Gun Violence : అమెరికాలో మళ్లీ కాల్పుల కలకలం.. ఎనిమిది మందికి గాయాలు..!

Gun Violence : అమెరికాలో గన్ కల్చర్ మరోసారి కలకలం సృష్టించింది. ఒహియో రాష్ట్రంలోని టోలెడో నగరంలో జరిగిన ఒక ప్రముఖ కమ్యూనిటీ స్ట్రీట్ ఫెస్టివల్ సమీపంలో శనివారం సాయంత్రం ఘోర కాల్పుల ఘటన చోటుచేసుకుంది. 'ఓల్డ్ వెస్ట్ ఎండ్ ఫెస్టివల్' జరుగుతున్న వేదికకు సమీపంలో అకస్మాత్తుగా తుపాకీ శబ్దాలు వినిపించడంతో పండుగ వాతావరణం కాస్తా క్షణాల్లో భయానకంగా మారిపోయింది.

రంగంలోకి దిగిన పోలీసులు.. తప్పిన ప్రాణాపాయం

స్థానిక కాలమానం ప్రకారం శనివారం సాయంత్రం 5:30 గంటల ప్రాంతంలో ఫెస్టివల్ సైట్ సమీపంలో కాల్పులు జరిగినట్లు సమాచారం రావడంతో టోలెడో పోలీసులు వెంటనే స్పందించారు. వారు ఘటనా స్థలానికి చేరుకునేసరికి బుల్లెట్ గాయాలతో పలువురు రక్తపు మడుగులో పడి ఉన్నారు. ఈ ప్రమాదంలో మొత్తం ఎనిమిది మంది గాయపడినట్లు పోలీసులు ధృవీకరించారు. అయితే, అదృష్టవశాత్తూ ఎవరికీ ప్రాణాపాయం లేదని, గాయపడిన వారందరూ ప్రాణాలతో బయటపడే అవకాశం ఉందని అధికారులు వెల్లడించారు. బాధితులను తక్షణమే చికిత్స నిమిత్తం స్థానిక ఆసుపత్రికి తరలించారు.

ప్రత్యక్ష సాక్షుల గుండెకోత.. యుద్ధరంగంగా మారిన పండుగ వేదిక

కాల్పుల శబ్దాలు వినపడగానే ఉత్సవాల్లో పాల్గొన్న ప్రజల్లో తీవ్ర భయాందోళనలు వ్యక్తమయ్యాయి. ఆ సమయంలో తన స్నేహితులతో కలిసి లైవ్ మ్యూజిక్ వింటున్న కెవిన్ బెర్రీ అనే ప్రత్యక్ష సాక్షి మాట్లాడుతూ.. "కాల్పుల శబ్దం వినబడగానే అందరూ ప్రాణాలు కాపాడుకోవడానికి ఒక్కసారిగా కింద పడిపోయారు" అని ఆనాటి భయానక పరిస్థితిని వివరించారు. తాను తల పైకెత్తి చూసేసరికి, తనకు కేవలం 50 అడుగుల దూరంలో ఎవరో తుపాకీని కింద పడేసి వెళ్ళడం కనిపించిందని ఆయన చెప్పారు. యుఎస్ నేవీ మాజీ సైనికుడైన బెర్రీ, పరిస్థితి కాస్త సర్దుమణిగాక గాయపడిన వారికి సహాయం చేయడానికి ముందుకు వచ్చారు. ఆ సమయంలో కనీసం ఐదుగురు తీవ్ర గాయాలతో పడి ఉండటం తాను చూశానని ఆయన పేర్కొన్నారు.

నిందితుడి కోసం గాలింపు.. భారీగా పోలీస్ మోహరింపు

ఈ దాడికి గల కారణాలు ఏమిటనేది పోలీసులు ఇంకా వెల్లడించలేదు. ప్రస్తుతం ఆ ప్రాంతంలో భారీగా పోలీసు బలగాలను మోహరించి, పరిస్థితిని అదుపులోకి తెచ్చారు. కాల్పులు జరిపి పరారైన అనుమానితుడిని గుర్తించి, పట్టుకోవడానికి పోలీసులు గాలింపు చర్యలను ముమ్మరం చేశారు. ఈ ఘటనపై సమగ్ర దర్యాప్తు కొనసాగుతోంది. టోలెడో నగరంలో ప్రతి ఏటా నిర్వహించే అత్యంత ప్రజాదరణ పొందిన రెండు రోజుల కమ్యూనిటీ ఈవెంట్ ఈ 'ఓల్డ్ వెస్ట్ ఎండ్ ఫెస్టివల్'. లైవ్ మ్యూజిక్, రకరకాల ఫుడ్ స్టాల్స్, షాపింగ్ , హోమ్ టూర్స్ ఈ ఉత్సవంలో ప్రధాన ఆకర్షణగా ఉంటాయి. నగరంలో వేసవి పండుగల సీజన్‌కు ఇది ఒక అనధికారిక ఆరంభంగా స్థానికులు భావిస్తారు. అలాంటి ఉల్లాసభరితమైన వేడుకలో ఈ ఘోర కలకలం రేగింది.

ఒహియో గవర్నర్ స్పందన

ఈ కాల్పుల ఘటనపై ఒహియో గవర్నర్ మైక్ డివైన్ తీవ్రంగా స్పందించారు. వేసవి పండుగలు అనేవి కుటుంబాలన్నీ సంతోషంగా గడిపే సురక్షితమైన ప్రదేశాలుగా ఉండాలని ఆయన ఆకాంక్షించారు. ఈ కాల్పులకు బాధ్యులైన వారిని పోలీసులు త్వరలోనే గుర్తించి, అరెస్ట్ చేస్తారనే నమ్మకం తనకు ఉందని గవర్నర్ ఈ సందర్భంగా వ్యాఖ్యానించారు.