Jason Sanjay: నాన్నతో హాలీవుడ్ మల్టీస్టారర్ మూవీ తీస్తా.! దళపతి విజయ్ కొడుకు ఆసక్తికర వ్యాఖ్యలు

Jason Sanjay: కోలీవుడ్ నటుడు దళపతి విజయ్ కుమారుడు జేసన్ సంజయ్ ప్రస్తుతం దర్శకుడిగా తనకంటూ ప్రత్యేక గుర్తింపు తెచ్చుకునే ప్రయత్నంలో ఉన్నారు. తాజాగా ఆయన మీడియాతో మాట్లాడుతూ తన భవిష్యత్తు ప్రాజెక్ట్‌లు, సినిమా విశేషాల గురించి పలు ఆసక్తికర విషయాలను పంచుకున్నారు. ఒకవేళ హాలీవుడ్ యాక్షన్ హీరో జేసన్ స్టాథమ్‌తో కలిసి మల్టీస్టారర్ సినిమా తీసే అవకాశం వస్తే, కోలీవుడ్ నుంచి నటుడిగా ఎవరిని ఎంచుకుంటారని ఒక ప్రశ్న సంధించారు. అందుకు జేసన్ సంజయ్ ఎలాంటి తటపటాయింపు లేకుండా 'మా నాన్ననే' అంటూ సమాధానం ఇచ్చారు.

హాలీవుడ్ హీరోతో తన తండ్రి దళపతి విజయ్‌ని కలిపి ఒక సినిమా తీస్తే ఆ కొలాబరేషన్ అత్యద్భుతంగా ఉంటుందని ఆయన అభిప్రాయపడ్డారు. ప్రస్తుతం ఈ వ్యాఖ్యలు సోషల్ మీడియాలో విపరీతంగా వైరల్ అవుతుండటంతో విజయ్ అభిమానులు ఎంతో ఆనందం వ్యక్తం చేస్తున్నారు. తండ్రిపై తనకున్న గౌరవాన్ని, ఆయనతో సినిమా చేయాలనే కోరికను జేసన్ సంజయ్ ఈ సందర్భంగా బహిరంగంగా వ్యక్తపరిచారు.

కాగా, సందీప్ కిషన్‌తో కలిసి జేసన్ సంజయ్ తెరకెక్కించిన 'సిగ్నా' చిత్రం జూలై 31న విడుదల కావాల్సి ఉండగా కొన్ని కారణాల వల్ల వాయిదా పడింది. త్వరలోనే ఈ చిత్రానికి సంబంధించిన కొత్త రిలీజ్ డేట్ వెలువడే అవకాశం ఉందని సినీ వర్గాలు భావిస్తున్నాయి. దర్శకుడిగా తన మొదటి అడుగు వేస్తున్న జేసన్ సంజయ్ భవిష్యత్తు ప్రాజెక్ట్‌లపై టాలీవుడ్, కోలీవుడ్ వర్గాల్లో భారీ అంచనాలు నెలకొన్నాయి.