Keto Diet Benefits: కీటో డైట్‌తో బరువు తగ్గడమే కాదు.. కాలేయానికీ మేలు?

Keto Diet Benefits: ఊబకాయం ఉన్నవారు బరువు తగ్గేందుకు ఎలాంటి డైట్‌ ఎంచుకోవాలనే దానిపై ఎన్నో సందేహాలు ఉంటాయి. తక్కువ కొవ్వు కలిగిన శాకాహార డైట్‌, మెడిటరేనియన్‌ డైట్‌, కీటోజెనిక్‌ డైట్‌.. ఇలా ఒక్కో విధానానికి ఒక్కో రకమైన ప్రయోజనాలు ఉన్నాయి. తాజాగా నిర్వహించిన ఓ చిన్న క్లినికల్‌ అధ్యయనం ఈ మూడు డైట్‌లను పోల్చి చూసింది. మూడు విధానాలతోనూ బరువు తగ్గే అవకాశం ఉన్నప్పటికీ.. కీటో డైట్‌ కాలేయం, రక్తంలో చక్కెర నియంత్రణకు సంబంధించి కొన్ని అదనపు ప్రయోజనాలు కలిగి ఉండొచ్చని పరిశోధకులు గుర్తించారు.

ఈ అధ్యయనంలో ప్రీడయాబెటిస్‌, ఫ్యాటీ లివర్‌ సమస్యలతో ఉన్న 55 మంది ఊబకాయం కలిగిన పెద్దలను పరిశీలించారు. డైటీషియన్ల మార్గదర్శకత్వంలో నిర్ణీత ఆహార ప్రణాళికలను అనుసరించిన వారిలో మూడు గ్రూపులూ ప్రారంభ బరువులో దాదాపు 10 శాతం వరకు తగ్గినట్లు గుర్తించారు. అయితే బరువు తగ్గడంలో మూడు డైట్‌ల మధ్య పెద్దగా తేడా కనిపించలేదు. అందుకే పరిశోధకులు కేవలం బరువు తగ్గడానికే కాకుండా.. శరీరంలోని జీవక్రియలో వచ్చిన మార్పులపై ప్రధానంగా దృష్టి పెట్టారు.

మూడు డైట్‌లను అనుసరించిన వారిలో కండరాల్లో ఇన్సులిన్‌ సున్నితత్వం మెరుగుపడినట్లు గుర్తించారు. కొలెస్ట్రాల్‌ స్థాయుల్లో వచ్చిన మార్పులు కూడా చాలా వరకు ఒకే విధంగా ఉన్నాయి. అయితే కీటోజెనిక్‌ డైట్‌ తీసుకున్న వారిలో కాలేయానికి సంబంధించిన కొన్ని ప్రయోజనకరమైన మార్పులు ప్రత్యేకంగా కనిపించాయి.

కీటో డైట్‌ వల్ల కాలేయంలో పేరుకుపోయిన కొవ్వు తగ్గడంతో పాటు.. కాలేయం ట్రైగ్లిజరైడ్లను ఉత్పత్తి చేసే విధానంలోనూ మార్పులు వచ్చినట్లు పరిశోధకులు గుర్తించారు. అలాగే కాలేయం ఇన్సులిన్‌కు స్పందించే సామర్థ్యం మెరుగుపడినట్లు తేలింది. కీటో డైట్‌ తీసుకున్న వారిలో దాదాపు సగం మందిలో ప్రీడయాబెటిస్‌ ప్రమాణాలు కూడా కనిపించలేదని అధ్యయనం పేర్కొంది.

అయితే మూడు డైట్‌ల మధ్య తేడాలను అర్థం చేసుకోవాలంటే వాటి ఆహార విధానాలను కూడా గమనించాలి. మెడిటరేనియన్‌ డైట్‌లో చేపలు, చికెన్‌, పప్పుధాన్యాలు, గింజలు, విత్తనాలు, ఆలివ్‌ ఆయిల్‌కు ప్రాధాన్యం ఉంటుంది. మొక్కల ఆధారిత శాకాహార డైట్‌లో పప్పులు, ధాన్యాలు, పండ్లు, కూరగాయలు ప్రధానంగా ఉంటాయి. కీటో డైట్‌లో కార్బోహైడ్రేట్లను చాలా తక్కువగా తీసుకుంటూ కొవ్వు, ప్రోటీన్‌ అధికంగా ఉండే ఆహారాలకు ప్రాధాన్యం ఇస్తారు.

అయితే ఈ అధ్యయనం పరిమిత స్థాయిలోనే జరిగింది. పాల్గొన్నవారి సంఖ్య తక్కువగా ఉండటంతో పాటు పరిశోధన వ్యవధి కూడా తక్కువే. కాబట్టి కీటో డైట్‌ వల్ల దీర్ఘకాలంలో కలిగే ఆరోగ్య ప్రయోజనాలు లేదా నష్టాలపై ఇప్పుడే తుది నిర్ణయానికి రావడం సరికాదని నిపుణులు చెబుతున్నారు. అంతేకాదు, శరీర కొవ్వును తగ్గించడంతో పాటు కండరాలు, ఎముకలతో కూడిన కొవ్వు రహిత ద్రవ్యరాశిని కాపాడటంలో మెడిటరేనియన్‌ విధానం మెరుగ్గా ఉన్నట్లు కూడా పరిశోధనలో తేలింది.

మొత్తంగా చూస్తే.. బరువు తగ్గడం ఒక్కటే మంచి డైట్‌కు కొలమానం కాదని ఈ పరిశోధన మరోసారి స్పష్టం చేస్తోంది. కీటో డైట్‌ కొందరిలో కాలేయ ఆరోగ్యం, ఇన్సులిన్‌ సున్నితత్వం, రక్తంలో చక్కెర నియంత్రణకు ఉపయోగపడే అవకాశం ఉన్నప్పటికీ.. ప్రతి ఒక్కరికీ ఇదే సరైన విధానం అని చెప్పలేం. డైట్‌ మార్చే ముందు వ్యక్తిగత ఆరోగ్య పరిస్థితులు, అవసరాలు, ఆహార అలవాట్లను పరిగణనలోకి తీసుకుని వైద్యుడు లేదా అర్హత కలిగిన పోషకాహార నిపుణుడి సలహా తీసుకోవడం మంచిది.