Lifestyle: మ‌హిళ‌ల‌కు పురుషుల కంటే ఎక్కువ నిద్ర ఎందుకు అవ‌స‌ర‌మో తెలుసా.?

Lifestyle: శరీరం, మెదడు ఆరోగ్యంగా ఉండాలంటే తగినంత నిద్ర చాలా అవసరం. నిద్ర సమయంలో శరీరానికి విశ్రాంతి లభించడంతో పాటు మెదడు కూడా రికవర్ అవుతుంది. అయితే ఇది మహిళలు, పురుషుల నిద్ర అవసరాల్లో కూడా స్వల్ప తేడా ఉండవచ్చని నిపుణులు చెబుతున్నారు.

మహిళలకు కొంత ఎక్కువ నిద్ర ఎందుకు అవసరం?

క్లెవిలాండ్ క్లినిక్ ప్రకారం, మహిళలకు పురుషుల కంటే కొద్దిగా ఎక్కువ నిద్ర అవసరం కావడానికి పలు కారణాలు ఉన్నాయి. ముఖ్యంగా హార్మోన్లలో మార్పులు, నిద్రలో అంతరాయాలు ఇందులో కీలక పాత్ర పోషిస్తాయి.

పీరియడ్స్ సమయంలో హార్మోన్ల మార్పులతో అసౌకర్యం, నొప్పి లేదా మూడ్ మార్పులు రావచ్చు. గర్భధారణ సమయంలో శారీరక మార్పులు, అసౌకర్యం వల్ల నిద్రకు అంతరాయం కలగవచ్చు. మెనోపాజ్ దశలో కూడా హార్మోన్ల మార్పుల కారణంగా నిద్ర సమస్యలు ఎదురయ్యే అవకాశం ఉంటుంది. ఇవన్నీ కలిపి చూస్తే మహిళలకు సగటున పురుషుల కంటే సుమారు 11 నిమిషాలు ఎక్కువ నిద్ర అవసరం కావచ్చు. అంటే తేడా చాలా పెద్దది కాదు. అసలు ముఖ్యమైన విషయం నిద్ర గంటల కంటే నిద్ర నాణ్యత అని నిపుణులు చెబుతున్నారు.

రాత్రిపూట నిద్ర మధ్యలో ఎందుకు మేల్కొంటారు?

మహిళల నిద్రను కేవలం హార్మోన్ల మార్పులే ప్రభావితం చేయవు. పిల్లల సంరక్షణ, ఇంటి బాధ్యతలు, రాత్రిపూట పిల్లల కోసం లేవాల్సి రావడం వంటి కారణాలు కూడా నిద్రకు ఆటంకం కలిగించవచ్చు. దీంతో మొత్తం నిద్ర సమయం సరిపడినట్లు కనిపించినా.. రాత్రంతా నిద్ర మధ్యలో పదేపదే మేల్కొంటే శరీరానికి పూర్తి విశ్రాంతి లభించకపోవచ్చు.

ఉదయం లేచిన తర్వాత కూడా అలసటగా అనిపించవచ్చు. ఎక్కువ కాలం నిద్ర సరిగా లేకపోతే చిరాకు, మూడ్‌లో మార్పులు, ఏకాగ్రత తగ్గడం వంటి సమస్యలు రోజువారీ జీవితాన్ని ప్రభావితం చేయవచ్చు. అందుకే ఎంతసేపు నిద్రపోయామన్నదే కాకుండా, నిద్ర ఎంత ప్రశాంతంగా, అంతరాయం లేకుండా సాగిందనేది కూడా ముఖ్యం.

మంచి నిద్ర కోసం ఏం చేయాలి?

నిద్ర నాణ్యతను మెరుగుపరుచుకోవడానికి కొన్ని సాధారణ అలవాట్లు ఉపయోగపడతాయి. ప్రతిరోజూ ఒకే సమయానికి నిద్రపోవడానికి, ఒకే సమయానికి నిద్రలేవడానికి ప్రయత్నించాలి. పడుకునే ముందు ఫోన్, ల్యాప్‌టాప్ వంటి స్క్రీన్‌ల వినియోగాన్ని తగ్గించాలి.

పడుకునే గదిలో ఎక్కువ వెలుతురు లేకుండా చూసుకోవాలి. సాయంత్రం తర్వాత టీ, కాఫీ వంటి కెఫీన్ ఉన్న పానీయాలను తగ్గించడం మంచిది. పగటిపూట కొంత శారీరక వ్యాయామం చేయాలి. నిద్రకు కొద్దిసేపటి ముందు తీవ్రమైన వ్యాయామం చేయకుండా ఉండటం మంచిది.

రాత్రి సమయంలో చాలా ఎక్కువగా లేదా భారంగా ఉండే ఆహారం తీసుకోకపోవడం మంచిది.

నిద్ర సమస్యలు ఉంటే ఎప్పుడు వైద్యుడిని సంప్రదించాలి?

అప్పుడప్పుడు నిద్రకు అంతరాయం కలగడం సాధారణమే. కానీ ఎక్కువ కాలం నిద్ర సరిగ్గా పట్టకపోవడం, రాత్రిపూట తరచూ మేల్కొనడం లేదా పగటిపూట విపరీతమైన అలసట ఉండటం వంటి సమస్యలు కొనసాగితే నిర్లక్ష్యం చేయకూడదు. ఇలాంటి పరిస్థితుల్లో వైద్యుడిని సంప్రదించి కారణాన్ని తెలుసుకోవడం మంచిది. ముఖ్యంగా హార్మోన్ల మార్పులు, ఒత్తిడి లేదా ఇతర ఆరోగ్య కారణాలు నిద్రను ప్రభావితం చేస్తున్నాయా అనే విషయాన్ని నిపుణులు పరిశీలించవచ్చు.