Choppadandi: రౌడీ షీటర్లకు గ్రీన్ కౌన్సిలింగ్: కరీంనగర్ పోలీసుల వినూత్న ప్రయోగం!

కరీంనగర్ జిల్లా: చొప్పదండి నియోజకవర్గంలో పోలీసులు సరికొత్త కార్యక్రమానికి శ్రీకారం చుట్టారు. గంగాధర మండల పోలీస్ స్టేషన్ ఆవరణలో రౌడీ షీటర్లతో మొక్కలు నాటించి, వారిలో మార్పు తీసుకువచ్చేందుకు వినూత్నంగా కౌన్సిలింగ్ నిర్వహించారు.

గంగాధర మండల పోలీస్ స్టేషన్ ఆవరణలో స్థానిక పోలీసులు రౌడీ షీటర్లతో కలిసి హరితహారంలో భాగంగా మొక్కలు నాటించారు. కేవలం నేరాలను అదుపు చేయడమే కాకుండా, నేరస్థుల్లో పరివర్తన తీసుకురావడమే లక్ష్యంగా పోలీసులు ఈ కార్యక్రమాన్ని చేపట్టారు. పోలీస్ స్టేషన్ పరిధిలోని రౌడీ షీటర్లను పిలిపించి, పర్యావరణ పరిరక్షణలో వారిని భాగస్వాములను చేస్తూ మొక్కలు నాటించారు.

ఈ సందర్భంగా పోలీస్ అధికారులు రౌడీ షీటర్లకు కీలక అవగాహన కల్పించారు. సమాజంలో శాంతియుతంగా నడుచుకోవాలని, గొడవలకు దూరంగా ఉంటూ బాధ్యతాయుతమైన పౌరులుగా జీవించాలని సూచించారు.

"మీ ప్రవర్తనలో మార్పు వస్తే.. మీపై ఉన్న రౌడీ షీట్లను, కేసులను కొట్టివేసే (తొలగించే) అవకాశాలు ఉన్నాయి. సమాజంలో శాంతిభద్రతలకు విఘాతం కలిగిస్తే చట్టపరంగా కఠిన చర్యలు తప్పవు. కాబట్టి గతాన్ని మర్చిపోయి, సత్ప్రవర్తనతో సమాజంలో మంచి గుర్తింపు తెచ్చుకోవాలి."

​ఈ వినూత్న కౌన్సిలింగ్ కార్యక్రమం ద్వారా రౌడీ షీటర్లలో మార్పు వస్తుందని, వారు నేరాలకు దూరంగా ఉంటారని పోలీసులు ఆశాభావం వ్యక్తం చేశారు. ఈ కార్యక్రమంలో గంగాధర స్థానిక పోలీస్ స్టేషన్ సిబ్బంది, కానిస్టేబుళ్లు, పాల్గొన్నారు.