Kitchen Hacks: రోజూ వాడే వస్తువులు ఎప్పుడు మార్చాలి? ఇవి కచ్చితంగా తెలుసుకోవాల్సిందే!

Kitchen Hacks: మనం నిత్యం ఉపయోగించే వ్యక్తిగత, ఇంటిలో వాడే వస్తువుల పరిశుభ్రత విషయంలో చాలామంది తీవ్ర నిర్లక్ష్యం ప్రదర్శిస్తుంటారు. చూడటానికి బాగానే ఉన్నాయి కదా అని పాత వస్తువులనే నెలల తరబడి వాడుతుంటారు. కానీ కాలం చెల్లిన వస్తువులను ఎక్కువ కాలం వాడటం వల్ల మనకు తెలియకుండానే లక్షలాది బ్యాక్టీరియా, ఫంగస్ క్రిములు శరీరంలోకి ప్రవేశిస్తాయి. సరైన సమయంలో వాటిని మార్చకపోతే దీర్ఘకాలిక ఇన్ఫెక్షన్లు, తీవ్రమైన చర్మ రోగాలు, జీర్ణకోశ సమస్యలు వచ్చే ప్రమాదం ఉంది. ఇలాంటి అనారోగ్యాలు తలెత్తినప్పుడు చికిత్స నిమిత్తం ఆసుపత్రుల చుట్టూ తిరుగుతూ వృథాగా డబ్బులు ఖర్చు చేయాల్సి వస్తుంది. అందుకే ప్రతి ఒక్కరూ నిత్యం వాడే వస్తువుల వినియోగ పరిమితిని తెలుసుకోవడం ఎంతో ముఖ్యం.

నోటి ఆరోగ్యాన్ని కాపాడుకోవడంలో టూత్ బ్రష్ పాత్ర ఎంతో కీలకం. సాధారణంగా టూత్ బ్రష్‌ను ప్రతి 3 నెలలకు ఒకసారి తప్పనిసరిగా మార్చాలని వైద్యులు స్పష్టం చేస్తున్నారు. అంతకంటే ఎక్కువ కాలం వాడితే బ్రష్ బ్రిసిల్స్ అరిగిపోయి వంగిపోతాయి. దీనివల్ల పళ్ల మధ్య పేరుకుపోయే ఆహార వ్యర్థాలు, పాచి సరిగ్గా శుభ్రపడవు. పైగా బాత్‌రూమ్‌లో ఉండే తేమ కారణంగా బ్రష్‌పై బ్యాక్టీరియా వేగంగా వృద్ధి చెందుతుంది. ఏదైనా ఇన్ఫెక్షన్ లేదా జ్వరం వచ్చినప్పుడు తగ్గిన వెంటనే పాత బ్రష్ స్థానంలో కొత్తది వాడటం ఎంతో శ్రేయస్కరం.

వంటింట్లో పాత్రలు తోమడానికి ఉపయోగించే కిచెన్ స్పాంజ్ విషయంలో మరింత అప్రమత్తంగా ఉండాలి. కిచెన్ స్పాంజ్‌ను ప్రతి 1-2 వారాలకు ఒకసారి పడేసి కొత్తది వాడాలి. ఎప్పుడూ తడిగా ఉండే స్పాంజ్ ప్రమాదకరమైన బ్యాక్టీరియా కేంద్రంగా మారుతుంది. ఆహార పదార్థాల ద్వారా ఆ విషపూరిత సూక్ష్మక్రిములు కడుపులోకి చేరితే తీవ్రమైన ఫుడ్ పాయిజనింగ్, వాంతులు, విరేచనాలు లాంటి సమస్యలు వస్తాయి.

శరీరాన్ని తుడుచుకునే బాత్ టవల్ విషయంలో సరైన జాగ్రత్తలు తీసుకోకపోతే చర్మ సమస్యలు తప్పవు. బాత్ టవల్‌ను కనీసం ప్రతి 3 రోజులకొకసారి మంచి డిటర్జెంట్‌తో శుభ్రంగా ఉతకాలి. ఉతికిన తర్వాత వాటిని ఎండలో ఆరబెట్టాలి. ఎంత శుభ్రంగా ఉతికినా సరే ఒకే టవల్‌ను 6 నెలల కంటే ఎక్కువ కాలం వాడకూడదు. ప్రతి 6 నెలలకొకసారి పాత టవల్ తీసేసి కొత్త బాత్ టవల్ వాడటం మొదలుపెట్టాలి. అలాగే అండర్‌వేర్‌ను ప్రతి 6 నెలలకు ఒకసారి మార్చడం మంచిది. నిరంతరం వాడటం వల్ల ఫ్యాబ్రిక్ నాణ్యత క్షీణించి క్రిములను నిలువరించే శక్తి తగ్గుతుంది. పాతబడిన లోదుస్తులు వాడితే ప్రైవేట్ భాగాల్లో దురద, అలర్జీ, ఫంగల్ ఇన్ఫెక్షన్లు వచ్చే ప్రమాదం పొంచి ఉంది.

మనం నిద్రపోయే సమయంలో ఉపయోగించే పిల్లో కవర్లను ప్రతి 3 రోజులకొకసారి ఉతికి శుభ్రంగా ఉంచుకోవాలి. పడుకున్నప్పుడు ముఖం మీది నూనె, చెమట, చనిపోయిన చర్మ కణాలు దిండు కవర్లకు అంటుకుంటాయి. వాటిని క్రమం తప్పకుండా ఉతక్కపోతే ముఖంపై తీవ్రమైన మొటిమలు, తలలో చుండ్రు, ఊపిరితిత్తుల సమస్యలు వస్తాయి. ఈ వస్తువులను మార్చడానికి తక్కువగా ఖర్చు చేయడం పెద్ద భారం కాదు. కానీ రోగాల బారిన పడితే చికిత్సల కోసం భారీగా డబ్బులు వెచ్చించాల్సి వస్తుంది. కాబట్టి పరిశుభ్రత నిబంధనలు పాటిస్తూ సరైన సమయంలో వస్తువులను మార్చుకోవడం చాలా అవసరం.