Fire Incident: ఘోర అగ్ని ప్రమాదం.. 19 మంది బాలికలతో సహా 24 మంది విద్యార్థులు సజీవదహనం

Fire Incident: తూర్పు కాంగోలోని బుకావు నగరంలో గురువారం చోటుచేసుకున్న భయంకర అగ్నిప్రమాదం తీవ్ర విషాదాన్ని నింపింది. ఒక నివాస గృహంలో ప్రారంభమైన మంటలు క్షణాల్లో పక్కనే ఉన్న రెండు పాఠశాలలకు విస్తరించాయి. ఈ దారుణ ఘటనలో 19 మంది బాలికలతో సహా మొత్తం 24 మంది విద్యార్థులు ఊపిరిరాక, తొక్కిసలాటలో చిక్కుకుని ప్రాణాలు కోల్పోయారు. మొదట ఒక సాధారణ ఇల్లు తీవ్రమైన మంటల్లో చిక్కుకుంది. ఆ ప్రదేశం తీవ్ర జనసాంద్రత కలిగి ఉండటంతో పాటు పరిసరాల్లోని చాలా ఇళ్లు చెక్కతో నిర్మించినవి కావడంతో మంటలు వేగంగా వ్యాపించాయి. ఏమాత్రం ఊహించని విధంగా పక్కనే ఉన్న 'ఫురాహా సెకండరీ స్కూల్', 'ఉజామా ప్రైమరీ స్కూల్' ప్రాంగణాలను అగ్నికీలలు చుట్టుముట్టాయి. తరగతి గదుల్లో పాఠాలు వింటున్న విద్యార్థులు ప్రమాదాన్ని గ్రహించే లోపే దట్టమైన పొగ వారిని కమ్మేసింది. ఎం23 నిరసనకారుల ప్రతినిధి లారెన్స్ కాన్యుకా తెలిపిన వివరాల ప్రకారం ఈ ఘటనలో 19 మంది విద్యార్థినులు, ఐదుగురు బాలురు దారుణంగా ప్రాణాలు కోల్పోయారు.

తొక్కిసలాటతో పెరిగిన ప్రాణనష్టం

పాఠశాల నుంచి బయటకు వచ్చే మార్గాలు అత్యంత చిన్నగా ఉండటం ఈ ప్రమాద తీవ్రతను మరింత పెంచింది. లోపల పొగ దట్టంగా అలుముకోవడంతో చాలామంది విద్యార్థులు ఊపిరిపీల్చుకోలేక తీవ్ర ఇబ్బంది పడ్డారు. భయాందోళనకు గురైన కొందరు విద్యార్థులు ప్రాణాలు కాపాడుకోవడానికి కిటికీల నుంచి కిందకు దూకేశారు. మరికొందరు ప్రధాన ద్వారం వైపు ఒకేసారి పరుగులు తీయడంతో తీవ్రమైన తొక్కిసలాట జరిగింది. ఒకరిపై ఒకరు పడటంతో చాలామంది కిందపడి తొక్కిసలాటలో ప్రాణాలు కోల్పోయినట్లు స్థానిక అడ్మినిస్ట్రేటర్ మోయిజ్ లుబాలా ఆవేదన వ్యక్తం చేశారు.

ఆస్పత్రుల్లో నిండిన ఆర్తనాదాలు

ప్రమాద స్థలం నుంచి 29 మందికి పైగా తీవ్రంగా గాయపడిన విద్యార్థులను చికిత్స కోసం స్థానిక న్యాములాగిరా బీడోమ్ ఆరోగ్య కేంద్రానికి తరలించారు. విద్యార్థులు ఇంకా స్కూల్ యూనిఫామ్‌లోనే రక్తసిక్తమై ఆస్పత్రికి రావడం అక్కడ ఉన్న ప్రతి ఒక్కరినీ కంటితడి పెట్టించింది. గాయపడిన వారి సంఖ్య ఒక్కసారిగా పెరిగిపోవడంతో వైద్య సిబ్బందికి వారికి తక్షణ వైద్యం అందించడం, సంఖ్య నమోదు చేయడం కూడా కష్టంగా మారింది. ప్రస్తుతం గాయపడిన వారిలో కొందరి పరిస్థితి విషమంగా ఉన్నందున మృతుల సంఖ్య మరింత పెరిగే అవకాశం ఉందని వైద్య వర్గాలు భావిస్తున్నాయి.

ప్రమాదానికి దారితీసిన అసలు కారణాలు

ఈ ఘోర ప్రమాదానికి గల ఖచ్చితమైన కారణాలు ఇంకా వెల్లడికావాల్సి ఉంది. ఇళ్లు చాలా దగ్గరగా ఉండటం, చెక్క నిర్మాణాల కారణంగానే మంటలు నియంత్రణ దాటి వేగంగా విస్తరించాయని ప్రాథమిక అంచనా వేస్తున్నారు. ఈ ఘటనపై స్థానిక యంత్రాంగం విచారణ వేగవంతం చేసింది. చదువుకోవడానికి వెళ్లిన బిడ్డలు శవాలుగా మారడంతో బుకావు నగరంలో శోకసంద్రం అలుముకుంది. బాధితుల కుటుంబాలను ఆదుకోవడానికి స్థానిక స్వచ్ఛంద సంస్థలు ముందుకు వస్తున్నాయి.