US Visa: అమెరికా సంచలన నిర్ణయం.. 1.75 లక్షలకు పైగా వీసాలు రద్దు

US Visa: అమెరికా ప్రభుత్వం విదేశీ పౌరులపై తీవ్ర స్థాయిలో చర్యలకు దిగింది. అధ్యక్షుడు డోనాల్డ్ ట్రంప్ హయాంలో నిబంధనలను ఉల్లంఘించిన, నేరాలకు పాల్పడిన 1,75,000 కంటే ఎక్కువ మంది విదేశీయుల వీసాలను రద్దు చేసినట్లు యునైటెడ్ స్టేట్స్ డిపార్ట్‌మెంట్ ఆఫ్ స్టేట్ సోమవారం అధికారికంగా వెల్లడించింది. దేశంలో కఠినమైన భద్రతా తనిఖీలలో భాగంగా ఈ నిర్ణయం తీసుకున్నట్లు విదేశాంగ శాఖ స్పష్టం చేసింది. వీసాలు పొందిన వారు దానికి సంబంధించిన నిబంధనలను ఖచ్చితంగా పాటించాలని, స్థానిక పౌరులకు ఎలాంటి ముప్పుగా మారకూడదనే ఉద్దేశంతోనే ఈ చర్యలు చేపట్టినట్లు తెలిపింది.

అమెరికా విదేశాంగ శాఖ తన ప్రకటనలో ఒక కీలక అంశాన్ని గుర్తుచేసింది. అమెరికన్ వీసా పొందే అవకాశం అనేది విదేశీయులకు ఒక విశేషాధికారం మాత్రమే తప్ప అది ప్రాథమిక హక్కు కాదని పేర్కొంది. అమెరికా పౌరుల భద్రతకు, దేశ అంతర్గత ప్రశాంతతకు విఘాతం కలిగించే వారి విషయంలో అందుబాటులో ఉన్న అన్ని చట్టపరమైన చర్యలను ఉపయోగిస్తామని స్పష్టం చేసింది. అయితే ఏ దేశానికి చెందిన వారిపై ఎంతెంత సంఖ్యలో వీసాల రద్దు వేటు పడిందనే వివరాలను ప్రస్తుతానికి విదేశాంగ శాఖ బయటపెట్టలేదు.

వీసాలు రద్దు చేయడానికి గల ప్రధాన కారణాలు

అమెరికా విదేశాంగ శాఖ వెల్లడించిన వివరాల ప్రకారం.. విదేశీ పౌరులు రకరకాల నేరాలు, ఉల్లంఘనలకు పాల్పడటం వల్లే వారి వీసాలను రద్దు చేయాల్సి వచ్చింది.

* చట్ట అమలు సంస్థల చర్యలు: తాగి వాహనాలు నడపడం, నిర్లక్ష్యంగా వాహనాలు తోలడం, పౌరులపై దాడులు చేయడం, ఆర్థిక మోసాలకు పాల్పడటం.

* తీవ్రమైన నేరాలు: మైనర్లపై లైంగిక వేధింపులు, అత్యాచారాలు వంటి తీవ్రమైన నేరారోపణలు ఉన్నవారిపై కఠిన చర్యలు తీసుకున్నారు.

* భద్రతా ముప్పు: అమెరికన్ పౌరులకు వ్యతిరేకంగా హింసను ప్రేరేపించడం, ఇమ్మిగ్రేషన్ వ్యవస్థను తప్పుదోవ పట్టించడం, అమెరికా జాతీయ భద్రతకు విఘాతం కలిగించే చర్యలకు పాల్పడటం.

నిరంతర తనిఖీలతో భద్రత కట్టుదిట్టం

అమెరికా తమ పౌరుల రక్షణే ధ్యేయంగా ఈ ఆపరేషన్లను నిరంతరం కొనసాగిస్తోందని తెలిపారు. దేశంలోని చట్టాలను ఉల్లంఘించే విదేశీయులను గుర్తించి వారిపై చర్యలు తీసుకోవడానికి ఇమ్మిగ్రేషన్, న్యాయ శాఖలతో కలిసి పని చేస్తున్నట్లు వివరించారు. రాబోయే రోజుల్లో కూడా వీసా నిబంధనలు ఉల్లంఘించే వారిపై ఇలాంటి కఠిన నిర్ణయాలు కొనసాగుతాయని హెచ్చరించారు.