S Janaki and Savitri: సావిత్రి పట్టుదల...జానకమ్మ శపథం

S Janaki and Savitri: వెండితెరపై ‘మహానటి’గా వెలిగిన సావిత్రి అభినయం గురించి, గానకోకిల ఎస్. జానకి మధుర గాత్రం గురించి తెలియని తెలుగు ప్రేక్షకులు ఉండరు. అయితే, సినిమా ఇండస్ట్రీలో ఒకప్పుడు వీరిద్దరి మధ్య జరిగిన ఒక ఆసక్తికర సంఘటన పెద్ద వివాదానికి దారితీసింది. సావిత్రి నటించే సినిమాలకు తాను భవిష్యత్తులో ఒక్క పాట కూడా పాడనని జానకమ్మ గట్టి నిర్ణయం తీసుకున్నారు. దాదాపు 20 భాషల్లో 50 వేలకు పైగా గీతాలను ఆలపించి, మూడు తరాల హీరోయిన్లకు గొంతుకగా నిలిచిన జానకమ్మ... కెరీర్ ముగిసేవరకు సావిత్రి విషయంలో తన శపథాన్ని నిలబెట్టుకోవడం వెనుక ఒక పెద్ద ఆత్మగౌరవ పోరాటమే దాగి ఉంది.

సుశీలమ్మ కోసమే ఆ రూల్.. జానకమ్మకు తగిలిన ఎదురుదెబ్బ

సావిత్రి కెరీర్ ప్రారంభంలో ఆమెకు పి.లీల అత్యధికంగా పాడారు. 'మాయాబజార్', 'మిస్సమ్మ' చిత్రాల్లోని లీల పాడిన పాటలు ఇప్పటికీ అజరామరం. అయితే, ఆ తర్వాత సావిత్రికి గానసరస్వతి పి. సుశీల గాత్రం బాగా నచ్చింది. తన అభినయానికి సుశీల గొంతు మాత్రమే నూటికి నూరు శాతం సరిపోతుందని సావిత్రి నమ్మేవారు. అందుకే, తన సినిమాల్లో పాటలన్నీ సుశీలమ్మే పాడాలనే కచ్చితమైన నిబంధనను ఆమె పెట్టుకున్నారు.

ఈ విషయం తెలియని ఎస్. జానకి ఒక తమిళ చిత్రంలో సావిత్రి పాత్ర కోసం ఒక అద్భుతమైన పాటను పాడారు. రికార్డింగ్ పూర్తయ్యాక ఆ పాట ఎంతో బాగా వచ్చింది. కానీ, తన నిబంధనకు విరుద్ధంగా వేరే వాళ్లతో పాడించారనే కారణంతో... సావిత్రి పట్టుబట్టి జానకమ్మ పాడిన ఆ పాటను తొలగించి, మళ్లీ పి. సుశీల చేత రీ-రికార్డింగ్ చేయించారు. ఈ ఘటన జానకమ్మ మనసును తీవ్రంగా గాయపరిచింది. తన ప్రతిభను అవమానించినట్లు భావించిన జానకి, ఇకపై సావిత్రి నటించే ఏ చిత్రానికి పాడకూడదని మనసులోనే శపథం చేశారు.

దర్శక నిర్మాతల మాయ మాటలు.. మూడు నెలల నిరీక్షణ

ఈ మనస్పర్థల తర్వాత జరిగిన ఒక విచిత్రమైన సంఘటనను జానకమ్మ స్వయంగా ఓ ఇంటర్వ్యూలో పంచుకున్నారు. ఒకానొక చిత్రంలో "నీ లీల పాడెద దేవా" అనే భక్తి గీతాన్ని పాడాల్సిందిగా జానకిని నిర్మాతలు కోరారు. అయితే అందులో సావిత్రి నటిస్తున్నారని తెలిసి ఆమె నిరాకరించారు. ఆ పాట కోసం ఏకంగా మూడు నెలల పాటు రికార్డింగ్‌ను హోల్డ్‌లో పెట్టారు.

చివరకు దర్శకుడు, నిర్మాత వచ్చి... "ఈ పాటలో సావిత్రి నటించడం లేదు, వేరే నటిపై చిత్రీకరిస్తున్నాం" అని అబద్ధం చెప్పి జానకమ్మతో పాడించారు. కానీ తీరా సినిమా విడుదలయ్యాక చూస్తే, ఆ పాటలో సావిత్రినే నటించారు. ఈ విధంగా ఇండస్ట్రీలో ఎంత ఒత్తిడి తెచ్చినప్పటికీ, తన ఆత్మగౌరవాన్ని కాపాడుకుంటూ సావిత్రి సినిమాలకు దూరంగా ఉండటానికే జానకమ్మ మొగ్గు చూపడం విశేషం. సినీ పరిశ్రమలో తెర వెనుక ఉండే ఇలాంటి ఈగోలు, పంతాలు నాటి కాలంలో ఎంత గట్టిగా ఉండేవో చెప్పడానికి ఈ కథనమే ఒక ఉదాహరణ.