Rayachoti: రాయచోటిలో జైల్‌భరో విజయవంతం కార్మికులు రైతుల ఐక్య పోరాటం!

Rayachoti: సంయుక్త కిసాన్ మోర్చా పిలుపుమేరకు సోమవారం రాయచోటి పట్టణంలో కార్మిక, రైతు, వ్యవసాయ కార్మిక సంఘాల ఆధ్వర్యంలో జైల్‌భరో కార్యక్రమాన్ని విజయవంతంగా నిర్వహించారు. ఈ కార్యక్రమంలో కార్మికులు, రైతులు, వ్యవసాయ కూలీలు అధిక సంఖ్యలో పాల్గొన్నారు.

సంఘాల ఆధ్వర్యంలో రాయచోటి మండల తహసీల్దార్ కార్యాలయం నుంచి భారీ ర్యాలీగా బయలుదేరి గాలివీడు రోడ్డులోని స్థానిక పోలీస్ స్టేషన్ వద్దకు చేరుకున్నారు. అక్కడ కేంద్ర, రాష్ట్ర ప్రభుత్వాలు అవలంబిస్తున్న కార్మిక, రైతు, వ్యవసాయ కార్మిక వ్యతిరేక విధానాలను నిరసిస్తూ పెద్ద ఎత్తున నినాదాలు చేశారు.

స్కీం వర్కర్ల వేతనాలను పెంచాలని, సుప్రీంకోర్టు ఆదేశాల ప్రకారం కనీస వేతనం రూ.26,000 అమలు చేయడానికి తక్షణ చర్యలు తీసుకోవాలని, రైతాంగ సమస్యలను పరిష్కరించాలని, కార్మికులు–రైతుల సమస్యలను పరిష్కరించాలని, వ్యవసాయ కూలీలకు విస్తృతంగా ఉపాధి కల్పించాలని డిమాండ్ చేశారు.

అనంతరం జరిగిన కార్యక్రమానికి ఏపీ మున్సిపల్ వర్కర్స్ యూనియన్ జిల్లా అధ్యక్షులు బీవీ రమణ అధ్యక్షత వహించారు.ఈ సందర్భంగా ధర్నాను ఉద్దేశించి ఆంధ్రప్రదేశ్ వ్యవసాయ కార్మిక సంఘం (AIAWU) జిల్లా ప్రధాన కార్యదర్శి మండెం సుధీర్ కుమార్, ఆంధ్రప్రదేశ్ వ్యవసాయ కార్మిక సంఘం (BKMU) జిల్లా అధ్యక్షులు సిద్ధిగాళ్ల శ్రీనివాసులు, కుల వివక్ష వ్యతిరేక పోరాట సంఘం కెవిపిఎస్ జిల్లా కోకన్వీనర్ డిసి వెంకటయ్య, రైతు సంఘం జిల్లా కార్యదర్శి వంగిమల రంగారెడ్డి మాట్లాడుతూ కేంద్ర, రాష్ట్ర ప్రభుత్వాల విధానాల వల్ల కార్మికులు, రైతులు, వ్యవసాయ కూలీలు తీవ్ర ఇబ్బందులు ఎదుర్కొంటున్నారని విమర్శించారు.

ముఖ్యంగా గ్రామీణ ప్రాంతాల్లో వ్యవసాయ పనులు తగ్గిపోవడంతో వ్యవసాయ కూలీలకు నిరంతర ఉపాధి లభించకపోవడం వల్ల కుటుంబాలను పోషించుకోవడానికి వేలాది మంది వలసలు వెళ్లాల్సిన పరిస్థితి ఏర్పడుతోందన్నారు.

వ్యవసాయ కూలీలకు స్థానికంగానే ఉపాధి కల్పించి వలసలను నివారించేందుకు ఉపాధి హామీ పథకంలో పనిదినాలను గణనీయంగా పెంచాలని, కూలీలకు సకాలంలో వేతనాలు చెల్లించాలని డిమాండ్ చేశారు. గ్రామీణ పేదలకు ఉపాధి కల్పించే పథకాన్ని నిర్వీర్యం చేయకుండా మరింత బలోపేతం చేయాలని కోరారు.

