Nayanthara: అప్పుడు రూ. 2 వేలు.. ఇప్పుడు వందల కోట్లు.. లేడీ సూపర్ స్టార్ అంటే ఆ మాత్రం ఉంటది మరి.!

Nayanthara: దక్షిణాది చిత్ర పరిశ్రమలో లేడీ సూపర్ స్టార్‌గా తనకంటూ ఒక సుస్థిర స్థానాన్ని ఏర్పరచుకున్న నటి నయనతార. రెండు దశాబ్దాలుగా సినీ రంగంలో అగ్ర కథానాయికగా కొనసాగుతూ ఎంతో మందికి ఆదర్శంగా నిలుస్తున్నారు. సినిమా విజయంతో సంబంధం లేకుండా తన మార్కెట్, క్రేజ్ పెంచుకుంటూ పోతున్న ఈ తార కెరీర్ ప్రారంభంలో పడిన కష్టాలు, ఆమె మొదటి పారితోషికం వివరాలు తాజాగా నెట్టింట వైరల్ అవుతున్నాయి. మారాయి. ఎటువంటి సినీ నేపథ్యం లేని కుటుంబం నుంచి వచ్చి పాన్ ఇండియా స్టార్‌గా ఎదిగిన నయనతార సక్సెస్ జర్నీ ఎంతో స్ఫూర్తిదాయకం.

ఇటీవల జరిగిన ఒక ఇంటర్వ్యూలో నయనతార తన సినీ ప్రయాణం తొలినాళ్లను గుర్తుచేసుకున్నారు. కాలేజీ రోజుల్లోనే మోడలింగ్ రంగంలోకి అడుగుపెట్టిన ఆమె, ఒక మ్యాగజైన్ కవర్ షూట్ కోసం మొదటిసారి పనిచేశారు. ఆ ఫ్యాషన్ ప్రోగ్రామ్ కోసం ఆమెకు అప్పట్లో కేవలం రూ. 2 వేలు నుంచి రూ. 3 వేలు వరకు పారితోషికం దక్కిందని ఆమె వెల్లడించారు. ఆ చిన్న మొత్తంతో ప్రారంభమైన ఆమె ప్రయాణం అంచెలంచెలుగా ఎదుగుతూ నేడు కోట్ల రూపాయలు తీసుకునే స్థాయికి చేరింది. మలయాళ చిత్ర పరిశ్రమలో సాధారణ నటిగా అడుగుపెట్టి ఆ తర్వాత తెలుగు, తమిళ భాషల్లో అగ్రశ్రేణి హీరోలందరి సరసన నటించి బ్లాక్‌బస్టర్ హిట్స్ తన ఖాతాలో వేసుకున్నారు. గ్లామర్ పాత్రలకే పరిమితం కాకుండా మహిళా ప్రాధాన్యత ఉన్న కథలను ఎంచుకుంటూ బాక్సాఫీస్ వద్ద తన సత్తా చాటుకున్నారు. ఎన్నో ఒడిదుడుకులు, విమర్శలు ఎదుర్కొన్నప్పటికీ ఎక్కడా వెనక్కి తగ్గకుండా తనను తాను నిరంతరం కొత్తగా ఆవిష్కరించుకున్నారు.

ముఖ్యంగా 'చంద్రముఖి', 'గజిని' లాంటి ఇండస్ట్రీ హిట్స్ తర్వాత నయనతార రేంజ్ పూర్తిగా మారిపోయింది. వరుస విజయాలతో ఆమె టాప్ హీరోయిన్‌గా అవతరించారు. ఫిల్మ్ నగర్ సమాచారం ప్రకారం, ప్రస్తుతం ఆమె ఒక్కో సినిమాకు సుమారు రూ. 5 కోట్లు నుంచి రూ. 10 కోట్లు వరకు డిమాండ్ చేస్తున్నారు. బాలీవుడ్ కింగ్ ఖాన్ షారుఖ్ ఖాన్ సరసన నటించిన సంచలన చిత్రం 'జవాన్' కోసం ఆమె సుమారు రూ. 10 కోట్లు పారితోషికం అందుకున్నట్లు ట్రేడ్ వర్గాలు స్పష్టం చేశాయి. ఇక కన్నడ స్టార్ హీరో యశ్ సరసన భారీ బడ్జెట్‌తో తెరకెక్కిన పాన్ ఇండియా మూవీ 'టాక్సిక్' కోసం ఆమె ఏకంగా రూ. 18 కోట్లు తీసుకున్నట్లు వార్తలు వచ్చాయి.

సినిమాలతో పాటు వాణిజ్య ప్రకటనల ద్వారా కూడా నయనతారకు భారీగా ఆదాయం వస్తోంది. ఒక్కో యాడ్ కోసం ఆమె రూ. 5 కోట్లు వరకు వసూలు చేస్తున్నట్లు సమాచారం. వ్యాపార రంగంలో కూడా ఆమె భారీగా పెట్టుబడులు పెట్టారు. సొంత ప్రొడక్షన్ హౌస్ నడుపుతూ, స్కిన్ కేర్ బ్రాండ్ వ్యాపారాల్లో సైతం రాణిస్తున్నారు. స్థిరాస్తి రంగంలోనూ ఆమెకు భారీగా ఆస్తులు ఉన్నాయి. చెన్నైలోని అత్యంత ఖరీదైన పోయెస్ గార్డెన్ ప్రాంతంలో ఆమెకు సుమారు 16,500 చదరపు అడుగుల విస్తీర్ణంలో ఒక విలాసవంతమైన బంగ్లా ఉందని జాతీయ మీడియా ఓ కథనంలో తెలిపింది. అలాగే ప్రైవేట్ జెట్ కూడా ఆమె సొంతం చేసుకున్నారని వార్తలు వచ్చాయి. ఇలా ప్రస్తుతం లేడీ సూపర్ స్టార్ నయనతార మొత్తం నెట్ వర్త్ సుమారు రూ. 200 కోట్లు వరకు ఉంటుందని అంచనా వేస్తున్నారు. రూ. 2 వేలుతో మొదలైన ఆమె ప్రయాణం రూ. 200 కోట్లు స్థాయికి చేరడం నిజంగా అద్భుతమని నెటిజన్లు కామెంట్స్ చేస్తున్నారు.