Peddapalli: పెద్దపల్లిలో మాజీ ఎమ్మెల్యే ఇంటి ముట్టడి.. తీవ్ర ఉద్రిక్తత!

Peddapalli: పెద్దపల్లిలో రాజకీయ ఉద్రిక్తత నెలకొంది. కాంగ్రెస్ 14వ వార్డు కౌన్సిలర్ అస్లాం పర్వేజ్ ఆధ్వర్యంలో మహిళలు BRS మాజీ MLA దాసరి మనోహర్ రెడ్డి ఇంటిని ముట్టడించేందుకు ర్యాలీగా వెళ్లారు. వారిని పోలీసులు అడ్డుకోవడంతో అక్కడ తీవ్ర ఉద్రిక్తత చోటుచేసుకుంది.

పెద్దపల్లి పట్టణంలో కాంగ్రెస్, BRS శ్రేణుల మధ్య మాటల యుద్ధం ముట్టడి వరకు వెళ్లింది. పట్టణంలోని 14వ వార్డు కాంగ్రెస్ కౌన్సిలర్ అస్లాం పర్వేజ్ ఆధ్వర్యంలో పెద్ద సంఖ్యలో మహిళలు BRS పార్టీ మాజీ ఎమ్మెల్యే దాసరి మనోహర్ రెడ్డి ఇంటి ముట్టడికి ర్యాలీగా బయలుదేరారు.

దాసరి మనోహర్ రెడ్డి కాంగ్రెస్ ప్రభుత్వంపై, ముఖ్యంగా మహిళల పథకాలపై అనుచిత వ్యాఖ్యలు చేశారని కాంగ్రెస్ నేతలు ఆరోపిస్తున్నారు. దీనికి నిరసనగా ఆయన ఇంటిని ముట్టడించి నిలదీయాలని కాంగ్రెస్ మహిళా నేతలు నిర్ణయించారు.

మహిళల ర్యాలీ మాజీ MLA ఇంటి వైపు వెళ్తుండగా సమాచారం అందుకున్న పోలీసులు అప్రమత్తమయ్యారు. ర్యాలీని మధ్యలోనే అడ్డుకుని ఆపారు. దీంతో కౌన్సిలర్ అస్లాం పర్వేజ్, మహిళా కార్యకర్తలకు, పోలీసులకు మధ్య వాగ్వాదం జరిగింది.

మమ్మల్ని ఎందుకు అడ్డుకుంటున్నారని కాంగ్రెస్ నేతలు పోలీసులను నిలదీశారు. శాంతిభద్రతలకు విఘాతం కలగకుండా ముందు జాగ్రత్తగా అడ్డుకున్నామని పోలీసులు తెలిపారు. దీంతో ఆ ప్రాంతంలో కొద్దిసేపు ఉద్రిక్త వాతావరణం నెలకొంది. పోలీసులు ఇరువర్గాలకు నచ్చజెప్పడంతో పరిస్థితి సద్దుమణిగింది.