7 రోజులు చాలు.. బాల్కనీలోనే తాజా ఆకుకూరలు పెంచుకోవచ్చు
బాల్కనీలోనే బ్రోకలీ, ఆవాలు, ముల్లంగి, తోటకూర మైక్రోగ్రీన్స్ను సులభంగా పెంచుకోవచ్చు. కొన్ని రకాలు 7-10 రోజుల్లో కోతకు వస్తాయి.
Balcony Gardening
ఇంట్లోనే ఆరోగ్యకరమైన ఆకుకూరలు పెంచుకోవాలని చాలామంది కోరుకుంటారు. అయితే స్థలం, సమయం, నిర్వహణ వంటి కారణాలతో అది సాధ్యం కాకపోవచ్చు. అలాంటి వారికి మైక్రోగ్రీన్స్ మంచి ప్రత్యామ్నాయంగా మారుతున్నాయి. వీటిని బాల్కనీ లేదా ఇంట్లో తక్కువ స్థలంలోనే పెంచుకోవచ్చు. ఆవాలు, ముల్లంగి, తోటకూర, సన్ఫ్లవర్, బ్రోకలీ వంటి విత్తనాల నుంచి మైక్రోగ్రీన్స్ పెంచుకోవచ్చు.
ముఖ్యంగా కొన్ని రకాల మైక్రోగ్రీన్స్ విత్తనాలు వేసిన వారం నుంచి పది రోజుల్లోనే కోతకు సిద్ధమవుతాయి. వీటిని సలాడ్లు, శాండ్విచ్లు, ఇతర వంటకాల్లో ఉపయోగించుకోవచ్చు.
బ్రోకలీ మైక్రోగ్రీన్స్
బ్రోకలీ విత్తనాలు మొలకెత్తిన తర్వాత సుమారు 8 నుంచి 10 రోజుల్లో మైక్రోగ్రీన్స్ కోతకు వస్తాయి. వీటిలో విటమిన్లు, యాంటీఆక్సిడెంట్ సమ్మేళనాలు ఉంటాయి. ముఖ్యంగా సల్ఫోరాఫేన్ అనే సమ్మేళనం ఉండటంతో వీటిపై పరిశోధనలు జరిగాయి.
బ్రోకలీ మైక్రోగ్రీన్స్ను క్యాబేజీ, క్యారెట్, నిమ్మరసంతో కలిపి సలాడ్గా తీసుకోవచ్చు.
ఆవాల మైక్రోగ్రీన్స్
ఆవాల గింజల నుంచి పెంచే మైక్రోగ్రీన్స్ సాధారణంగా వారం నుంచి 15 రోజుల్లో కోతకు సిద్ధమవుతాయి. వీటికి స్వల్పంగా ఘాటు రుచి ఉంటుంది. విటమిన్లు, ఖనిజాలు వంటి పోషకాలు వీటిలో లభిస్తాయి.
కీరా, టమోటా, నిమ్మరసం, కొద్దిగా ఉప్పు, మిరియాల పొడితో కలిపి సలాడ్గా తీసుకోవచ్చు.
ముల్లంగి మైక్రోగ్రీన్స్
ముల్లంగి విత్తనాల నుంచి పెంచే మైక్రోగ్రీన్స్ సుమారు వారం నుంచి పది రోజుల్లో కోతకు వస్తాయి. వీటికి స్వల్పంగా ఘాటు రుచి ఉంటుంది. విటమిన్ సీ, పొటాషియం, యాంటీఆక్సిడెంట్ సమ్మేళనాలు వీటిలో ఉంటాయి.
కాండం ఎరుపు లేదా గులాబీ రంగులో ఉండటం వల్ల సలాడ్లకు ఆకర్షణీయమైన రూపాన్ని ఇస్తాయి. ఉడికించిన శనగలు, పచ్చిబఠానీలతో కలిపి తినవచ్చు.
సన్ఫ్లవర్ మైక్రోగ్రీన్స్
సన్ఫ్లవర్ మైక్రోగ్రీన్స్ కొద్దిగా తీపి రుచితో, పాలకూరను పోలిన ఆకృతితో ఉంటాయి. వీటిలో విటమిన్లు, ఖనిజాలు, ప్రొటీన్ వంటి పోషకాలు ఉంటాయి.
పనీర్ లేదా టోఫు, అవకాడోతో కలిపి సలాడ్ తయారు చేసుకోవచ్చు.
తోటకూర మైక్రోగ్రీన్స్
తోటకూర విత్తనాల నుంచి పెంచే మైక్రోగ్రీన్స్ సుమారు రెండు వారాల్లో కోతకు సిద్ధమవుతాయి. వీటిలో విటమిన్లు, ఐరన్, యాంటీఆక్సిడెంట్ సమ్మేళనాలు ఉంటాయి. ఎరుపు, మెజెంటా రంగుల్లో కనిపించే ఈ లేత మొక్కలు సలాడ్లకు మంచి రంగును ఇస్తాయి.
స్వీట్ కార్న్, ఉల్లిపాయ, కొద్దిగా మిరియాల పొడి, నిమ్మరసంతో కలిపి తీసుకోవచ్చు.
ఇంట్లో పెంచేటప్పుడు జాగ్రత్తలు
మైక్రోగ్రీన్స్ను ఇంట్లో పెంచేటప్పుడు శుభ్రమైన విత్తనాలు, పరిశుభ్రమైన పెంచే మాధ్యమం, తగినంత వెలుతురు, నీటి పారుదల ఉండేలా చూసుకోవాలి. కోతకు వచ్చిన తర్వాత కూడా వాటిని శుభ్రంగా కడిగి ఉపయోగించడం మంచిది. ఏదైనా ప్రత్యేక ఆరోగ్య ప్రయోజనం కోసం వీటిని తీసుకోవాలనుకుంటే నిపుణుల సలహా తీసుకోవడం మంచిది.