Restaurant Blast : రెస్టారెంట్‌లో బాంబు పేలుడు.. ముగ్గురు దుర్మరణం, 21 మందికి తీవ్ర గాయాలు

Restaurant Blast : రష్యా రాజధాని మాస్కో నగరంలో శనివారం రాత్రి బాంబు పేలుడు సంభవించింది. నగరంలోని అత్యంత కీలకమైన కుద్రిన్స్కాయా స్క్వేర్ ప్రాంతంలో ఉన్న బాల్జీ రోసి అనే ప్రముఖ ఇటాలియన్ రెస్టారెంట్‌ వద్ద ఈ దారుణం చోటుచేసుకుంది. స్థానిక కాలమానం ప్రకారం రాత్రి 8 గంటల సమయంలో ఒక్కసారిగా పేలుడు సంభవించడంతో ఆ ప్రాంతమంతా పొగలు, ఆర్తనాదాలతో అల్లకల్లోలంగా మారింది. ఈ ప్రమాదంలో అక్కడికక్కడే ముగ్గురు మరణించగా, మరో 21 మంది తీవ్రంగా గాయపడ్డారు.

సమాచారం అందుకున్న వెంటనే మాస్కో ఇన్వెస్టిగేటివ్ కమిటీ, ఫోరెన్సిక్ నిపుణులు, ఎమర్జెన్సీ సేవల బృందాలు హుటాహుటిన సంఘటనా స్థలానికి చేరుకున్నాయి. ప్రారంభంలో ఈ ప్రమాదం గ్యాస్ సిలిండర్ పేలడం వల్ల జరిగిందని ప్రచారం జరిగినప్పటికీ, తదుపరి దర్యాప్తులో షాకింగ్ విషయాలు బయటపడ్డాయి. ఒక మహిళ చేతిలో ఉన్న స్వదేశీ పరిజ్ఞానంతో తయారుచేసిన హోమ్‌మేడ్ బాంబు పేలడం వల్లే ఈ విధ్వంసం జరిగినట్లు పోలీసులు నిర్ధారించారు.

రిమోట్ కంట్రోల్‌తో ప్రయోగం

ఈ ఘటనపై విచారణ జరుపుతున్న అధికారులు కొన్ని కీలక అనుమానాలను వ్యక్తం చేస్తున్నారు. రెస్టారెంట్‌లోని సమ్మర్ టెర్రస్ పై ఉన్న అతిథులనే లక్ష్యంగా చేసుకుని ఈ దాడికి ప్లాన్ చేసినట్లు భావిస్తున్నారు. బాంబును పట్టుకొచ్చిన మహిళకే ఆ విషయం తెలియకుండా, ఎవరో గుర్తుతెలియని వ్యక్తులు దూరంగా ఉండి రిమోట్ కంట్రోల్ ద్వారా ఆ బాంబును పేల్చివేసి ఉండవచ్చని పోలీసులు అనుమానిస్తున్నారు. ఈ పేలుడులో బాంబు తెచ్చిన మహిళతో పాటు రెస్టారెంట్ సెక్యూరిటీ గార్డ్, ఒక కస్టమర్ అక్కడికక్కడే ప్రాణాలు కోల్పోయారు.

ప్రైవేట్ ఈవెంట్ కావడం వల్ల తప్పిన పెద్ద ప్రమాదం

మిగిలిన 21 మంది క్షతగాత్రులను వెంటనే సమీపంలోని ఆసుపత్రులకు తరలించారు. వారిలో పలువురి పరిస్థితి విషమంగా ఉందని వైద్యులు తెలిపారు. సాధారణంగా శనివారం రాత్రుల్లో ఈ రెస్టారెంట్ వినియోగదారులతో కిక్కిరిసిపోతుంది. అయితే ప్రమాదం జరిగిన రోజున రెస్టారెంట్‌లో ఒక ప్రైవేట్ ఈవెంట్ మాత్రమే జరుగుతుండటంతో సాధారణ కస్టమర్లను లోపలికి అనుమతించలేదు. ఒకవేళ సాధారణ రోజు అయి ఉంటే మృతుల సంఖ్య వందల్లో ఉండేదని అధికారులు భావిస్తున్నారు. ప్రస్తుతం ఆ ప్రాంతం మొత్తాన్ని సీజ్ చేసిన భద్రతా దళాలు విచారణను వేగవంతం చేశాయి.