Duvvuru: దువ్వూరులో మళ్లీ మొదటికొచ్చిన డ్రైనేజీ సమస్య: అధికారుల తీరుపై ఆగ్రహం

మైదుకూరు, ​దువ్వూరు: మండల కేంద్రమైన దువ్వూరులో డ్రైనేజీ సమస్య మళ్లీ మొదటికొచ్చింది. పోలీస్ స్టేషన్ ఎదురుగా ఏళ్ల తరబడి రోడ్డుపై ప్రవహిస్తున్న మురుగునీటి సమస్యకు సుమారు పది రోజుల క్రితం అధికారులు పరిష్కారం చూపినప్పటికీ, పరిస్థితిలో ఎలాంటి మార్పు రాలేదు. అధికారుల అసంపూర్తి పనుల కారణంగా మురుగు నీరు మళ్లీ రోడ్డుపైనే ప్రవహిస్తుండటంతో స్థానికులు, వాహనదారులు తీవ్ర అసహనం వ్యక్తం చేస్తున్నారు.

​గతంలో ఉన్న సమస్య తీవ్రతను గుర్తించిన సంబంధిత అధికారులు డ్రైనేజీ నిర్మాణానికి హద్దులు (మార్కింగ్) నిర్ణయించారు. అయితే ఒకవైపు మాత్రమే నామమాత్రంగా పనులు చేపట్టి, మరోవైపు కాలువ తవ్వకం చేపట్టకపోవడంతో సమస్య మరింత జటిలమైంది. నీరు సాఫీగా వెళ్లే మార్గం లేకపోవడంతో కాలువ పొంగి రోడ్డు వెంబడి మురుగు ప్రవహిస్తోంది.

​దీనివల్ల ఆ ప్రాంతమంతా దుర్వాసన వెదజల్లుతూ, దోమలు విపరీతంగా పెరిగిపోయి సీజనల్ వ్యాధులు ప్రబలే ప్రమాదం పొంచి ఉందని స్థానికులు ఆందోళన చెందుతున్నారు. అధికారులు కేవలం తాత్కాలిక మరమ్మతులతో సరిపెట్టకుండా, మార్కింగ్ చేసిన విధంగా రెండు వైపులా పూర్తిస్థాయిలో డ్రైనేజీ కాలువను నిర్మించి శాశ్వత పరిష్కారం చూపాలని దువ్వూరు ప్రజలు విజ్ఞప్తి చేస్తున్నారు.