ANR: ఏఎన్నార్ చెప్పిన తెలివైన పోటీ రహస్యం...
సినిమా ఇండస్ట్రీలో పోటీ ఎలా ఉండాలో...భిన్నమైన పాత్రలతో ఎలా అభిమానులను సొంతం చేసుకోవాలో అక్కినేని చెప్పిన రహస్యం సోషల్ మీడియాలో వైరల్ అవుతోంది.
ANR: తెలుగు సినిమా స్వర్ణయుగంలో ఇద్దరు మహానుభావులు దశాబ్దాల పాటు పరిశ్రమను ఏలారు. వారే నటరత్న ఎన్టీ రామారావు, నటసామ్రాట్ అక్కినేని నాగేశ్వరరావు. నేటి తరం స్టార్ హీరోల మధ్య బాక్సాఫీస్ యుద్ధాలు, అభిమానుల మధ్య సోషల్ మీడియా ఘర్షణలు చూస్తున్నప్పుడు... నాడు ఏఎన్నార్ పాటించిన ‘తెలివైన పోటీ రహస్యం’ ప్రతి ఒక్కరికీ ఒక గొప్ప పాఠం. ఒకే కాలంలో ఇద్దరు అగ్ర హీరోలుగా ఉన్నప్పటికీ, ఒకరి స్థానాన్ని మరొకరు దెబ్బతీసుకోకుండా భిన్న పంధాలో ప్రయాణించి ఇద్దరూ నంబర్ వన్లుగా ఎలా నిలిచారో ఈనాటి సినిమా విశ్లేషణలో క్లియర్ కట్గా తెలుసుకుందాం.
అథ్లెటిక్స్ ఫార్ములా ... ఎన్టీఆర్ 100 మీటర్ల రన్నర్ అయితే, ఏఎన్నార్ 800 మీటర్లు!
అక్కినేని నాగేశ్వరరావు గతంలో ఒకసారి పోటీ గురించి ఒక అద్భుతమైన ఉదాహరణ చెప్పారు. క్రీడల్లో 100 మీటర్ల పరుగు పందెం రన్నర్ శైలి వేరుగా ఉంటుంది, అలాగే 800 మీటర్ల రన్నర్ శైలి వేరుగా ఉంటుంది. ఇద్దరి లక్ష్యం పరుగే అయినా, పరిగెత్తే విధానం వేరు. సినిమా రంగంలో కూడా తాము ఇదే సూత్రాన్ని పాటించామని ఆయన చెప్పారు. ఎన్టీఆర్ పౌరాణిక, జానపద పాత్రలతో భారీ కటౌట్లు, గంభీరమైన డైలాగులతో ప్రేక్షకులను అలరిస్తే... ఏఎన్నార్ మాత్రం తన శరీర దారుఢ్యానికి, హావభావాలకు నప్పే సాంఘిక, విరహ, భక్తిరస పాత్రలను ఎంచుకున్నారు. ఎన్టీఆర్ వేసే కృష్ణుడు, రాముడు పాత్రల కోసం ఏఎన్నార్ ఎప్పుడూ అర్రులు చాచలేదు. తన పరిధిని తాను గుర్తించి 'దేవదాసు', 'అనార్కలి', 'భక్త తుకారాం' వంటి చిత్రాలతో తనకంటూ ఒక ప్రత్యేక సామ్రాజ్యాన్ని సృష్టించుకున్నారు. దాదాపు 5 దశాబ్దాల పాటు వీరి మధ్య సాగిన ఈ ఆరోగ్యకరమైన పోటీ టాలీవుడ్కు బంగారు బాటలు వేసింది.
నేటి తరం స్టార్స్ తెలుసుకోవాల్సిన అసలు నిజం
ఈ రోజుల్లో వినోదం అంటే కేవలం వందల కోట్ల బడ్జెట్, విదేశాల్లో అందాల పాటలు, వయలెన్స్తో వణుకు పుట్టించే భారీ ఫైటింగులు మాత్రమే అనుకుంటున్నారు. కానీ, నిజమైన వినోదం అంటే ప్రేక్షకుడి మనసును కాసేపు హాయిగా మరో లోకానికి తీసుకెళ్లడం. ప్రతి హీరోకి ఒక విలక్షణమైన శైలి ఉంటుంది. ఒకరిని చూసి మరొకరు భారీ యాక్షన్ సినిమాలు చేయాల్సిన అవసరం లేదు. నాటి కాలంలో ఎన్టీఆర్, ఏఎన్నార్ అభిమానుల మధ్య పోటీ ఉండేది కానీ అది హద్దులు దాటలేదు. ఎందుకంటే హీరోల మధ్య అంతటి పారదర్శకత, గౌరవం ఉండేవి. తనకు నప్పే పాత్రలను మాత్రమే ఎంచుకుంటూ, పక్క హీరోతో కాకుండా తనతో తనే పోటీ పడటమే ఏఎన్నార్ చెప్పిన తెలివైన పోటీ రహస్యం. ఈ తరం స్టార్స్, అభిమానులు కూడా ఈ సూత్రాన్ని గుర్తిస్తే, సినిమా పరిశ్రమ మరింత ఆరోగ్యకరంగా ఎదుగుతుంది.
Balachander
బాలచందర్ పెళ్లూరి తెలుగు మీడియా రంగంలో 12 ఏళ్లకు పైగా అనుభవం కలిగిన సీనియర్ న్యూస్, పొలిటికల్, భక్తి కంటెంట్ రైటర్, ఎడిటర్. హైదరాబాద్ కేంద్రంగా టీవీ, డిజిటల్ జర్నలిజంలో పనిచేశారు. పొలిటికల్ విశ్లేషణ, ఆధ్యాత్మిక రచనల్లో నైపుణ్యం కలిగి, పొలిటికోస్, ఎన్టీవీ డిజిటల్, మల్లెమాల ఎంటర్టైన్మెంట్లో సేవలందించారు. ఎడిటోరియల్ లీడర్షిప్, కథనం చెప్పే శైలిలో ప్రత్యేక గుర్తింపు పొందారు.