Netherlands Gold Reserves: నెదర్లాండ్ సంచలన నిర్ణయం... అమెరికా నుంచి భారీగా బంగారం తరలింపు
అమెరికా, కెనడాల్లోని బంగారు నిల్వలను నెదర్లాండ్స్ భారీగా తరలించింది. 10.34 బిలియన్ యూరోల విలువైన గోల్డ్ రిజర్వులను ఎందుకు మార్చిందో తెలుసుకుందాం.
Netherlands Gold Reserves: ప్రపంచ రాజకీయాల్లో చోటుచేసుకుంటున్న ఉద్రిక్తతలు, అమెరికా విదేశాంగ విధానాల్లో వస్తున్న మార్పుల నేపథ్యంలో డచ్ సెంట్రల్ బ్యాంక్ ఒక అత్యంత సంచలనాత్మక నిర్ణయం తీసుకుంది. అమెరికా, కెనడాలలోని తమ బంగారు నిల్వల నుంచి బిలియన్ల డాలర్ల విలువైన పసిడిని ఉపసంహరించి లండన్తో పాటు తమ స్వదేశానికి తరలించింది. భవిష్యత్తులో ఎదురయ్యే తీవ్ర ఆర్థిక, రాజకీయ సంక్షోభాలను సమర్థవంతంగా తట్టుకోవడానికే ఈ నిర్ణయం తీసుకున్నట్లు నెదర్లాండ్స్ సెంట్రల్ బ్యాంక్ అధికారికంగా ప్రకటించింది.
బంగారం నిల్వలు, నూతన విభజన
నెదర్లాండ్స్ వద్ద మొత్తం 612.4 టన్నుల పసిడి నిల్వలు ఉన్నాయి. దీని ప్రస్తుత విలువ సుమారు 72.2 బిలియన్ యూరోలు అంటే దాదాపు 83.8 బిలియన్ డాలర్లు. ఆర్థిక ముప్పులను తగ్గించుకోవడానికి దేశాలు తమ బంగారాన్ని వేర్వేరు సురక్షిత ప్రాంతాల్లో భద్రపరుస్తాయి. గతంలో నెదర్లాండ్స్ తన వద్ద ఉన్న నిల్వల్లో జైస్ట్లోని క్యాష్ సెంటర్లో 30.8%, న్యూయార్క్లో 31.3%, ఒట్టావా (కెనడా)లో 19.7%, లండన్లో 18.1% దాచి ఉంచింది. ఈ మార్పుల తర్వాత న్యూయార్క్, కెనడాల నుంచి చెరో 18.5%కి నిల్వలను తగ్గించి, లండన్ వాటాను 32.1%కి పెంచింది. జైస్ట్లో పాతపద్ధతిలోనే 30.8% నిల్వలను కొనసాగిస్తోంది.
రూ. 88 వేల కోట్ల బంగారం తరలింపు విధానం
మొత్తంగా 10.34 బిలియన్ యూరోల అంటే సుమారు 11.73 బిలియన్ డాలర్లు లేదా భారత కరెన్సీలో రూ. 98,000 కోట్లకు పైగా విలువైన బంగారాన్ని మార్చారు. న్యూయార్క్లో 59 టన్నుల బంగారాన్ని అమ్మేసి, అదే మొత్తాన్ని లండన్లో కొనుగోలు చేశారు. మరొక పద్ధతిలో 27 టన్నుల బంగారాన్ని నేరుగా అమెరికా, కెనడాల నుంచి జైస్ట్లోని తమ సొంత కేంద్రానికి భౌతికంగా రవాణా చేశారు.
అమెరికాపై అపనమ్మకానికి గల ప్రధాన కారణాలు
డచ్ బ్యాంక్ బహిరంగంగా స్పష్టం చేయకపోయినా, ఈ నిర్ణయం వెనుక అంతర్జాతీయంగా నెలకొన్న బలమైన రాజకీయ విశ్లేషణలు ఉన్నాయి. అమెరికా-కెనడా మధ్య నడుస్తున్న తీవ్ర సుంకాలాట, ఇరాన్, వెనిజులాలలో అమెరికా సాగిస్తున్న సైనిక చర్యలు అంతర్జాతీయ వ్యాపార వాతావరణాన్ని దెబ్బతీశాయి. ఇరాన్ వివాదంలో యూరప్ దేశాలు నేరుగా అమెరికాకు మద్దతు ఇవ్వకపోవడంతో ట్రంప్ యంత్రాంగం ఆగ్రహంతో ఉంది. డాలర్ను ఆయుధంగా మార్చుకోవడం, ఆంక్షలు విధించడంపై యూరప్లో తీవ్ర ఆందోళన నెలకొంది. అంతేకాదు, గతంలో రష్యా కేంద్రీయ బ్యాంక్ నిధులను ఐరోపా సమాఖ్య, జి-7 దేశాలు స్తంభింపజేసిన దాఖలాలు ఉన్నాయి. నియంత్రణ లేని రాజకీయ నిర్ణయాల వల్ల ఇతర దేశాల్లో దాచిన తమ జాతీయ సంపద ప్రమాదంలో పడుతుందనే అంచనాతోనే నెదర్లాండ్స్ ఈ పసిడి ఉపసంహరణకు దిగింది. ఫ్రాన్స్, జర్మనీల బాటలోనే ఇప్పుడు నెదర్లాండ్స్ కూడా తన బంగారాన్ని అమెరికా నుంచి వెనక్కి తీసుకురావడం ప్రపంచ ఆర్థిక వ్యవస్థలో వస్తున్న మార్పులకు స్పష్టమైన నిదర్శనంగా కనిపిస్తోంది.
Balachander
బాలచందర్ పెళ్లూరి తెలుగు మీడియా రంగంలో 12 ఏళ్లకు పైగా అనుభవం కలిగిన సీనియర్ న్యూస్, పొలిటికల్, భక్తి కంటెంట్ రైటర్, ఎడిటర్. హైదరాబాద్ కేంద్రంగా టీవీ, డిజిటల్ జర్నలిజంలో పనిచేశారు. పొలిటికల్ విశ్లేషణ, ఆధ్యాత్మిక రచనల్లో నైపుణ్యం కలిగి, పొలిటికోస్, ఎన్టీవీ డిజిటల్, మల్లెమాల ఎంటర్టైన్మెంట్లో సేవలందించారు. ఎడిటోరియల్ లీడర్షిప్, కథనం చెప్పే శైలిలో ప్రత్యేక గుర్తింపు పొందారు.