Assembly Election Results: బెంగాల్‌లో టీఎంసీ-బీజేపీ నువ్వా నేనా.. తమిళనాడులో డీఎంకే జోరు.. కేరళలో కాంగ్రెస్ కూటమి లీడ్

TMC vs BJP: దేశవ్యాప్తంగా రాజకీయ వేడిని పెంచుతున్న ఐదు రాష్ట్రాల ఎన్నికల ఫలితాల పండగ ఊపందుకుంది. కౌంటింగ్ ప్రారంభమైన కొద్దిసేపటికే వస్తున్న ట్రెండ్స్ చూస్తుంటే, కొన్ని చోట్ల అధికార పక్షాల గుండెల్లో రైళ్లు పరిగెడుతుండగా, మరికొన్ని చోట్ల ప్రతిపక్షాలు జయకేతనం దిశగా అడుగులు వేస్తున్నాయి. ఉదయం నుంచి సాగుతున్న ఈ పోరులో గెలుపు గుర్రం ఎవరిదనే ఉత్కంఠ క్లైమాక్స్‌కు చేరుకుంది.

బెంగాల్‌లో కమలం వర్సెస్ కాషాయం

అందరి కళ్లు ఉన్న పశ్చిమ బెంగాల్‌లో ఫలితాలు సెకనుకో తీరుగా మారుతున్నాయి. పోస్టల్ బ్యాలెట్ల లెక్కింపులో బీజేపీ 45 స్థానాల్లో ఆధిక్యం ప్రదర్శిస్తూ దూసుకుపోతుండగా, మమతా బెనర్జీ నేతృత్వంలోని టీఎంసీ 40 స్థానాలతో గట్టి పోటీ ఇస్తోంది. బెంగాల్ పీఠం ఎవరికి దక్కుతుందనేది ప్రతి రౌండ్‌లోనూ ఉత్కంఠ రేపుతోంది. ఇక్కడ పోరు ఢీ అంటే ఢీ అన్నట్లుగా సాగుతుండటంతో అటు కోల్‌కతా, ఇటు ఢిల్లీ వర్గాల్లో టెన్షన్ నెలకొంది.

తమిళనాడులో విజయ్ బోణీ

తమిళనాడులో స్టాలిన్ నేతృత్వంలోని డీఎంకే కూటమి తన ఆధిపత్యాన్ని చాటుకుంటోంది. ప్రస్తుతం 40 స్థానాల్లో డీఎంకే ముందంజలో ఉండగా, ఏఐడీఎంకే 7 స్థానాలకే పరిమితమైంది. అయితే, ఈ ఎన్నికల్లో అందరినీ ఆశ్చర్యపరిచింది నటుడు విజయ్ స్థాపించిన టీవీకే పార్టీ. తన తొలి అడుగులోనే 4 స్థానాల్లో ఆధిక్యం కనబరచడం కోలీవుడ్‌లో చర్చనీయాంశమైంది.

కేరళలో కాంగ్రెస్ జోరు.. అస్సాంలో హిమంత హవా

కేరళలో ఎల్‌డీఎఫ్, యూడీఎఫ్ మధ్య పాత యుద్ధమే సాగుతున్నా.. ప్రస్తుతానికి కాంగ్రెస్ నేతృత్వంలోని యూడీఎఫ్ 17 స్థానాలతో పైచేయి సాధించింది. అస్సాంలో మాత్రం హిమంత బిశ్వ శర్మ నేతృత్వంలోని బీజేపీ కూటమి 14 స్థానాల్లో ఆధిక్యంతో తన పట్టును నిరూపించుకుంటోంది. పుదుచ్చేరిలో కూడా బీజేపీ కూటమి స్వల్ప ఆధిక్యంలో ఉండి అధికారం దిశగా అడుగులు వేస్తోంది. ప్రస్తుతం ఈవీఎంల లెక్కింపు వేగవంతం కావడంతో అసలు సిసలు ఫలితాలు మరికొద్ది సేపట్లో తేలిపోనున్నాయి. మరి ఈ ఎన్నికల సంగ్రామంలో ఓటరు దేవుడు ఎవరికి పట్టం కడతాడో చూడాలి.