Aadhaar Card: మీ ఆధార్ దుర్వినియోగం అవుతుందా? నిమిషాల్లో ఇలా తెలుసుకోండి!

Aadhaar Card: ప్రస్తుత డిజిటల్ కాలంలో ఆధార్ కార్డు కేవలం ఒక కాగితం ముక్క కాదు. అది మన ఉనికికి నిదర్శనం. బ్యాంకు ఖాతా నుంచి సిమ్ కార్డు వరకు ప్రతిదానికీ ఆధార్ కీలకం. అయితే, మీ అనుమతి లేకుండా ఎవరైనా మీ ఆధార్‌ను వాడుతున్నారా అనే అనుమానం ఉందా? భారత విశిష్ట గుర్తింపు ప్రాధికార సంస్థ (UIDAI) కల్పిస్తున్న తాజా సదుపాయంతో మీ ఆధార్ అథంటికేషన్ హిస్టరీని మీరే స్వయంగా తనిఖీ చేసుకోవచ్చు.

మనం ఏదైనా పని నిమిత్తం ఆధార్ కార్డును గుర్తింపుగా సమర్పించినప్పుడు లేదా వేలిముద్రలు, కంటిపాప స్కానింగ్ (ఐరిస్), ఓటీపీ (OTP) ద్వారా ధృవీకరణ చేసినప్పుడు ఒక డిజిటల్ రికార్డు తయారవుతుంది. దీనినే 'ఆధార్ అథెంటికేషన్ హిస్టరీ' అంటారు. ఇందులో గత ఆరు నెలల కాలంలో మీ ఆధార్ కార్డును ఎప్పుడు, ఎక్కడ, ఏ అవసరం కోసం ఉపయోగించారో పూర్తి వివరాలు నిక్షిప్తమై ఉంటాయి. దీనివల్ల కార్డు దుర్వినియోగాన్ని అరికట్టవచ్చు.

ఇంట్లోనే ఉండి తనిఖీ చేసే విధానం..

మీ ఆధార్ భద్రత గురించి ఆందోళన చెందాల్సిన అవసరం లేదు. స్మార్ట్‌ఫోన్ ద్వారా కేవలం రెండు నిమిషాల్లో పూర్తి వివరాలను తెలుసుకోవచ్చు. ఇందుకోసం మీరు 'ఎమ్ ఆధార్' (mAadhaar) అనే అధికారిక యాప్‌ను వినియోగించాల్సి ఉంటుంది. ఈ ప్రక్రియ ద్వారా మీ బయోమెట్రిక్స్ ఎక్కడైనా తప్పుగా వాడబడ్డాయో లేదో స్పష్టంగా తెలుస్తుంది.

అంచెల వారీగా తెలుసుకునే పద్ధతి..

యాప్ డౌన్లోడ్: మొదట మీ ఫోన్‌లో గూగుల్ ప్లే స్టోర్ లేదా యాపిల్ యాప్ స్టోర్ నుంచి అధికారిక ఎమ్ ఆధార్ యాప్‌ను డౌన్లోడ్ చేసుకోండి.

లాగిన్ ప్రక్రియ: యాప్‌లో మీ ఆధార్ సంఖ్యను నమోదు చేయండి. మీ మొబైల్ నంబర్‌కు వచ్చే ఓటీపీ ద్వారా లాగిన్ అవ్వండి. భద్రత కోసం నాలుగు అంకెల పిన్ సెట్ చేసుకోండి.

మై ఆధార్ విభాగం: హోమ్ పేజీలో 'మై ఆధార్' అనే ట్యాబ్‌పై క్లిక్ చేసి, మీ పిన్ నమోదు చేయండి.

సెక్యూరిటీ ఆప్షన్: అక్కడ మీకు అనేక రకాల సేవలు కనిపిస్తాయి. అందులో 'ఆధార్ అథెంటికేషన్ హిస్టరీ' అనే ఆప్షన్‌ను ఎంచుకోండి.

తేదీ ఎంపిక: మీరు ఏ కాలానికి సంబంధించిన వివరాలు చూడాలనుకుంటున్నారో ఆ తేదీలను నమోదు చేస్తే, పూర్తి నివేదిక మీ కళ్ల ముందు ఉంటుంది.

అప్రమత్తత అవసరం..

ఒకవేళ మీ జాబితాలో మీరు చేయని ధృవీకరణ ఏదైనా కనిపిస్తే, వెంటనే యూఐడీఏఐ హెల్ప్‌లైన్ నంబర్ 1947కు ఫిర్యాదు చేయవచ్చు. అంతేకాకుండా, యాప్ ద్వారానే మీ బయోమెట్రిక్స్‌ను లాక్ చేసే సదుపాయం కూడా ఉంది. దీనివల్ల మీ అనుమతి లేకుండా ఎవరూ మీ వేలిముద్రలను వినియోగించలేరు.