శ్రీదేవితో పోల్చడంపై జాన్వీ కపూర్ ఎమోషనల్ కామెంట్స్!

Janhvi Kapoor: బాలీవుడ్ బ్యూటీ జాన్వీ కపూర్, మెగా పవర్‌స్టార్ రామ్ చరణ్ సరసన నటించిన మోస్ట్ ఎవైటెడ్ రూరల్ స్పోర్ట్స్ డ్రామా ‘పెద్ది’ జూన్ 4న ప్రపంచవ్యాప్తంగా గ్రాండ్ రిలీజ్‌కు సిద్ధమవుతోంది. ‘దేవర’ చిత్రంతో టాలీవుడ్‌లోకి గ్రాండ్‌గా ఎంట్రీ ఇచ్చిన జాన్వీకి ఇది రెండో తెలుగు సినిమా. ఈ సినిమా ప్రమోషన్స్‌లో భాగంగా ఇచ్చిన ఒక ఇంటర్వ్యూలో, తన తల్లి.. దివంగత అతిలోక సుందరి శ్రీదేవి లెగసీ , తనపై ఉండే ప్రేక్షకుల అంచనాలపై జాన్వీ కపూర్ ఆసక్తికర వ్యాఖ్యలు చేశారు.

ఆ పోలిక ఒక అసాధ్యమైన విషయం!

నిరంతరం తనను తల్లి శ్రీదేవితో పోల్చడం ఒక భారంగా అనిపిస్తుందా? అనే ప్రశ్నకు జాన్వీ చాలా ప్రాక్టికల్‌గా సమాధానమిచ్చారు. "మనం ప్రాక్టికల్‌గా ఆలోచిద్దాం.. ‘ఈమె శ్రీదేవి అంత గొప్పగా నటించగలదా?’ అనే స్థాయిలో ఎవరూ నన్ను పోల్చడం లేదు. ఎందుకంటే ఆమెలా మారడం, ఆమె స్థాయిని అందుకోవడం ఎవరికీ సాధ్యం కాని పని అనేది ఒక జగమెరిగిన సత్యం" అని జాన్వీ స్పష్టం చేశారు.

అమ్మ జ్ఞాపకాలను సజీవంగా ఉంచుకోవడమే నా లక్ష్యం

శ్రీదేవి క్రియేట్ చేసిన లెగసీని తాను అందుకోగలనా? అనే సందేహాలు అందరిలోనూ ఉంటాయని, కానీ లోతుగా ఆలోచిస్తే అది కూడా అసాధ్యమైన విషయమేనని ఆమె పేర్కొన్నారు. "నా ప్రయత్నంల్లా ఒక్కటే.. నా శాయశక్తులా, పూర్తి నిజాయితీతో కష్టపడుతూ అమ్మ లెగసీని గౌరవించడం. నాకు వస్తున్న ఈ అద్భుతమైన అవకాశాలకు నేను ఎప్పుడూ కృతజ్ఞతతో ఉంటాను. నా పనిపైనే దృష్టి పెట్టి నా సర్వస్వాన్ని ఇస్తాను, ఎందుకంటే అది నాకు సంతోషాన్ని ఇస్తుంది. అంతేకాకుండా, నేను చేసే ఈ కష్టం అమ్మ జ్ఞాపకాలను నాలో ఎప్పటికీ సజీవంగా ఉంచుతుందని నేను నమ్ముతాను" అంటూ జాన్వీ ఎమోషనల్ అయ్యారు.

‘పెద్ది’తో టాలీవుడ్‌లో మరో సంచలనానికి రెడీ!

హిందీలో ‘హోమ్‌బౌండ్’, ‘పరమ్ సుందరి’, ‘సన్నీ సంస్కారీ కీ తులసి కుమారి’ వంటి వరుస చిత్రాల తర్వాత జాన్వీ కపూర్ నటిస్తున్న తెలుగు చిత్రం ఇదే కావడంతో టాలీవుడ్‌లో ఈమె క్రేజ్ నెక్స్ట్ లెవెల్‌కు చేరుకుంది. బుచ్చిబాబు సన మార్క్ ఇంటెన్స్ ఎమోషన్స్‌తో, ఏఆర్ రెహమాన్ మ్యూజిక్‌లో వస్తున్న ‘పెద్ది’ చిత్రం జూన్ 4న థియేటర్లలో ఎలాంటి రికార్డులు సృష్టిస్తుందో చూడాలి.