Yellareddypet: ఆదమరిస్తే అనంత లోకాలకే కేసీఆర్‌ కాలనీకి దారేది!

Yellareddypet: ఎల్లారెడ్డిపేట మండలం వెంకటాపూర్‌లోని కేసీఆర్‌ కాలనీ డబుల్‌ బెడ్‌రూమ్‌ ఇళ్ల సముదాయానికి రహదారి కష్టాలు తప్పడం లేదు. భారీ వర్షాలకు ప్రధాన రహదారి తెగిపోయి నెలలు గడుస్తున్నా మరమ్మతులు చేపట్టకపోవడంతో కాలనీవాసులు తీవ్ర ఇబ్బందులు ఎదుర్కొంటున్నారు.

ప్రమాదకరంగా మారిన రహదారి

కాలనీకి వెళ్లే ప్రధాన రహదారి భారీ వర్షాలకు పూర్తిగా దెబ్బతిని పెద్దపెద్ద గుంతలతో ప్రమాదకరంగా మారింది. రోజురోజుకూ గుంతలు మరింత పెద్దవవుతుండటంతో వాహనదారులు, కాలనీవాసులు భయాందోళనల మధ్య ప్రయాణిస్తున్నారు. ముఖ్యంగా రాత్రివేళల్లో పరిస్థితి మరింత ప్రమాదకరంగా ఉందని స్థానికులు చెబుతున్నారు.

చిన్నపాటి నిర్లక్ష్యం జరిగినా వాహనాలు అదుపుతప్పి ప్రమాదాలకు గురయ్యే పరిస్థితి ఉందని ఆవేదన వ్యక్తం చేస్తున్నారు. చిన్నపిల్లలు, వృద్ధులు, గర్భిణీలు రాకపోకలు సాగించేందుకు తీవ్ర ఇబ్బందులు పడుతున్నారని తెలిపారు.

అధికారుల తీరుపై స్థానికుల ఆగ్రహం

రహదారి సమస్యను పలుమార్లు అధికారుల దృష్టికి తీసుకెళ్లినా ఇప్పటివరకు శాశ్వత పరిష్కారం చూపలేదని కాలనీవాసులు ఆరోపిస్తున్నారు. ప్రమాదం కళ్లముందే కనిపిస్తున్నా అధికారులు, ప్రజాప్రతినిధులు పట్టించుకోవడం లేదని ఆగ్రహం వ్యక్తం చేస్తున్నారు.

“వర్షాలకు రోడ్డు తెగిపోయి ఇన్ని రోజులవుతున్నా పట్టించుకునే నాథుడే లేడు. రోజూ భయపడుతూ ప్రయాణించాల్సి వస్తోంది. ప్రమాదం జరిగి ఎవరైనా ప్రాణాలు కోల్పోయాకే అధికారులు స్పందిస్తారా?” అని కాలనీవాసులు ప్రశ్నిస్తున్నారు.

శాశ్వత పరిష్కారం చూపాలని డిమాండ్‌

ఇప్పటికైనా జిల్లా యంత్రాంగం, ప్రజాప్రతినిధులు వెంటనే స్పందించి వెంకటాపూర్‌ కేసీఆర్‌ కాలనీ రహదారికి మరమ్మతులు చేపట్టి శాశ్వత పరిష్కారం చూపాలని స్థానికులు డిమాండ్‌ చేస్తున్నారు. సమస్యను పరిష్కరించకపోతే పెద్ద ఎత్తున ఆందోళన కార్యక్రమాలు చేపడతామని హెచ్చరిస్తున్నారు.