Donald Trump : ఇరాన్‌కు రష్యా సీక్రెట్ సపోర్ట్.. డోనాల్డ్ ట్రంప్ సంచలన వ్యాఖ్యలు

Donald Trump : మిడిల్ ఈస్ట్ పరిణామాలపై రష్యా పాత్రను ఉద్దేశించి ఉక్రెయిన్ అధ్యక్షుడు వ్లాదిమిర్ జెలెన్స్కీ చేసిన వ్యాఖ్యలపై అమెరికా అధ్యక్షుడు డోనాల్డ్ ట్రంప్ సంచలన రీతిలో స్పందించారు. ఆసియా, ఆఫ్రికా, మిడిల్ ఈస్ట్ ప్రాంతాల్లోని అమెరికా సైనిక స్థావరాలను లక్ష్యంగా చేసుకోవడానికి ఇరాన్‌కు రష్యా శాటిలైట్ నిఘా సమాచారాన్ని అందిస్తోందని జెలెన్స్కీ ఆరోపించారు. దీనిపై ట్రంప్ స్పందిస్తూ.. "ఈ ఆరోపణల్లో ఎంతవరకు నిజముందో మేము త్వరలోనే తెలుసుకుంటాం. ఈ విషయంపై నేను స్వయంగా రష్యా అధ్యక్షుడు పుతిన్‌తో మాట్లాడతాను" అని ప్రకటించారు.

ఇరాన్‌ను పూర్తిగా అణచివేశామన్న ట్రంప్

ఒకవేళ ఇరాన్‌కు రష్యా సాయం చేసినప్పటికీ దానివల్ల పెద్దగా ఉపయోగం ఏమీ ఉండదని ట్రంప్ ధీమా వ్యక్తం చేశారు. "గతంలో వెనిజులాకు కూడా రష్యా పెద్ద ఎత్తున సైనిక పరికరాలు అందించింది, కానీ దానివల్ల ఏం జరిగింది? ఏమీ లేదు. ఒకవేళ ఇరాన్‌కు రష్యా ఏమైనా సాయం చేసి ఉంటే ఉండవచ్చు గాక, కానీ దాని ప్రభావం మాపై ఏమీ పడదు. ఎందుకంటే మేము ఇప్పటికే ఇరాన్‌ను తీవ్రంగా దెబ్బతీశాం. ఇప్పుడు వారి వద్ద సరిగ్గా ఆర్మీ లేదు, ఎయిర్ ఫోర్స్ లేదు, నేవీ కూడా లేదు. ప్రస్తుతం వారి వద్ద ఏమీ మిగలలేదు" అని ట్రంప్ వ్యాఖ్యానించారు. పెద్ద ఎత్తున రష్యా సాయం చేస్తోందనే వార్తలను ఆయన కొట్టిపారేశారు.

ట్రంప్‌తో భేటీ కానున్న ఇజ్రాయెల్ ప్రధాని నెతన్యాహు

ఈ ఉద్రిక్తతల నడుమ ఇజ్రాయెల్ ప్రధాని బెంజమిన్ నెతన్యాహు వాషింగ్టన్‌లో ట్రంప్‌తో భేటీ కానుండటం ప్రాధాన్యత సంతరించుకుంది. అమెరికా, ఇరాన్ రెండూ కూడా పరస్పర దాడులను తాత్కాలికంగా నిలిపివేసిన తరుణంలో ఈ సమావేశం జరుగుతోంది. ఇరాన్‌ను బలహీనపరచడానికి, దాని అణు కార్యక్రమాన్ని శాశ్వతంగా నిర్వీర్యం చేయడానికి ట్రంప్ తీసుకుంటున్న చర్యలకు తమ సంపూర్ణ మద్దతు ఉంటుందని నెతన్యాహు స్పష్టం చేశారు. పెద్ద యుద్ధం లేకుండానే ఇరాన్ అణు ముప్పును తప్పించగలిగితే అంతకంటే కావలసిందేముందని ఆయన అభిప్రాయపడ్డారు. అదే సమయంలో ఇరాన్ లేదా దాని ప్రాక్సీ గ్రూపులు మళ్లీ దాడులకు తెగబడితే అది వారు చేసే అతిపెద్ద తప్పిదం అవుతుందని హెచ్చరించారు.

చర్చలకు సమయం ఇవ్వాలనుకుంటున్న వైట్ హౌస్

ఇరుదేశాల మధ్య మధ్యంతర కాల్పుల విరమణ ఒప్పందం కుదిర్చేందుకు దౌత్యపరమైన చర్చలు తీవ్రంగా జరుగుతున్నాయి. ఐక్యరాజ్యసమితిలో అమెరికా రాయబారి మైక్ వాల్ట్జ్ మాట్లాడుతూ.. అధ్యక్షుడు ట్రంప్ చర్చల ప్రక్రియకు కొంత సమయం ఇవ్వాలని భావిస్తున్నారని తెలిపారు. ఓమన్, ఇరాన్లతో ఉన్నత స్థాయిలో, సాంకేతిక స్థాయిలో నిరంతరం చర్చలు జరుగుతున్నాయని వివరించారు. ఇదే సమయంలో దాడులను ఎదుర్కొనే అమెరికా ఇంటర్‌సెప్టర్ క్షిపణుల నిల్వలు తగ్గిపోతున్నాయనే ప్రచారాన్ని ఆయన ఖండించారు. ఏది ఏమైనా, మిడిల్ ఈస్ట్‌లో శాంతి నెలకొల్పడానికి, హిజ్బుల్లాలను నిరాయుధులను చేయడానికి దౌత్య మార్గాలకే మొదటి ప్రాధాన్యత ఇస్తున్నట్లు వెల్లడించారు.