USA Iran War : ఇరాన్‌పై అమెరికా తుది పోరాటం.. ట్రంప్ '336 గంటల' వార్ ప్లాన్

USA Iran War : మిడిల్ ఈస్ట్ మరోసారి అగ్నిగుండంలా మారబోతోందా? అగ్రరాజ్యం అమెరికా, ఇరాన్ దేశాల మధ్య యుద్ధ మేఘాలు కమ్ముకున్నాయా? తాజాగా అందుతున్న సమాచారం ప్రకారం, అమెరికా అధ్యక్షుడు డొనాల్డ్ ట్రంప్ ఇరాన్‌ను ఉద్దేశించి ఒక అత్యంత ప్రమాదకరమైన యుద్ధ ప్రణాళికను సిద్ధం చేసినట్లు తెలుస్తోంది. అదే 336 గంటల ఫార్ములా. అంటే కేవలం 14 రోజుల్లో ఇరాన్‌ను పూర్తిగా అదుపులోకి తీసుకోవడం లేదా ధ్వంసం చేయడం ఈ ప్లాన్ ముఖ్య ఉద్దేశ్యం. ఈ పరిణామాలతో ప్రపంచవ్యాప్తంగా టెన్షన్ మొదలైంది.

ఏమిటా 336 గంటల వ్యూహం?

అమెరికా అధ్యక్షుడు డొనాల్డ్ ట్రంప్, అతని ఉన్నత స్థాయి సైనిక అధికారులు సిట్యుయేషన్ రూమ్‎లో 45 నిమిషాల పాటు చర్చించి ఈ యుద్ధ ప్రణాళికను ఖరారు చేసినట్లు సమాచారం. ఇరాన్ తన అణు ఆశయాలను విరమించుకోకపోవడంతో, ఆ దేశంపై నేరుగా భూతల దాడులు నిర్వహించాలని ట్రంప్ నిర్ణయించుకున్నారు. ఈ 336 గంటల ప్లాన్ ప్రకారం.. కేవలం రెండు వారాల్లో ఇరాన్ సైనిక వ్యవస్థను, నాయకత్వాన్ని, ఆర్థిక మౌలిక సదుపాయాలను పూర్తిగా నిర్వీర్యం చేయడమే అమెరికా లక్ష్యం.

మూడు భయంకరమైన ఆప్షన్లు:

* అమెరికా సెంటకామ్ (CENTCOM) కమాండర్ అడ్మిరల్ బ్రాడ్ కూపర్ ట్రంప్ ముందు మూడు ప్రధాన సైనిక ప్రత్యామ్నాయాలను ఉంచారు:

* హోర్ముజ్ జలసంధిపై నియంత్రణ: ఇరాన్ చమురు వ్యాపారాన్ని పూర్తిగా అడ్డుకోవడానికి ఈ జలసంధిపై భూతల దాడులు చేయడం.

* అణుస్థావరాల ఆక్రమణ: ఇస్ఫాహాన్‌లోని అణు కేంద్రాలపై దాడి చేసి 60% వరకు శుద్ధి చేసిన యురేనియంను స్వాధీనం చేసుకోవడం.

* భారీ క్షిపణి దాడులు: ఇరాన్ చరిత్రలో ఎన్నడూ చూడని విధంగా సైనిక స్థావరాలపై అత్యంత శక్తివంతమైన దాడులు నిర్వహించడం.

ఇరాన్ హెచ్చరిక - గల్ఫ్ దేశాల్లో భయం

అమెరికా హెచ్చరికలకు ఇరాన్ కూడా ఘాటుగానే స్పందించింది. తమ భూభాగంపై దాడి జరిగితే అమెరికా, ఇజ్రాయెల్ ఎన్నడూ మర్చిపోలేని విధంగా బుద్ధి చెబుతామని ఇరాన్ రెవల్యూషనరీ గార్డ్స్ (IRGC) ప్రకటించింది. ఒకవేళ ఇరాన్ నాయకులకు ఏదైనా జరిగితే, అమెరికాకు మద్దతు ఇచ్చే గల్ఫ్ దేశాల పాలకుల కోటలను కూడా కూల్చివేస్తామని ఇరాన్ ఎంపీ మహమూద్ నబవియా హెచ్చరించారు. దీంతో యూఏఈ, సౌదీ అరేబియా వంటి దేశాల్లో ఆందోళన మొదలైంది. పరిస్థితిని గమనించిన ఇజ్రాయెల్ ఇప్పటికే యూఏఈలో లేజర్ ఆధారిత రక్షణ వ్యవస్థలను ఏర్పాటు చేసింది.

తయారీలో అగ్రరాజ్యం

గత 24 గంటల్లో అమెరికా సుమారు 6500 టన్నుల అత్యాధునిక ఆయుధాలను ఇజ్రాయెల్‌కు పంపింది. ఎఫ్-16 యుద్ధ విమానాలు, మిలిటరీ ట్రక్కులు, సాయుధ వాహనాలు యుద్ధానికి సిద్ధంగా ఉన్నాయి. ఇరాన్ కమ్యూనికేషన్ వ్యవస్థను హ్యాక్ చేసి, ఆ దేశ రక్షణ వ్యవస్థను మొద్దుబార్చేందుకు అమెరికా సైబర్ విభాగం కూడా రంగంలోకి దిగింది. ట్రంప్ తన ప్రతిష్టను కాపాడుకోవడానికి ఈ యుద్ధంలో గెలవడం అనివార్యమని భావిస్తున్నారు.

ప్రపంచంపై ప్రభావం

ఒకవేళ యుద్ధం నిజంగా మొదలైతే, అది కేవలం ఇరాన్, అమెరికాలకే పరిమితం కాకుండా మూడో ప్రపంచ యుద్ధానికి దారితీయవచ్చని నిపుణులు ఆందోళన వ్యక్తం చేస్తున్నారు. చమురు సరఫరా నిలిచిపోయి ప్రపంచ ఆర్థిక వ్యవస్థ కుప్పకూలే ప్రమాదం ఉంది. అటు ఇరాన్‌లో ఇప్పటికే ద్రవ్యోల్బణం 100%కి చేరడంతో అక్కడి ప్రజలు నానా ఇబ్బందులు పడుతున్నారు. వచ్చే 48 గంటలు మిడిల్ ఈస్ట్ భవిష్యత్తును నిర్ణయించబోతున్నాయి.