Nagarkurnool: కేజీబీవీ విద్యార్థినులతో రాఖీ కట్టించుకున్న డీఈఓ రమేష్ కుమార్!

Nagarkurnool: రాఖీ పండుగను పురస్కరించుకుని తాడూర్ కస్తూర్బా గాంధీ బాలికల విద్యాలయం (కేజీబీవీ)లో శుక్రవారం రాఖీ వేడుకలను ఘనంగా నిర్వహించారు. ఈ సందర్భంగా కేజీబీవీ విద్యార్థినులు జిల్లా విద్యాశాఖ అధికారి రమేష్ కుమార్‌కు ఆత్మీయంగా రాఖీలు కట్టి పండుగ శుభాకాంక్షలు తెలిపారు.

విద్యార్థినులు ఎంతో ఆప్యాయతతో రాఖీలు కట్టడంతో డీఈఓ వారిని అభినందించారు. రాఖీ పండుగ సోదరభావం, ఆప్యాయత, పరస్పర గౌరవం, కుటుంబ విలువలను పెంపొందిస్తుందని తెలిపారు. విద్యార్థినులు ఉన్నత లక్ష్యాలను నిర్దేశించుకుని కష్టపడి చదివి జీవితంలో మంచి స్థాయికి ఎదగాలని ఆకాంక్షించారు.

వేడుకల అనంతరం డీఈఓ విద్యార్థినులతో ఆప్యాయంగా ముచ్చటించి వారి చదువు, పాఠశాలలో అందుతున్న విద్య, వసతులు, భోజనం తదితర అంశాలపై వివరాలు తెలుసుకున్నారు. విద్యార్థినులు ఎలాంటి ఇబ్బందులు లేకుండా చదువుకునేలా అవసరమైన సౌకర్యాలు కల్పించాలని అధికారులకు సూచించారు.

రాఖీ వేడుకలకు ప్రత్యేకతగా డీఈఓ రమేష్ కుమార్ విద్యార్థినులతో కలిసి మధ్యాహ్న భోజనం చేశారు. వారితో కలిసి భోజనం చేస్తూ వారి సాధకబాధకాలను తెలుసుకున్నారు. విద్యార్థినులతో అధికారులు, ఉపాధ్యాయులు ఆత్మీయంగా మెలిగినప్పుడే పాఠశాలలో ఆహ్లాదకరమైన విద్యా వాతావరణం ఏర్పడుతుందని పేర్కొన్నారు.

చదువుతో పాటు క్రమశిక్షణ, సమయపాలన, పట్టుదల వంటి మంచి విలువలను అలవర్చుకోవాలని డీఈఓ సూచించారు. తల్లిదండ్రులు, ఉపాధ్యాయులు తమపై ఉంచిన నమ్మకాన్ని నిలబెట్టేలా విద్యార్థినులు మంచి ఫలితాలు సాధించాలని ఆకాంక్షించారు.

కేజీబీవీల్లో చదువుతున్న బాలికలకు నాణ్యమైన విద్యతో పాటు సురక్షితమైన, ఆహ్లాదకరమైన వాతావరణం కల్పించేందుకు అవసరమైన చర్యలు తీసుకోవాలని, విద్యార్థినుల సమస్యలను ఎప్పటికప్పుడు తెలుసుకుని పరిష్కరించేందుకు కృషి చేయాలని సూచించారు. కార్యక్రమంలో ఇన్‌చార్జ్ డీఎస్‌వో శైలజ, కేజీబీవీ సిబ్బంది, ఉపాధ్యాయులు, విద్యార్థినులు పాల్గొన్నారు.