Karimnagar: నిరాశ్రయుల ఆశ్రమంలో మెప్మా పీడీ తనిఖీ.. ఎవరూ వీధుల్లో నిద్రించవద్దని ఆదేశం!
Karimnagar: కరీంనగర్ మెప్మా పీడీ జి. స్వరూప రాణి నిరాశ్రయుల ఆశ్రమ కేంద్రాన్ని సందర్శించారు. అక్కడ సౌకర్యాలను పరిశీలించి, రాత్రి వేళల్లో నిరాశ్రయులను గుర్తించి షెల్టర్కు తరలించాలని సూచించారు.
Karimnagar: నిరాశ్రయుల ఆశ్రమంలో మెప్మా పీడీ తనిఖీ.. ఎవరూ వీధుల్లో నిద్రించవద్దని ఆదేశం!
కరీంనగర్: పట్టణ పేదరిక నిర్మూలన సంస్థ (MEPMA) ప్రాజెక్ట్ డైరెక్టర్ జి. స్వరూప రాణి, పట్టణ నిరాశ్రయుల కోసం నిర్వహిస్తున్న షెల్టర్ ఫర్ అర్బన్ హోంలెస్ (SUH) ను సందర్శించారు.
ఈ సందర్భంగా ఆమె షెల్టర్లో అందిస్తున్న సౌకర్యాలను పరిశీలించారు. ముఖ్యంగా నివాస ఏర్పాట్లు, పరిశుభ్రత, త్రాగునీరు, విద్యుత్, మరుగుదొడ్లు, భద్రత వంటి అంశాలపై సమగ్రంగా సమీక్షించారు. రాత్రి సమయంలో సుమారు 25–30 మంది నిరాశ్రయులు షెల్టర్లో నివసిస్తున్నట్లు గమనించారు.
ప్రాజెక్ట్ డైరెక్టర్ అక్కడ నివసిస్తున్న నిరాశ్రయులతో నేరుగా మాట్లాడి, వారి సమస్యలు, అవసరాలు, ఆరోగ్య పరిస్థితులు తెలుసుకున్నారు.
షెల్టర్ నిర్వహణలో భాగస్వామ్యంగా ఉన్న ఎన్జీఓ ప్రతినిధులతో కూడా సమావేశమై, సేవల నాణ్యతను మరింత మెరుగుపరచాలని సూచించారు. నిరాశ్రయులకు సురక్షిత వాతావరణం కల్పించడం, అవసరమైన అన్ని మౌలిక సదుపాయాలు నిరంతరం అందుబాటులో ఉండేలా చూడాలని తెలిపారు.
అంతేకాకుండా, రాత్రి సమయంలో మరింత మంది నిరాశ్రయులను గుర్తించి షెల్టర్కు చేర్చేలా ప్రత్యేక డ్రైవ్ నిర్వహించాలని సూచించారు. నగరంలో ఎవరూ వీధుల్లో నిద్రించకుండా చూడడం ప్రభుత్వ లక్ష్యమని ఆమె పేర్కొన్నారు.