రాత్రి పాదాల వాపు గుండె సమస్యకు సంకేతమా? నిపుణుల హెచ్చరిక

రాత్రి వేళల్లో పాదాలు లేదా మడమలు తరచూ వాపుగా కనిపిస్తే దానిని సాధారణ సమస్యగా తీసుకోవద్దని వైద్య నిపుణులు హెచ్చరిస్తున్నారు. కొన్ని సందర్భాల్లో ఇది గుండె పనితీరు బలహీనపడుతున్న సంకేతం కావచ్చని సూచిస్తున్నారు.

వైద్యుల వివరాల ప్రకారం, గుండె శరీరమంతా రక్తాన్ని సమర్థంగా పంపించలేకపోతే శరీరంలోని ద్రవాలు కింది భాగాల్లో పేరుకుపోతాయి. దీంతో పాదాలు, మడమలు, కాళ్లలో వాపు (ఎడెమా) కనిపించే అవకాశం ఉంటుంది. రోజంతా నిలబడటం లేదా కూర్చోవడం వల్ల ఈ వాపు రాత్రి సమయానికి మరింత స్పష్టంగా కనిపించవచ్చని చెబుతున్నారు.

పాదాల వాపుతో పాటు కొద్దిదూరం నడిచినా ఆయాసం రావడం, శ్వాస తీసుకోవడంలో ఇబ్బంది, గుండె వేగంగా కొట్టుకోవడం, గుండెల్లో అసౌకర్యం, రాత్రిళ్లు నిద్ర పట్టకపోవడం వంటి లక్షణాలు కూడా ఉంటే వెంటనే వైద్యుడిని సంప్రదించాలని సూచిస్తున్నారు. ఇవి గుండె బలహీనత లేదా గుండె కవాటాల సమస్యలకు సంకేతాలు కావచ్చని నిపుణులు చెబుతున్నారు.

అయితే ప్రతి పాదాల వాపు గుండె సమస్యనే సూచించదని వైద్యులు స్పష్టం చేస్తున్నారు. కిడ్నీ వ్యాధులు, కాలేయ సమస్యలు, కొన్ని రకాల రక్తపోటు మందుల ప్రభావం వల్ల కూడా పాదాలు వాపే అవకాశం ఉందని పేర్కొంటున్నారు.

అందువల్ల పాదాల వాపు తరచుగా వస్తుంటే, ముఖ్యంగా గుండెకు సంబంధించిన ఇతర లక్షణాలు కూడా కనిపిస్తే ఆలస్యం చేయకుండా వైద్య పరీక్షలు చేయించుకోవడం మంచిదని నిపుణులు సూచిస్తున్నారు. ప్రారంభ దశలో సమస్యను గుర్తిస్తే చికిత్స సులభమవడంతో పాటు తీవ్రమైన గుండె సమస్యలను నివారించే అవకాశం ఉంటుందని తెలిపారు.

గమనిక: ఈ కథనం వైద్య నిపుణులు అందించిన సాధారణ ఆరోగ్య సమాచారం ఆధారంగా రూపొందించబడింది. ఆరోగ్య సమస్యలు లేదా లక్షణాలు ఉంటే స్వయంగా నిర్ణయాలు తీసుకోకుండా అర్హత కలిగిన వైద్యుడిని సంప్రదించండి.