Russia Ukraine War: శాంతి చర్చల వేళ రష్యా దారుణం.. 108 డ్రోన్లతో ఉక్రెయిన్ పై విరుచుకుపడ్డ రష్యా

Russia Ukraine War: రష్యా, ఉక్రెయిన్ నడుమ యుద్ధాన్ని ఆపేందుకు అమెరికా రాయబారులు కీవ్‌లో తీవ్రంగా శ్రమిస్తున్నారు. ఆశ్చర్యకరంగా శాంతి చర్చలు జరుగుతున్న సమయంలోనే రష్యా బలగాలు 108 డ్రోన్లతో ఉక్రెయిన్‌పై విరుచుకుపడ్డాయి. ఈ దాడుల్లో ఎనిమిది మంది ప్రాణాలు కోల్పోగా, 69 మంది తీవ్రంగా గాయపడ్డారు. అమెరికా అధ్యక్షుడు డోనాల్డ్ ట్రంప్ పంపిన ప్రత్యేక దౌత్యవేత్తలు స్టీవ్ విట్కాఫ్, జెరెడ్ కుష్నర్ కీవ్‌లో అడుగుపెట్టిన రోజే ఈ భయంకర పరిణామం చోటుచేసుకుంది. ఒకవైపు శాంతి చర్చలకు బాటలు వేస్తున్నట్లు కనిపిస్తున్నా, రష్యా మాత్రం తన దాడులను ఏమాత్రం తగ్గించడం లేదు. రాత్రికి రాత్రే ఉక్రెయిన్ నగరాలపై రష్యా బలగాలు 108 డ్రోన్లను ప్రయోగించాయి. ఈ డ్రోన్ల దాడిలో 11 వేర్వేరు ప్రాంతాలు తీవ్రంగా దెబ్బతిన్నాయి. ఉక్రెయిన్ వైమానిక దళం సమర్థవంతంగా తిప్పికొట్టి 82 డ్రోన్లతో పాటు ఆరు క్షిపణులను గాల్లోనే కూల్చివేసింది. కూల్చివేసిన డ్రోన్ల శిథిలాలు పడి ఏడు ప్రాంతాల్లో ఆస్తి, ప్రాణ నష్టం సంభవించింది.

మాస్కో, కీవ్ నగరాలపై దాడులు చేయకూడదని ఇరుదేశాలు ఒక తాత్కాలిక ఒప్పందానికి వచ్చాయి. రష్యా అధ్యక్షుడు పుతిన్ కీవ్ నగరంపై మూడు రోజుల పాటు దాడులు నిలిపివేస్తున్నట్లు ప్రకటించారు. ఉక్రెయిన్ కూడా సెప్టెంబర్ 7 నాటికి మాస్కోపై ఎటువంటి దాడులు చేయమని స్పష్టం చేసింది. రాజధాని నగరాలకు ఈ విరామం ఉపశమనం కలిగించినప్పటికీ, ఉక్రెయిన్ పరిధిలోని ఇతర ప్రాంతాలపై రష్యా తన క్షిపణి దాడులను కొనసాగిస్తూనే ఉంది. కీవ్ నగరం సురక్షితంగా ఉన్నప్పటికీ, కీవ్ ఓబ్లాస్ట్ పరిసర ప్రాంతాలు బాంబుల మోతతో అల్లాడిపోయాయి.

అమెరికా పంపిన రాయబారుల బృందం అంతకుముందు మాస్కోలో రష్యా అధ్యక్షుడు వ్లాదిమిర్ పుతిన్‌తో సుదీర్ఘంగా మూడు గంటల పాటు చర్చలు జరిపింది. ఆ సమావేశం నుంచి తక్షణమే ఎటువంటి నిర్ణయం వెలువడనప్పటికీ, యుద్ధ నివారణకు రాబోయే వారాల్లో ఒక స్పష్టమైన కార్యాచరణ ప్రణాళికను ప్రకటిస్తామని వైట్ హౌస్ వెల్లడించింది. పుతిన్‌తో భేటీ ముగిసిన మరుసటి రోజే విట్కాఫ్, కుష్నర్ కీవ్‌కు చేరుకుని ఉక్రెయిన్ అధినేత జెలెన్స్కీ బృందంతో భేటీ అయ్యారు.

అమెరికా బృందంతో సమావేశానికి ముందు జెలెన్స్కీ తన సంప్రదింపుల బృందంతో అత్యవసరంగా మాట్లాడారు. ఉక్రెయిన్ యుద్ధాన్ని ముగించడానికి సిద్ధంగా ఉందని, అయితే తమ దేశానికి స్పష్టమైన భద్రతా గ్యారంటీలు లభించాలని స్పష్టం చేశారు. ఆత్మగౌరవంతో కూడిన శాంతి మాత్రమే తమకు ఆమోదయోగ్యమని ఆయన వ్యాఖ్యానించారు. క్షేత్రస్థాయిలో రష్యా చేస్తోంటే దాడులు తాత్కాలిక ఒప్పందాల బలహీనతను తేటతెల్లం చేస్తున్నాయి.