Suriya: 'కరుప్పు' తర్వాత సూర్య మరో సంచలనం... నిర్మాత నాగ వంశీ ధీమా!

Suriya టాలీవుడ్, కోలీవుడ్ స్టార్ హీరో సూర్య తన కెరీర్‌లో ఎన్నడూ లేని విధంగా ఒక భారీ బ్లాక్‌బస్టర్ సక్సెస్‌తో దూసుకుపోతున్నారు. ఇటీవల ఆయన నటించిన 'కరుప్పు' చిత్రం 300 కోట్ల రూపాయలకు పైగా వసూళ్లను సాధించి, సూర్య కెరీర్‌లోనే అత్యధిక వసూళ్లు రాబట్టిన చిత్రంగా చరిత్ర సృష్టించింది.

ఈ జోష్‌లో ఉండగానే, సూర్య నటించిన తదుపరి చిత్రం 'విశ్వనాథ్ అండ్ సన్స్' (Vishwanath and Sons) విడుదల కోసం అభిమానులు ఎంతో ఆసక్తిగా ఎదురుచూస్తున్నారు. ప్రముఖ దర్శకుడు వెంకీ అట్లూరి దర్శకత్వంలో తెరకెక్కుతున్న ఈ ఫ్యామిలీ ఎంటర్‌టైనర్, ఆగస్టు 14, 2026న ప్రపంచవ్యాప్తంగా థియేటర్లలో గ్రాండ్‌గా విడుదల కానుంది.

'200 శాతం బ్లాక్‌బస్టర్' అంటున్న నిర్మాతలు

ఇటీవల ఒక ఇంటర్వ్యూలో నిర్మాత నాగ వంశీ 'విశ్వనాథ్ అండ్ సన్స్'పై ఉన్న అంచనాల గురించి మాట్లాడుతూ ఆసక్తికర వ్యాఖ్యలు చేశారు. "కరుప్పు విజయంతో నాపై బాధ్యత పెరగలేదు, కానీ నా ఆత్మవిశ్వాసం మరింత పెరిగింది. ఈ సినిమాను నేను ఇప్పటికే చూశాను, ఇది 200 శాతం బ్లాక్‌బస్టర్. ప్రతి ఒక్కరూ ఒక క్షణం కూడా ఆలోచించకుండా ఈ ఫ్యామిలీ మూవీని ఎంజాయ్ చేస్తారు," అని ఆయన ధీమా వ్యక్తం చేశారు. కరుప్పు వంటి భారీ విజయం తర్వాత సూర్య నుంచి వస్తున్న మరో చిత్రం కావడం వల్ల ఈ సినిమాపై ట్రేడ్ వర్గాల్లో కూడా భారీ అంచనాలు ఉన్నాయి.

కథాంశం… తారాగణం

'విశ్వనాథ్ అండ్ సన్స్' చిత్రం ఒక ఆసక్తికరమైన ప్రేమకథాంశంతో సాగుతుంది. 40 ఏళ్ల వయసులో అద్భుతమైన ఏకాగ్రత , ఫిట్‌నెస్‌ను కాపాడుకునే సంజయ్ విశ్వనాథ్ (సూర్య) జీవితంలోకి 20 ఏళ్ల మాడ్డీ (మమిత బైజు) ప్రవేశించినప్పుడు చోటుచేసుకునే పరిణామాలే ఈ సినిమా కథ. వయసులో చాలా తేడా ఉన్న ఇద్దరి మధ్య చిగురించిన ప్రేమ, వారి జీవితాలను ఎలా మార్చేసిందనేది హృద్యంగా చూపించనున్నారు.

ఈ ప్రతిష్టాత్మక చిత్రాన్ని 'వాతి', 'లక్కీ భాస్కర్' వంటి విజయవంతమైన చిత్రాల దర్శకుడు వెంకీ అట్లూరి ప్రతిభావంతంగా తెరకెక్కిస్తున్నారు. సితార ఎంటర్‌టైన్‌మెంట్స్ , ఫార్చ్యూన్ ఫోర్ సినిమాస్ బ్యానర్‌లపై నిర్మాతలు నాగ వంశీ, సాయి సౌజన్య సంయుక్తంగా ఈ చిత్రాన్ని నిర్మిస్తున్నారు. ఈ చిత్రంలో సూర్యతో పాటు మమిత బైజు ప్రధాన పాత్రల్లో నటిస్తుండగా, రాధికా శరత్‌కుమార్, రవీనా టాండన్, నాజర్, సుధ, రఘు బాబు వంటి సీనియర్ నటులు కీలక పాత్రల్లో కనిపించనున్నారు. సాంకేతిక విభాగం విషయానికి వస్తే, జి.వి. ప్రకాష్ కుమార్ సంగీతం అందిస్తుండగా, సినిమాటోగ్రఫీని నిమిష్ రవి, ఎడిటింగ్ బాధ్యతలను నవీన్ నూలి పర్యవేక్షిస్తున్నారు.

ఈ చిత్రంతో పాటు సూర్య చేతిలో జిత్తు మాధవన్ దర్శకత్వంలో సూర్య 47, టి.జె. జ్ఞానవేల్ దర్శకత్వంలో సూర్య 48 ప్రాజెక్టులు ఉన్నాయి. 'విశ్వనాథ్ అండ్ సన్స్' ఆగస్టు 14న విడుదలవుతుండటంతో, సూర్య వరుస విజయాలతో ఈ ఏడాదిని గుర్తుండిపోయేలా మార్చుకోనున్నారు.