Nandus World: ‘నందూస్ వరల్డ్’ రమా నందనపై చీటింగ్ కేసు.. డెస్టినీ కన్సల్టెన్సీ వీసా స్కామ్ గుట్టురట్టు!

Nandus World: ప్రముఖ యూట్యూబ్ ఛానెల్ ‘నందూస్ వరల్డ్’ (Nandu's World) ద్వారా రెండు తెలుగు రాష్ట్రాల నెటిజన్లకు సుపరిచితురాలైన రమా నందన, ఆమె భర్త మధుకర్ జాగర్లమూడి చుట్టూ వివాదాలు మరింతగా ముదురుతున్నాయి. యూకే వీసాల రెన్యూవల్, బ్రిటన్ జాబ్ స్పాన్సర్‌షిప్‌ల పేరుతో వీరు కోట్లాది రూపాయల మోసానికి పాల్పడ్డారంటూ వస్తున్న ఆరోపణల నేపథ్యంలో తాజాగా పోలీసుల దర్యాప్తు వేగవంతమైంది. ఎన్టీఆర్ జిల్లా ఇబ్రహీంపట్నం పోలీస్ స్టేషన్‌లో శివక్రాంతి కుమార్ అనే బాధితుడు ఇచ్చిన అధికారిక ఫిర్యాదు మేరకు పోలీసులు రమా నందన, ఆమె భర్త మధుకర్, మరియు మధుకర్ తండ్రిపై చీటింగ్ (F.I.R) కేసు నమోదు చేశారు.

బాధితులు మరియు పోలీసుల ప్రాథమిక దర్యాప్తు ప్రకారం ఈ వివాదానికి సంబంధించిన ముఖ్యమైన వివరాలు ఇవి:

నిందితులు రమా నందన, మధుకర్ దంపతులు ‘డెస్టినీ కన్సల్టెన్సీ’ (Destiny Consultancy) అనే సంస్థను నడుపుతున్నారు. దీని ద్వారానే వీరు వీసా వ్యవహారాలు సాగించినట్లు తేలింది. ఈ కన్సల్టెన్సీ ద్వారా యూకే వీసా రెన్యూవల్స్, బ్రిటన్ ఉద్యోగాల పేరిట తమ దగ్గర పెద్ద ఎత్తున డబ్బులు వసూలు చేసి, ఆ తర్వాత వీసాలు ఇప్పించకుండా ఘోరంగా మోసం చేశారని బాధితులు ఆవేదన వ్యక్తం చేస్తున్నారు.

ఈ కేసు తీవ్రతను పరిగణనలోకి తీసుకున్న ఇబ్రహీంపట్నం పోలీసులు, సదరు దంపతులు దేశం విడిచి పారిపోకుండా ఉండేందుకు ఇప్పటికే ‘లుక్‌అవుట్ నోటీసులు’ జారీ చేశారు. ప్రస్తుతం పరారీలో ఉన్న నిందితుల కోసం పోలీసులు ముమ్మరంగా గాలిస్తున్నారు.

మరోవైపు తమపై వస్తున్న తీవ్ర ఇమ్మిగ్రేషన్ ఫ్రాడ్ ఆరోపణలను రమా నందన ఒక వీడియో వేదికగా తీవ్రంగా ఖండించారు. సోషల్ మీడియాలో వైరల్ అవుతున్న ఈ వీడియోలో ఆమె తన వివరణ ఇచ్చుకున్నారు.

"సోషల్ మీడియాలో మాకున్న విపరీతమైన క్రేజ్, పాపులారిటీ చూసి ఓర్వలేక, వ్యక్తిగత కక్షలతో కొందరు కావాలనే ఇతరులకు డబ్బులు ఇచ్చి మాపై ఇలాంటి తప్పుడు ప్రచారం చేయిస్తున్నారు. మాకు ఎలాంటి మోసాలతో సంబంధం లేదు." తాము ఏ తప్పూ చేయలేదని నందన స్పష్టం చేసినప్పటికీ, పోలీస్ కేసు నమోదు కావడం మరియు లుక్ అవుట్ నోటీసులు జారీ కావడంతో ప్రస్తుతం ఈ వీసా స్కామ్ వివాదం తెలుగు సోషల్ మీడియా సర్కిల్స్‌తో పాటు ఇండస్ట్రీలోనూ తీవ్ర సంచలనంగా మారింది. కాగా, ర‌మా నంద‌న గతంలో మెగాస్టార్ చిరంజీవి న‌టించిన ‘మ‌న శంక‌ర వ‌ర‌ప్ర‌సాద్ గారు’ చిత్రంలో ఒక కీలక పాత్రలో న‌టించిన సంగతి తెలిసిందే. ఈ కేసులో పోలీసుల తదుపరి చర్యలు ఎలా ఉండబోతున్నాయనేది ఆసక్తికరంగా మారింది.