శ్రీదేవి గారితో మా నాన్నగారు.. ఇప్పుడు జాన్వీతో నేను: రామ్ చరణ్

గ్లోబల్ స్టార్ రామ్ చరణ్ నటిస్తున్న అత్యంత ప్రతిష్టాత్మక చిత్రం ‘పెద్ది’ప్రచార చిత్ర విడుదల వేడుక ముంబై నగరంలో అత్యంత వైభవంగా జరిగింది. ఈ భారీ వేడుకకు చరణ్, జాన్వీ కపూర్, దర్శకుడు బుచ్చిబాబు, ఏఆర్ రెహమాన్, నటుడు దివ్యేందు శర్మ, ఛాయాగ్రాహకుడు రత్నవేలు హాజరయ్యారు. అక్కడ విడుదలైన ట్రైలర్ చూసి అభిమానులు ఆనందంతో హోరెత్తించారు.

టాలీవుడ్ టు బాలీవుడ్.. ‘పెద్ది’ హంగామా

భారతీయ చలనచిత్ర రంగంలో అత్యంత అంచనాలున్న ‘పెద్ది’ సినిమా ప్రచార చిత్రం ముంబై వేదికగా విడుదలై సంచలనం సృష్టిస్తోంది. దేశవ్యాప్త మీడియా ప్రతినిధులు, వేలాది మంది అభిమానుల సమక్షంలో జరిగిన ఈ వేడుక సరికొత్త రికార్డులకు తెరలేపింది. వెండితెరపై రామ్ చరణ్ పవర్‌ఫుల్ పహల్వాన్ అవతారానికి థియేటర్లలో భారీ స్పందన లభిస్తోంది. ముఖ్యంగా యాక్షన్, భావోద్వేగాల కలయికతో దర్శకుడు బుచ్చిబాబు తెరకెక్కించిన విధానం అద్భుతంగా ఉందనే ప్రశంసలు వ్యక్తమవుతున్నాయి.

కెరీర్‌లో నిలిచిపోయే ప్రత్యేక చిత్రం

ఈ ప్రత్యేక వేడుకలో రామ్ చరణ్ మాట్లాడుతూ తన సినీ ప్రస్థానంలోని ఆసక్తికర విషయాలను పంచుకున్నారు. ప్రతి నటుడికి వైవిధ్యమైన కథలు, మైలురాళ్లుగా నిలిచే సినిమాలు రావడం చాలా అరుదుగా జరుగుతుందని ఆయన పేర్కొన్నారు. తన కెరీర్‌లో అత్యంత ప్రజాదరణ పొందిన మగధీర, రంగస్థలం, ఆర్ఆర్ఆర్ వంటి భారీ చిత్రాలు రావడానికి చాలా సమయం పట్టిందని గుర్తుచేశారు. అయితే, ఆర్ఆర్ఆర్ వంటి అంతర్జాతీయ విజయం తర్వాత మళ్లీ అంతే స్థాయిలో ‘పెద్ది’ లాంటి ఒక అద్భుతమైన కథ తన వద్దకు వెంటనే రావడం ఎంతో సంతోషాన్ని కలిగించిందని వివరించారు. దర్శకుడు బుచ్చిబాబు ఈ కథను వినిపించినప్పుడే, ఇలాంటి సినిమాలు కెరీర్‌లో చాలా అరుదుగా వస్తాయని తనకు అర్థమైందని, అందుకే ఇది తన కెరీర్‌లో ఓ ప్రత్యేక చిత్రంగా నిలిచిపోతుందని ధీమా వ్యక్తం చేశారు.

రెండేళ్ల కష్టం.. ‘పెద్ది’ని శ్వాసించాం!

సినిమా కోసం చిత్ర యూనిట్ పడిన శ్రమను చరణ్ ఈ సందర్భంగా ప్రశంసించారు. "మేమంతా గత రెండేళ్ల నుంచి ఈ సినిమా కోసం రాత్రింబవళ్లూ కష్టపడి పనిచేశాం. మా శరీరంలోని ప్రతి అణువులోనూ ఈ కథను నింపుకొన్నాం. నిజం చెప్పాలంటే మేం ‘పెద్ది’ని శ్వాసించాం. మాకంటే ముందే ఐదేళ్లుగా బుచ్చిబాబు ఈ కథతోనే ప్రయాణం చేస్తూ ఎంతో కష్టపడ్డాడు" అని చరణ్ భావోద్వేగానికి గురయ్యారు. ఈ చిత్రానికి ఆస్కార్ విజేత ఏఆర్ రెహమాన్ ప్రధాన పిల్లర్ అని, అలాగే సహనటుడు దివ్యేందు శర్మ ప్రతి తెలుగు డైలాగ్‌ను ఎంతో శ్రద్ధగా నేర్చుకుని అద్భుతంగా నటించారని కొనియాడారు.

శ్రీదేవి - చిరంజీవి మ్యాజిక్ రిపీట్

కథానాయిక జాన్వీ కపూర్ ప్రతిభను రామ్ చరణ్ ప్రత్యేకంగా అభినందించారు. సినిమాలో ఆమె నృత్యాలు అద్భుతంగా ఉంటాయని చెప్పారు. వరుసగా 85 రోజుల పాటు షూటింగ్ చేశామని, చివరి పాట సమయానికి అసలు టైం లేకపోయినా జాన్వీ అప్పటికప్పుడు కష్టమైన స్టెప్స్‌ను సాధన చేసి అదరగొట్టేసిందని ప్రశంసించారు. గతంలో తన తండ్రి చిరంజీవి, అతిలోకసుందరి శ్రీదేవి కలిసి ఎన్నో అద్భుతమైన సినిమాలు చేశారని గుర్తుచేస్తూ, ఇప్పుడు తామిద్దరం కలిసి పనిచేయాలని ఇరు కుటుంబ సభ్యులు, అభిమానులు ఎప్పటి నుంచో అనుకుంటున్నారని, ఈ సినిమాతో ఆ కల నెరవేరిందని ఆనందం వ్యక్తం చేశారు. జూన్ 4న ఈ చిత్రం ప్రపంచవ్యాప్తంగా భారీస్థాయిలో విడుదల కానుంది.