Dabur India : డాబర్‌కు FSSAI షాక్.. ‘100% ప్యూర్’ క్లెయిమ్‌లపై నిషేధం.!

Dabur India : ప్రముఖ ప్యాకేజ్డ్ ఫుడ్ అండ్ ఎఫ్‌ఎమ్‌సిజి (FMCG) దిగ్గజ సంస్థ 'డాబర్ ఇండియా'కు భారత ఆహార భద్రత, ప్రమాణాల ప్రాధికార సంస్థ (FSSAI) ఊహించని కఠిన నిర్ణయంతో బిగ్ షాక్ ఇచ్చింది. తమ ఆహార ఉత్పత్తులపై "100%" అనే క్లెయిమ్‌లతో విక్రయాలు జరపడంపై పూర్తిస్థాయి నిషేధం విధిస్తూ ఉత్తర్వులు జారీ చేసింది. సాధారణంగా మార్కెట్‌లో లభించే ఉత్పత్తులపై "100% నేచురల్", "100% ప్యూర్" , "100% ఆర్గానిక్" అంటూ చేసే ప్రచారాలు వినియోగదారులను తీవ్రంగా తప్పుదోవ పట్టించేలా ఉన్నాయని తేల్చిచెప్పిన నియంత్రణ సంస్థ, ఈ తరహా లేబుళ్లు ఉన్న ఉత్పత్తుల అమ్మకాలను తక్షణమే నిలిపివేయాలని స్పష్టం చేసింది.

విక్రయాలపై తక్షణ నిషేధాజ్ఞలు (Prohibition Order)

డాబర్ కంపెనీ తన అధికారిక వెబ్‌సైట్‌తో పాటు పలు ఆహార ఉత్పత్తుల ప్యాకేజింగ్‌పై "100%" అనే పదాన్ని ప్రచారానికి ఉపయోగించడంపై ఎఫ్‌ఎస్‌ఎస్‌ఏఐ తీవ్ర ఆగ్రహం వ్యక్తం చేసింది. ఇటువంటి అస్పష్టమైన, శాస్త్రీయంగా ధృవీకరించలేని ప్రకటనలు ఆహార భద్రత నిబంధనలు 2018 లోని 'అడ్వర్టైజింగ్ అండ్ క్లెయిమ్స్' నియమావళికి పూర్తిగా విరుద్ధమని వ్యాఖ్యానించింది. కొనుగోలుదారులు మోసపోకుండా నిరోధించేందుకు డాబర్ ఇండియా లిమిటెడ్‌కు తక్షణమే వర్తించేలా నిషేధాజ్ఞలు (Prohibition Order) జారీ చేసింది. ఈ నిషేధం ప్రకారం అటువంటి అభ్యంతరం ఉన్న లేబుళ్లతో ఉన్న ఉత్పత్తులను విక్రయించడం చట్టరీత్యా నేరమవుతుంది.

నిషేధపు పరిధిలోకి వచ్చే ప్రధాన నిత్యావసర ఉత్పత్తులు

ఎఫ్‌ఎస్‌ఎస్‌ఏఐ విధించిన ఈ నిషేధం డాబర్‌కు చెందిన అనేక రకాల లీడింగ్ బ్రాండ్ ఉత్పత్తులపై నేరుగా ప్రభావం చూపనుంది. ముఖ్యంగా మార్కెట్‌లో అత్యధికంగా అమ్ముడయ్యే డాబర్ తేనె (Honey), ఆపిల్ సైడర్ వెనిగర్, కొబ్బరి నూనె, ఆవు నెయ్యి, కొబ్బరి నీళ్లు , కొబ్బరి పాలు వంటి ఉత్పత్తులు ఈ నిషేధపు జాబితాలో ఉన్నాయి. ఉదాహరణకు 'డాబర్ హోమ్‌మేడ్ కోకోనట్ మిల్క్' ప్యాకెట్‌పై "100% ప్యూరిటీ" అని ముద్రించడాన్ని నిషేధించారు. వివిధ పదార్థాల కలయికతో తయారయ్యే 'కాంపౌండ్ ఫుడ్స్' విషయంలో ఇటువంటి "100% స్వచ్ఛత" క్లెయిమ్‌లు చేయడానికి నిబంధనలు అంగీకరించవని అధికారులు స్పష్టం చేశారు.

'జైవిక్ భారత్' లోగో వినియోగంపైనా నిషేధపు వేటు

కేవలం "100%" క్లెయిమ్‌లకే పరిమితం కాకుండా, కొన్ని ఉత్పత్తులపై 'జైవిక్ భారత్' (Jaivik Bharat) లోగోను ప్రదర్శించడంపై కూడా ఫుడ్ సేఫ్టీ అథారిటీ తీవ్రంగా స్పందించింది. ఆర్గానిక్ ఆహార ఉత్పత్తుల ప్రామాణికతను తెలియజేసే ఈ అధికారిక మార్క్‌ను ఎఫ్‌ఎస్‌ఎస్‌ఏఐ నుంచి ఎలాంటి ముందస్తు అనుమతులు, చెల్లుబాటయ్యే అప్రూవల్స్ పొందకుండానే డాబర్ వినియోగించినట్లు గుర్తించి దానిపై కూడా నిషేధాత్మక చర్యలు చేపట్టింది.

15 రోజుల్లో 'యాక్షన్ టేకన్ రిపోర్ట్' ఇవ్వాలని ఆదేశం

ఈ "100%" క్లెయిమ్‌లను , లేబుళ్లను తొలగించాలని గతంలోనే డాబర్ కంపెనీకి హెచ్చరికలు జారీ చేసినప్పటికీ, కంపెనీ తగిన దిద్దుబాటు చర్యలు తీసుకోకపోవడంతోనే ఈ తీవ్రమైన నిషేధ నిర్ణయం తీసుకోవాల్సి వచ్చిందని ఎఫ్‌ఎస్‌ఎస్‌ఏఐ తెలిపింది. నిషేధాజ్ఞలు అమలు చేయడం, మార్కెట్ నుంచి అటువంటి ఉత్పత్తులను ఉపసంహరించుకోవడం , లేబుళ్ల మార్పుపై ఇప్పటివరకు తీసుకున్న చర్యల వివరాలతో కూడిన 'యాక్షన్ టేకన్ రిపోర్ట్' (ATR)ను రాబోయే 15 రోజుల్లోగా తమకు సమర్పించాలని డాబర్ యాజమాన్యాన్ని ఆదేశించింది.