Hayathnagar: శ్రీ రేణుక ఎల్లమ్మ తల్లి 5వ వార్షిక కల్యాణ మహోత్సవం!

హయత్ నగర్: హయత్‌నగర్‌లో శ్రీశ్రీశ్రీ రేణుక ఎల్లమ్మ తల్లి 5వ వార్షిక కల్యాణ మహోత్సవం భక్తిశ్రద్ధలతో, అత్యంత వైభవంగా జరిగింది.

కల్యాణ మహోత్సవాన్ని పురస్కరించుకుని ఆలయ ప్రాంగణాన్ని సర్వాంగ సుందరంగా అలంకరించారు. ఈ పవిత్ర వేడుకకు హయత్‌నగర్‌తో పాటు పరిసర ప్రాంతాల నుంచి భక్తులు పెద్ద సంఖ్యలో తరలివచ్చారు. అమ్మవారికి ప్రత్యేక పూజలు, అభిషేకాలు నిర్వహించి భక్తులు తమ మొక్కుబడులు చెల్లించుకున్నారు.

భక్తుల జయజయధ్వానాలు, మంగళవాయిద్యాల నడుమ ఆలయ పరిసరాలు ఆధ్యాత్మిక శోభను సంతరించుకున్నాయి. భక్తుల రద్దీతో ఆలయ ప్రాంగణం కిటకిటలాడింది.

ఈ కార్యక్రమంలో ఆలయ నిర్వాహకులు, గ్రామ పెద్దలు, భక్తులు పెద్ద ఎత్తున పాల్గొని కల్యాణ మహోత్సవాన్ని విజయవంతం చేశారు. ఈ సందర్భంగా ఆలయ నిర్వాహకులు మాట్లాడుతూ.. శ్రీ రేణుక ఎల్లమ్మ తల్లి దివ్య ఆశీస్సులు ప్రజలందరిపై ఎల్లవేళలా ఉండాలని, ప్రతి కుటుంబం ఆయురారోగ్యాలతో, సుఖసంతోషాలతో వర్ధిల్లాలని అమ్మవారిని ప్రార్థించినట్లు తెలిపారు. అనంతరం భక్తులకు తీర్థప్రసాదాలు పంపిణీ చేశారు.