Krishna: కృష్ణా జిల్లా కానూరులో ఫైనాన్స్ ఉద్యోగిపై దాడి, కిడ్నాప్ కలకలం.. సీసీటీవీలో రికార్డైన దృశ్యాలు

కానూరు: కృష్ణ జిల్లాలోని కానూరులో టూ వీలర్ ఫైనాన్స్ కంపెనీ ఉద్యోగిపై కొంతమంది యువకులు దాడికి పాల్పడిన ఘటన తీవ్ర కలకలం రేపింది. కానూరులోని దివ్య సాయి టూ వీలర్ ఫైనాన్స్ కంపెనీలో పనిచేస్తున్న చోడవరపు వికీల్ అనే దళిత యువకుడిపై దాడి జరిగినట్లు ఫిర్యాదు అందింది.

ఫైనాన్స్ బకాయిలకు సంబంధించి వినియోగదారులకు ఫోన్ చేయడంపై వివాదం తలెత్తినట్లు సమాచారం. ఈ క్రమంలో కొంతమంది యువకులు ఫైనాన్స్ కంపెనీ వద్దకు చేరుకుని సిబ్బందితో వాగ్వాదానికి దిగినట్లు తెలుస్తోంది.

వివాదం మరింత ముదిరి, వికీల్‌ను బలవంతంగా కారులో ఎక్కించుకుని అక్కడి నుంచి తీసుకెళ్లి దాడి చేసినట్లు బాధితుడు పోలీసులకు ఇచ్చిన ఫిర్యాదులో పేర్కొన్నాడు. ఈ ఘటన స్థానికంగా తీవ్ర చర్చనీయాంశంగా మారింది.

వెలుగులోకి వచ్చిన CCTV దృశ్యాలు

ఈ ఘటనకు సంబంధించిన CCTV దృశ్యాలు ప్రస్తుతం వెలుగులోకి రావడంతో అసలు ఏం జరిగిందన్న దానిపై ఆసక్తి నెలకొంది. CCTVలో కొంతమంది వ్యక్తులు యువకుడితో వాగ్వాదానికి దిగడం, అనంతరం అతడిని కారులోకి ఎక్కించుకుని తీసుకెళ్లిన దృశ్యాలు ఉన్నట్లు తెలుస్తోంది.

దాడికి గురైన వికీల్ పోలీస్ స్టేషన్‌లో ఫిర్యాదు చేయడంతో పోలీసులు కేసుపై దర్యాప్తు ప్రారంభించారు. CCTV ఫుటేజీని పూర్తిస్థాయిలో పరిశీలించి, దాడికి పాల్పడిన వ్యక్తులను గుర్తించి కఠినమైన చట్టపరమైన చర్యలు తీసుకోవాలని బాధితుడు డిమాండ్ చేస్తున్నాడు.

ఫైనాన్స్ బకాయిల విషయంలో తలెత్తిన వివాదం దాడికి దారితీసిందా? యువకుడిని కారులోకి ఎక్కించి తీసుకెళ్లడం వెనుక అసలు కారణమేంటి? అనే కోణాల్లో పోలీసులు దర్యాప్తు చేస్తున్నారు. CCTV ఆధారంగా నిందితులను గుర్తించి కఠిన చర్యలు తీసుకోవాలని బాధితుడి కుటుంబ సభ్యులు, స్థానికులు కోరుతున్నారు.