Donald Trump : NATOలో ముదురుతున్న విభేదాలు.. జర్మనీ నుంచి అమెరికా బలగాల తిరుగుప్రయాణం

Donald Trump : అమెరికా అధ్యక్షుడు డోనాల్డ్ ట్రంప్ తనదైన శైలిలో మరో సంచలన నిర్ణయం తీసుకున్నారు. అగ్రరాజ్యానికి అత్యంత సన్నిహిత మిత్రదేశంగా భావించే జర్మనీకి గట్టి షాక్ ఇచ్చారు. జర్మనీలో మోహరించిన అమెరికా సైన్యంలో సుమారు 5,000 మందిని వెనక్కి రప్పించాలని ఆదేశాలు జారీ చేశారు. ఇరాన్ వ్యవహారంలో ఐరోపా దేశాలతో విభేదాలే ఈ నిర్ణయానికి ప్రధాన కారణమని తెలుస్తోంది. అమెరికా అధ్యక్షుడు డోనాల్డ్ ట్రంప్ మరియు జర్మన్ ఛాన్సలర్ ఫ్రెడరిక్ మెర్జ్ మధ్య గత కొన్ని రోజులుగా తీవ్రమైన వాగ్వాదం సాగుతోంది. ముఖ్యంగా ఇరాన్ విషయంలో అమెరికా అవలంబిస్తున్న యుద్ధ వ్యూహాలను జర్మనీ బహిరంగంగా విమర్శించింది. ఇరాన్ నాయకత్వం అమెరికాను అవమానిస్తోందని, అసలు వాషింగ్టన్ దగ్గర సరైన వ్యూహమే లేదని మెర్జ్ చేసిన వ్యాఖ్యలు ట్రంప్‌కు తీవ్ర ఆగ్రహం తెప్పించాయి. దీనికి ప్రతిచర్యగా, జర్మనీకి తాము అందిస్తున్న సైనిక రక్షణను తగ్గించాలని ట్రంప్ నిశ్చయించుకున్నారు. అమెరికా రక్షణ మంత్రి పీట్ హెగ్‌సెత్ కూడా ఈ ప్రతిపాదనకు ఆమోదం తెలిపారు.

రాబోయే 6 నుంచి 12 నెలల్లో ప్రక్రియ పూర్తి

పెంటాగన్ వెల్లడించిన వివరాల ప్రకారం.. జర్మనీ నుంచి 5,000 మంది సైనికులను ఉపసంహరించుకునే ప్రక్రియ వచ్చే ఆరు నెలల నుంచి ఏడాది కాలంలో పూర్తి కానుంది. ప్రస్తుతం జర్మనీలో సుమారు 36,000 మంది అమెరికా సైనికులు ఉన్నారు. అంటే మొత్తం బలగాలలో 14 శాతం మందిని వెనక్కి పిలిపిస్తున్నారు. ఇది కేవలం ఆరంభం మాత్రమేనని, భవిష్యత్తులో ఈ సంఖ్య ఇంకా పెరిగే అవకాశం ఉందని విశ్లేషకులు భావిస్తున్నారు. యూరప్‌లో అమెరికా తన సైనిక వ్యూహాలను పునఃసమీక్షిస్తోందని, అవసరమైన చోట మాత్రమే బలగాలను ఉంచుతామని పెంటాగన్ స్పష్టం చేసింది.

జర్మనీలో అమెరికా కీలక స్థావరాలు

జర్మనీలో అమెరికాకు అత్యంత వ్యూహాత్మకమైన సైనిక స్థావరాలు ఉన్నాయి. వీటిలో యూరోపియన్, ఆఫ్రికన్ కమాండ్ హెడ్ క్వార్టర్స్, రామ్‌స్టెయిన్ ఎయిర్ బేస్, ల్యాండ్‌స్టూల్ రీజినల్ మెడికల్ సెంటర్ వంటివి అతి ముఖ్యమైనవి. అఫ్గానిస్తాన్, ఇరాక్ వంటి దేశాల్లో యుద్ధం జరిగినప్పుడు గాయపడిన అమెరికా సైనికులకు ఇక్కడే చికిత్స అందించేవారు. అంతేకాకుండా, రష్యాను అడ్డుకోవడానికి జర్మనీలో అమెరికా తన అణ్వాయుధాలను కూడా మోహరించింది. ఇప్పుడు ట్రంప్ తీసుకున్న నిర్ణయం వల్ల ఈ కీలక స్థావరాల భద్రతపై ప్రభావం పడే అవకాశం ఉంది.

NATO, యూరప్ భద్రతపై ప్రభావం

ట్రంప్ తీసుకున్న ఈ నిర్ణయం నాటో (NATO) దేశాల మధ్య ఉన్న ఐక్యతను దెబ్బతీసేలా ఉంది. రష్యాతో యుద్ధం జరుగుతున్న తరుణంలో అమెరికా తన సైన్యాన్ని వెనక్కి తీసుకోవడం అంటే ఐరోపా దేశాలు తమ భద్రతను తామే చూసుకోవాలని చెప్పడమే. గతంలో జో బైడెన్ అధికారంలో ఉన్నప్పుడు సైనిక ఉపసంహరణను నిలిపివేశారు, కానీ ట్రంప్ రెండోసారి అధికారంలోకి వచ్చిన వెంటనే తన పాత హామీని అమలు చేస్తున్నారు. రష్యా-ఉక్రెయిన్ యుద్ధం ముగించేలా జర్మనీ కృషి చేయాలని, తమ దేశ భద్రతను తామే చూసుకోవాలని ట్రంప్ సోషల్ మీడియా వేదికగా జర్మనీకి సూచించారు.