Delhi Restaurant Fire Tragedy: ఢిల్లీలో ఘోర ప్రమాదం.. రెస్టారెంట్‌లో అగ్నిప్రమాదం.. 10 మంది మృతి.!

Delhi Restaurant Fire Tragedy: దక్షిణ ఢిల్లీలోని మాలవీయ నగర్ ప్రాంతంలో బుధవారం ఉదయం ఒక ఘోర ప్రమాదం చోటుచేసుకుంది. ఇక్కడి ఒక ప్రముఖ రెస్టారెంట్‌లో అకస్మాత్తుగా భారీగా మంటలు చెలరేగడంతో కనీసం 10 మంది ప్రాణాలు కోల్పోయారు. ఈ ప్రమాదం స్థానికంగా తీవ్ర విషాదాన్ని నింపింది.

రంగంలోకి దిగిన ఫైర్ ఇంజన్లు

బుధవారం ఉదయం సుమారు 9 గంటల సమయంలో ఈ అగ్నిప్రమాదానికి సంబంధించిన సమాచారం అగ్నిమాపక శాఖకు అందింది. సమాచారం అందిన వెంటనే స్పందించిన అధికారులు ఘటనా స్థలానికి రెస్క్యూ టీమ్‌ను పంపించారు. మంటలను అదుపు చేయడానికి , లోపల చిక్కుకున్న వారిని రక్షించడానికి మొత్తం 10 అగ్నిమాపక వాహనాలను రంగంలోకి దించినట్లు అధికారులు వెల్లడించారు.

లెమన్ గ్రీన్ రెస్టారెంట్‌లో ప్రమాదం

ఢిల్లీ ఫైర్ సర్వీస్ (DFS) అధికారి తెలిపిన వివరాల ప్రకారం.. మాలవీయ నగర్‌లోని ‘లెమన్ గ్రీన్ రెస్టారెంట్’ (Lemon Green Restaurant) లో ఈ మంటలు చెలరేగాయి. ప్రాథమికంగా మంటలను అదుపు చేయడంతో పాటు సహాయక చర్యలను వేగవంతం చేయడానికి రెండు వాటర్ టెండర్లు, రెండు వాటర్ బౌజర్లు , ఒక క్విక్ రెస్పాన్స్ వాహనంతో పాటు ఇతర అగ్నిమాపక యూనిట్లను వెంటనే అక్కడికి తరలించారు.

ముగ్గురిని రక్షించిన సిబ్బంది

అగ్నిమాపక సిబ్బంది ప్రాణాలకు తెగించి రెస్టారెంట్ బిల్డింగ్ బేస్‌మెంట్‌లోకి వెళ్లి, అక్కడ చిక్కుకుపోయిన ముగ్గురు వ్యక్తులను సురక్షితంగా బయటకు తీసుకువచ్చారు. అనంతరం వారిని తక్షణ చికిత్స కోసం ఆసుపత్రికి తరలించారు. అయితే, ఆసుపత్రిలో చేర్పించిన సమయంలో వారి ఆరోగ్య పరిస్థితి ఎలా ఉందనే దానికి సంబంధించిన వివరాలు ఇంకా తెలియరాలేదు.

కారణాలు ఇంకా తెలియాల్సి ఉంది

ఈ ఘోర ప్రమాదానికి గల అసలు కారణాలు ఇంకా స్పష్టంగా తెలియలేదు. షార్ట్ సర్క్యూట్ వల్ల ఈ ప్రమాదం జరిగిందా లేదా గ్యాస్ లీకేజీ వంటి ఇతర కారణాలు ఏమైనా ఉన్నాయా అనే కోణంలో పోలీసులు, అగ్నిమాపక సిబ్బంది దర్యాప్తు జరుపుతున్నారు.