కొత్త VB-G RAM G చట్టాన్ని పటిష్టంగా అమలు చేసి, గ్రామీణ ప్రాంతాల్లో ఉపాధి అవకాశాలను పెంచాలని వారు డిమాండ్ చేశారు. వ్యవసాయ కూలీలకు సంవత్సరంలో ఎక్కువ రోజులు పని కల్పించడం ద్వారా గ్రామీణ ప్రాంతాల నుంచి జరుగుతున్న వలసలను అరికట్టడానికి కేంద్ర, రాష్ట్ర ప్రభుత్వాలు ప్రత్యేక చర్యలు చేపట్టాలని అన్నారు.

రైతులకు గిట్టుబాటు ధర, పంటలకు నష్టపరిహారం, సాగునీరు, నాణ్యమైన విత్తనాలు, ఎరువులు అందుబాటులో ఉండేలా చర్యలు తీసుకోవాలని డిమాండ్ చేశారు. రైతాంగం సంక్షోభంలో ఉంటే దాని ప్రభావం వ్యవసాయ కూలీలపైనా పడుతుందని, అందువల్ల రైతులు–వ్యవసాయ కూలీల సమస్యలను విడదీయకుండా సమగ్రంగా పరిష్కరించాల్సిన బాధ్యత ప్రభుత్వాలపై ఉందన్నారు.

కార్మికులకు ఉద్యోగ భద్రత, కనీస వేతనం, సామాజిక భద్రత కల్పించాలని, స్కీం వర్కర్లకు గౌరవప్రదమైన వేతనాలు చెల్లించాలని డిమాండ్ చేశారు. సుప్రీంకోర్టు ఆదేశాల మేరకు కనీస వేతనం రూ.26,000 అమలు చేయడానికి కేంద్ర, రాష్ట్ర ప్రభుత్వాలు తక్షణ చర్యలు తీసుకోవాలని కోరారు.

సంయుక్త కిసాన్ మోర్చా పిలుపుమేరకు నిర్వహించిన ఈ జైల్‌భరో కార్యక్రమం కార్మికులు, రైతులు, వ్యవసాయ కూలీల ఐక్యతను చాటడంతో పాటు, తమ న్యాయమైన హక్కులు, ఉపాధి, కనీస వేతనాలు, రైతాంగ సమస్యల పరిష్కారం కోసం భవిష్యత్తులో మరింత ఐక్యంగా పోరాడుతామనే హెచ్చరికను ప్రభుత్వాలకు ఇవ్వడమే ప్రధాన ఉద్దేశమని నాయకులు స్పష్టం చేశారు.

కేంద్ర, రాష్ట్ర ప్రభుత్వాలు ఇప్పటికైనా కార్మికులు, రైతులు, వ్యవసాయ కూలీల న్యాయమైన డిమాండ్లపై స్పందించి తక్షణం పరిష్కార చర్యలు చేపట్టాలని వారు డిమాండ్ చేశారు.

వ్యవసాయ కూలీలకు స్థానికంగా ఉపాధి కల్పించి వలసలను అరికట్టాలని, VB-G RAM G చట్టాన్ని పటిష్టంగా అమలు చేయాలని, ఉపాధి హామీ పనిదినాలను పెంచాలని, రైతు–కార్మిక–వ్యవసాయ కూలీల సమస్యలను పరిష్కరించాలని కోరారు.లేనిపక్షంలో కార్మికులు, రైతులు, వ్యవసాయ కూలీలను మరింత ఐక్యం చేసి రాబోయే రోజుల్లో విస్తృతమైన ఉద్యమాలను నిర్వహిస్తామని నాయకులు హెచ్చరించారు.

ఈ కార్యక్రమంలో వ్యవసాయ కార్మిక సంఘం నాయకులు వివిధ కార్మిక, రైతు, వ్యవసాయ కార్మిక సంఘాల నాయకులు, కార్యకర్తలు, కార్మికులు, రైతులు, వ్యవసాయ కూలీలు పెద్ద సంఖ్యలో పాల్గొన్నారు.