World Breastfeeding Week: త‌ల్లిపాలే శిశువుకు తొలి టీకా.. తల్లిపాల వారోత్సవం ఎలా ప్రారంభమైంది?

World Breastfeeding Week: ప్రతి సంవత్సరం ఆగస్టు 1 నుంచి 7 వరకు ప్రపంచ తల్లిపాల వారోత్సవం జరుపుకుంటారు. తల్లిపాల ప్రాముఖ్యతపై అవగాహన పెంచడం, కొత్త తల్లులకు అవసరమైన సహాయాన్ని అందించడం ఈ వారోత్సవం ప్రధాన లక్ష్యం.

తల్లిపాలను "శిశువుకు తొలి టీకా" అని అంటారు. ఇది కేవలం ఒక నినాదం మాత్రమే కాదు.. వైద్యపరంగా నిరూపితమైన నిజం. పుట్టిన వెంటనే తల్లి శరీరం ఉత్పత్తి చేసే కొలస్ట్రం (Colostrum) అనే పసుపు రంగు పాలు శిశువుకు తొలి రక్షణ కవచంలా పనిచేస్తాయి. శిశువుకు రోగనిరోధక శక్తి ఇంకా పూర్తిగా అభివృద్ధి చెందని సమయంలో ఈ పాలు ఎన్నో వ్యాధుల నుంచి కాపాడుతాయి.

2026 థీమ్ ఇదే..

ఈ ఏడాది ప్రపంచ తల్లిపాల వారోత్సవం థీమ్... "Breastfeeding for a Sustainable Start in Life: Strengthen What Worksష‌ అంటే... "ఆరోగ్యకరమైన భవిష్యత్తు కోసం తల్లిపాలను ప్రోత్సహిద్దాం.. ఇప్పటికే మంచి ఫలితాలు ఇస్తున్న వ్యవస్థలను మరింత బలోపేతం చేద్దాం" అనే సందేశాన్ని ఇస్తోంది. కొత్త పథకాలు తీసుకురావడం కంటే ఇప్పటికే పనిచేస్తున్న వ్యవస్థలను మరింత సమర్థవంతంగా మార్చాలని ఈ థీమ్ సూచిస్తోంది.

గ్రామీణ ఆరోగ్య కార్యకర్తలు, ఆస్పత్రులు, వైద్య సిబ్బంది, ఉద్యోగ ప్రదేశాల్లో తల్లులకు కల్పించే సౌకర్యాలు, కుటుంబ సభ్యుల సహకారం వంటి అంశాలను మరింత బలపరిస్తే ఎక్కువ మంది తల్లులు విజయవంతంగా బిడ్డలకు తల్లిపాలు ఇవ్వగలరని నిపుణులు చెబుతున్నారు. తల్లిపాలు ఇవ్వడం వల్ల శిశువు ఆరోగ్యమే కాదు... ఫార్ములా పాల వినియోగం తగ్గడం ద్వారా ప్లాస్టిక్ వ్యర్థాలు, ఉత్పత్తి వ్యయం కూడా తగ్గి పర్యావరణానికి మేలు జరుగుతుంది.

ప్రపంచ తల్లిపాల వారోత్సవం ఎలా ప్రారంభమైంది?

ప్రపంచ తల్లిపాల వారోత్సవాన్ని 1992లో వరల్డ్ అలయన్స్ ఫర్ బ్రెస్ట్‌ఫీడింగ్ యాక్షన్ (WABA) ప్రారంభించింది. దీనికి ప్రపంచ ఆరోగ్య సంస్థ (WHO), యూనిసెఫ్ (UNICEF) మద్దతు అందించాయి. ప్రతి ఏడాది ఆగస్టు 1 నుంచి 7 వరకు ఈ వారోత్సవాన్ని నిర్వహిస్తారు. ప్రతి సంవత్సరం ప్రత్యేక థీమ్‌ను ప్రకటించడం, ఆస్పత్రులు, ఆరోగ్య కేంద్రాలకు అవగాహన కార్యక్రమాలు రూపొందించడం, తల్లిపాల ప్రాధాన్యతపై ప్రచారం నిర్వహించడం వంటి కార్యక్రమాలను WHO, UNICEF సమన్వయం చేస్తుంటాయి. ఇందులో ముఖ్యంగా బేబీ ఫ్రెండ్లీ హాస్పిటల్ ఇనిషియేటివ్ ఎంతో కీలకం. ఇందులో ప్రసవం అనంతరం కొత్త తల్లులకు కేవలం కరపత్రాలు ఇవ్వడం కాకుండా... తల్లిపాలు ఎలా పట్టించాలి, శిశువుకు ఎలా ఇవ్వాలి అనే విషయాల్లో ప్రత్యక్షంగా శిక్షణ ఇస్తారు.

తల్లిపాలు శిశువుకు, తల్లికి ఎలా ఉపయోగపడతాయి?

