HYDRA Demolition: స్టోన్‌ క్రషర్‌లను కూల్చివేసిన హైడ్రా

HYDRA Demolition: రంగారెడ్డి జిల్లా కొత్వాల్‌గూడలో అక్రమంగా కొనసాగుతున్న స్టోన్ క్రషర్లపై హైడ్రా (HYDRA) అధికారులు కొరడా ఝుళిపించారు. మంగళవారం తెల్లవారుజామున 5 గంటలకే రంగంలోకి దిగిన అధికారులు, భారీ పోలీస్ బందోబస్తు మధ్య కూల్చివేత ప్రక్రియను ప్రారంభించారు. జేసీబీల సహాయంతో క్రషర్ మిషన్లను పూర్తిగా ధ్వంసం చేశారు.

ఈ క్రషర్ల నిర్వహణ వెనుక రాష్ట్రానికి చెందిన ఓ కీలక మంత్రి కుమారుడి హస్తం ఉందంటూ గత కొన్ని రోజులుగా తీవ్ర ఆరోపణలు వస్తున్నాయి. ఈ నేపథ్యంలోనే హైడ్రా ఈ చర్యలు చేపట్టడం రాష్ట్ర రాజకీయాల్లో పెను సంచలనంగా మారింది. నిబంధనలకు విరుద్ధంగా, ఎటువంటి అనుమతులు లేకుండా ఈ క్రషర్లు నడుస్తున్నట్లు వచ్చిన ఫిర్యాదుల మేరకు అధికారులు ఈ నిర్ణయం తీసుకున్నారు.

ఇటీవలే బీఆర్ఎస్ (BRS) పార్టీ నాయకులు ఒక నిజనిర్ధారణ కమిటీగా ఏర్పడి కొత్వాల్‌గూడలోని ఈ స్టోన్ క్రషర్లను సందర్శించారు. అధికార పార్టీ నేతలు అక్రమాలకు పాల్పడుతున్నారంటూ వారు ఆధారాలతో సహా ఆరోపణలు చేశారు. ఈ పర్యటన జరిగిన కొద్ది రోజులకే హైడ్రా అధికారులు కూల్చివేతలు చేపట్టడం గమనార్హం.

కూల్చివేతల సమయంలో ఎటువంటి అవాంఛనీయ సంఘటనలు జరగకుండా పోలీసులు భారీగా మోహరించారు. ప్రభుత్వ భూముల్లో లేదా నిబంధనల ఉల్లంఘనతో చేపట్టిన ఏ నిర్మాణాలనైనా వదిలిపెట్టే ప్రసక్తి లేదని హైడ్రా వర్గాలు ఈ సందర్భంగా స్పష్టం చేశాయి.