగ్నిప్రమాదంలో ట్విస్ట్: వంట మనిషి నిర్లక్ష్యమే కారణం..

Delhi: దేశ రాజధాని దిల్లీలోని 'స్టే బెడ్‌ అండ్‌ బ్రేక్‌ఫాస్ట్‌' హోటల్‌లో జరిగిన ఘోర అగ్నిప్రమాదంపై అధికారులు దర్యాప్తును ముమ్మరం చేశారు. 21 మంది అమాయకుల ప్రాణాలను బలితీసుకున్న ఈ దురదృష్టకర ఘటనలో పోలీసులు మరో కీలక అరెస్ట్ చేశారు. హోటల్‌లో కుక్‌ (వంట మనిషి)గా పనిచేస్తున్న కేశవ్‌ నేగిని తాజాగా అదుపులోకి తీసుకున్నారు.

పోలీసుల ప్రాథమిక దర్యాప్తులో షాకింగ్ నిజాలు వెలుగుచూశాయి. సదరు వంట మనిషి నిర్లక్ష్యం వల్లే హోటల్‌లో మంటలు చెలరేగి, ఈ స్థాయి ప్రమాదం సంభవించిందని అధికారులు నిర్ధారించారు. కేశవ్ నేగితో పాటు హోటల్‌కు చెందిన మరికొంతమంది సిబ్బందిని కూడా అదుపులోకి తీసుకుని పోలీసులు ప్రస్తుతం విచారిస్తున్నారు.

హోటల్‌ నిర్వహణలో యాజమాన్యం నిబంధనలను బేఖాతరు చేస్తూ అనేక భద్రతా ఉల్లంఘనలకు (Safety Violations) పాల్పడినట్లు దర్యాప్తులో తేలింది. హోటల్‌లోని కిటికీలు, గ్లాస్‌ పానల్స్‌ అన్నింటినీ పూర్తిగా మూసివేయడంతో, మంటలు అంటుకున్న వెంటనే విషపూరితమైన పొగంతా హోటల్‌లోనే అలముకుంది.

దట్టమైన పొగ కారణంగా కళ్లు కనిపించక, ఊపిరాడక బాధితులు గదుల్లోనే చిక్కుకుపోయారు. మెజారిటీ బాధితులు పొగ కారణంగానే శ్వాస తీసుకోలేక ప్రాణాలు కోల్పోయారు. అత్యవసర సమయంలో ప్రాణాలతో బయటపడే మార్గమైన బేస్‌మెంట్‌ ప్రవేశమార్గానికి యాజమాన్యం తాళం వేసి ఉంచింది.

ప్రమాదం జరిగిన వెంటనే రంగంలోకి దిగిన రెస్క్యూ సిబ్బందికి.. హోటల్ లోపలికి వెళ్లేందుకే దాదాపు 10 నిమిషాల సమయం పట్టిందంటే అక్కడి భద్రతా లోపాలు ఎంత దారుణంగా ఉన్నాయో అర్థం చేసుకోవచ్చు. తీవ్ర శ్రమకోర్చి బేస్‌మెంట్ నుంచి ఏడుగురిని సిబ్బంది సురక్షితంగా రక్షించారు. కాగా, బుధవారం జరిగిన ఈ ప్రమాదానికి సంబంధించి హోటల్‌ యజమాని లవ్‌కేశ్‌ బజాజ్‌ను పోలీసులు ఇప్పటికే అరెస్టు చేశారు. కనీసం భవనానికి ఫైర్‌ సేఫ్టీ సర్టిఫికెట్‌ (అగ్నిమాపక అనుమతి) కూడా లేదనే నిజాన్ని యజమాని విచారణలో అంగీకరించినట్లు సమాచారం.