తల్లిపాలు ప్రతి బిడ్డ అవసరాలకు అనుగుణంగా మారుతుంటాయి. ఒకసారి ఇచ్చే పాలలో ఉండే పోషకాలు, మరోసారి ఇచ్చే పాలలో ఉండేవాటికి కొంత తేడా ఉంటుంది. శిశువు ఎదుగుదలకు అనుగుణంగా తల్లి శరీరం స్వయంగా పాల నాణ్యతను మార్చుకుంటుంది. పుట్టిన వెంటనే వచ్చే కొలస్ట్రంలో అధికంగా యాంటీబాడీలు ఉంటాయి. ఇవి శిశువును విరేచనాలు, శ్వాసకోశ ఇన్ఫెక్షన్లు వంటి అనేక వ్యాధుల నుంచి రక్షిస్తాయి.

NFHS-5 (2019-21) గణాంకాల ప్రకారం భారత్‌లో ఆరు నెలల లోపు ఉన్న శిశువుల్లో కేవలం 63.7 శాతం మందికే పూర్తిగా తల్లిపాలు అందుతున్నాయి. పుట్టిన మొదటి గంటలో తల్లిపాలు తాగే శిశువుల సంఖ్య 41.8 శాతం మాత్రమే.

వైద్యులు దీనిని "గోల్డెన్ అవర్" అంటారు. ఈ సమయంలో తల్లిపాలు అందితే శిశువుకు ఎక్కువ రోగనిరోధక శక్తి లభిస్తుంది.

తల్లిపాలు శిశువుకే కాదు... తల్లి ఆరోగ్యానికీ ఎంతో మేలు చేస్తాయి.

తల్లిపాలు ఇస్తున్నప్పుడు విడుదలయ్యే ఆక్సిటోసిన్ హార్మోన్ వల్ల ప్రసవం తర్వాత గర్భాశయం త్వరగా సాధారణ స్థితికి చేరుతుంది. అధిక రక్తస్రావం తగ్గుతుంది. దీర్ఘకాలంలో చూస్తే తల్లిపాలు ఇచ్చే మహిళల్లో... రొమ్ము క్యాన్సర్ ప్రమాదం తగ్గుతుంది.

అండాశయ క్యాన్సర్ వచ్చే అవకాశం తగ్గుతుంది. టైప్-2 మధుమేహం ప్రమాదం తగ్గుతుంది. గుండె సంబంధిత వ్యాధుల ముప్పు కూడా తగ్గుతుందని పరిశోధనలు చెబుతున్నాయి. తల్లిపాలు ఆరు నెలలు పూర్తిగా ఇవ్వలేకపోయినా... శిశువుకు ఇచ్చే ప్రతి పాలిచ్చే సారి ప్రయోజనమే. ప్రతి రోజు, ప్రతి ఫీడ్ బిడ్డ ఆరోగ్యాన్ని మెరుగుపరుస్తుంది.

కొత్త తల్లులు ఎదుర్కొనే సమస్యలు..

తల్లిపాలు ఇవ్వడం సహజమైన ప్రక్రియే అయినప్పటికీ... మొదటి రోజుల్లో చాలా మంది తల్లులు అనేక ఇబ్బందులు ఎదుర్కొంటారు.

శిశువు సరిగా పాలు పట్టకపోవడం:

ఇది అత్యంత సాధారణ సమస్య. దీంతో తల్లికి నొప్పి, చనుమొనలు పగలడం, శిశువుకు సరిపడా పాలు అందకపోవడం జరుగుతుంది. ఇలాంటి సమయంలో సరైన విధంగా శిశువును పట్టించడం, అవసరమైతే లాక్టేషన్ కన్సల్టెంట్ సహాయం తీసుకోవడం మంచిది.

పాలు సరిపోవడం లేదనే ఆందోళన:

చాలా మంది తల్లులు తమకు పాలు తక్కువగా వస్తున్నాయని భావిస్తుంటారు. కానీ చాలా సందర్భాల్లో ఇది నిజం కాదు. వైద్యులు సూచించే విధంగా రోజుకు 8 నుంచి 12 సార్లు శిశువుకు పాలు ఇవ్వడం, తల్లి సరిపడా నీరు తాగడం, పోషకాహారం తీసుకోవడం, శిశువును తరచూ దగ్గరగా ఉంచడం వల్ల పాల ఉత్పత్తి మెరుగుపడుతుంది.

మానసిక ఒత్తిడి:

ప్రసవం తర్వాత అలసట, నిద్రలేమి, ఆందోళన, డిప్రెషన్ వంటి సమస్యలు తల్లిపాలపై ప్రభావం చూపుతాయి. అందుకే... భర్త సహకారం, కుటుంబ సభ్యుల ప్రోత్సాహం, ఉద్యోగ ప్రదేశంలో అనుకూల వాతావరణం, అవసరమైతే వైద్యులు, కౌన్సిలర్ల సహాయం. వీటన్నింటి వల్ల తల్లులు మరింత ఆత్మవిశ్వాసంతో శిశువుకు తల్లిపాలు ఇవ్వగలుగుతారు.