Painkillers: పెయిన్‌ కిల్లర్‌కు నొప్పి ఎక్కడుందో ఎలా తెలుస్తుంది.? అసలు నిజం ఇదే!

Painkillers: శరీరంలో నొప్పి ఎలా మొదలవుతుంది?

శరీరంలోని ఏదైనా భాగానికి గాయం అయినప్పుడు, అక్కడ వాపు వచ్చినప్పుడు లేదా కణజాలానికి నష్టం జరిగినప్పుడు కొన్ని రసాయనాలు విడుదలవుతాయి. వీటిలో ప్రోస్టాగ్లాండిన్లు ముఖ్యమైనవి. ఇవి నొప్పికి సంబంధించిన నరాలను మరింత సున్నితంగా మారుస్తాయి. దీంతో నరాలు నొప్పికి సంబంధించిన సంకేతాలను మెదడుకు పంపిస్తాయి. మెదడు ఆ సంకేతాలను గుర్తించినప్పుడు మనకు నొప్పి అనిపిస్తుంది. వాస్తవానికి ఈ ప్రక్రియ శరీరాన్ని రక్షించే సహజ వ్యవస్థలో భాగం. శరీరంలో ఏదైనా సమస్య ఉందని నొప్పి ద్వారా మెదడుకు సమాచారం అందుతుంది.

పెయిన్ కిల్లర్‌ నొప్పిని ఎలా తగ్గిస్తుంది?

పెయిన్ కిల్లర్‌ వేసుకున్న తర్వాత దానిలోని క్రియాశీల పదార్థాలు కడుపు, పేగుల నుంచి శరీరంలోకి శోషిస్తాయి. ఆ తర్వాత అవి రక్తంలో కలుస్తాయి. రక్తం ద్వారా మందు శరీరంలోని వివిధ భాగాలకు చేరుతుంది. అంటే పెయిన్ కిల్లర్‌ నొప్పి ఉన్న ప్రదేశాన్ని వెతుక్కుంటూ వెళ్లదు. అది రక్తప్రసరణ ద్వారా శరీరమంతా చేరుతుంది. కొన్ని సాధారణ పెయిన్‌ కిల్లర్లు ప్రోస్టాగ్లాండిన్ల తయారీని తగ్గించడం ద్వారా నొప్పి, వాపును తగ్గిస్తాయి. అందుకే తలనొప్పికి మందు వేసుకున్నా, కాలి నొప్పికి మందు వేసుకున్నా.. ఆ మందు ప్రత్యేకంగా ఆ ప్రాంతానికే వెళ్లాల్సిన అవసరం ఉండదు. సాధారణంగా మందు తీసుకున్న కొంతసేపటి తర్వాత దాని ప్రభావం మొదలవుతుంది.

నొప్పి ఉన్న చోటే ఉపశమనం ఎందుకు కనిపిస్తుంది?

పెయిన్‌ కిల్లర్‌ శరీరమంతా తిరిగినా మనకు ఉపశమనం ప్రధానంగా నొప్పి ఉన్న ప్రాంతంలోనే అనిపిస్తుంది. దీనికి కారణం ఆ ప్రాంతంలో గాయం లేదా వాపు కారణంగా రసాయనాల చర్య ఎక్కువగా ఉండటమే. పెయిన్ కిల్లర్‌ ఆయా రసాయనాల చర్యను తగ్గించినప్పుడు నరాల సున్నితత్వం తగ్గుతుంది. దీంతో మెదడుకు వెళ్లే నొప్పి సంకేతాలు కూడా తగ్గుతాయి. ఫలితంగా నొప్పి తగ్గినట్లు అనిపిస్తుంది. అయితే అన్ని పెయిన్‌ కిల్లర్లు ఒకే విధంగా పనిచేయవు. కొన్ని మందులు వాపు, నొప్పికి కారణమయ్యే రసాయనాలపై ప్రభావం చూపితే.. మరికొన్ని నరాలు లేదా మెదడులో నొప్పికి సంబంధించిన సంకేతాలపై పనిచేస్తాయి. అందుకే నొప్పి స్వభావాన్ని బట్టి వైద్యులు వేర్వేరు మందులను సూచిస్తారు.

పెయిన్ కిల్లర్లు ఎక్కువగా తీసుకుంటే ప్రమాదమా?

నొప్పి తగ్గిందని పెయిన్‌ కిల్లర్లను తరచూ తీసుకోవడం మంచిది కాదు. ఏ మందునైనా అవసరానికి మించి లేదా ఎక్కువ కాలం తీసుకుంటే దుష్ప్రభావాలు వచ్చే అవకాశం ఉంటుంది. కొన్ని పెయిన్‌ కిల్లర్లు కడుపుపై ప్రభావం చూపవచ్చు. మరికొన్ని మందులను ఎక్కువగా తీసుకోవడం వల్ల కిడ్నీలు లేదా కాలేయంపై భారం పడే అవకాశం ఉంటుంది. ముఖ్యంగా ఇప్పటికే ఇతర ఆరోగ్య సమస్యలు ఉన్నవారు వైద్యుల సలహా లేకుండా పెయిన్ కిల్లర్లు తీసుకోవడం మంచిది కాదు. అలాగే ఒకసారి మందు వేసుకున్నా నొప్పి తగ్గకపోతే వెంటనే మరో మోతాదు తీసుకోవడం కూడా సరైన పద్ధతి కాదు. మందు మోతాదు, తీసుకునే సమయం విషయంలో వైద్యుడు లేదా ఫార్మసిస్ట్ సూచనలను పాటించాలి.

పెయిన్ కిల్లర్‌కు నొప్పి ఉన్న ప్రదేశం ఎలా తెలుస్తుంది?

సింపుల్‌గా చెప్పాలంటే.. పెయిన్ కిల్లర్‌కు నొప్పి ఎక్కడ ఉందో అసలు తెలియదు. మందు రక్తంలో కలిసిన తర్వాత శరీరంలోని వివిధ ప్రాంతాలకు చేరుతుంది. నొప్పి ఉన్న చోట జరిగే రసాయన చర్యను లేదా నొప్పి సంకేతాలను తగ్గించడం ద్వారా అది ఉపశమనం కలిగిస్తుంది. అందుకే పెయిన్‌ కిల్లర్‌ను శరీరంలోని నొప్పి ఉన్న ప్రదేశానికి నేరుగా వెళ్లి పనిచేసే మందుగా భావించకూడదు. నొప్పి ఎందుకు వస్తుందో తెలుసుకోవడం కూడా అంతే ముఖ్యం. తరచూ నొప్పి వస్తుంటే స్వయంగా మందులు వేసుకోవడం కంటే వైద్యుడిని సంప్రదించి అసలు కారణాన్ని తెలుసుకోవడం మంచిది.