Health Tips: బీపీ టాబ్లెట్ ఒకరోజు మానేసినా ప్రమాదమే.. వైద్యుల హెచ్చరిక.!

Health Tips: ఆధునిక జీవనశైలిలో అధిక రక్తపోటు సమస్య ప్రతి ఇంట్లో సర్వసాధారణంగా మారిపోయింది. వయసుతో సంబంధం లేకుండా చాలామంది ఈ సమస్య బారిన పడుతున్నారు. అయితే చాలామంది బీపీ నియంత్రణలో ఉందని భావించి లేదా మర్చిపోయి ఒకరోజు టాబ్లెట్ వేసుకోకపోతే ఏమీ కాదులే అని నిర్లక్ష్యం చేస్తుంటారు. కానీ ఇది ప్రాణాలకే ముప్పు తెచ్చే అతిపెద్ద పొరపాటు అని ప్రముఖ వైద్యులు డాక్టర్ శ్రీకాంత్ మిర్యాల తీవ్రంగా హెచ్చరించారు. ఈ మేరకు ఆయన సోషల్ మీడియా వేదిక ఎక్స్ (X) ద్వారా ప్రజలకు కీలకమైన ఆరోగ్య అవగాహన కల్పించారు. బీపీ మందులు ఏ రోజుకు ఆ రోజే శరీరంలో పనిచేస్తాయని, వాటిని ఆపేస్తే రక్తపోటు ఒక్కసారిగా పెరిగిపోయి తీవ్ర ప్రాణాపాయ స్థితికి దారితీస్తుందని ఆయన స్పష్టం చేశారు.

రక్తపోటును నియంత్రించే మందులకు శరీరంలో నిర్దిష్టమైన కాలపరిమితి ఉంటుంది. ప్రతిరోజూ క్రమం తప్పకుండా మందులు వేసుకున్నప్పుడే రక్తనాళాలపై ఒత్తిడి అదుపులో ఉంటుంది. ఒకరోజు మందు వేసుకోకపోయినా ఆ మందు ప్రభావం తగ్గిపోయి గుండె, మెదడుకు వెళ్లే రక్తనాళాల్లో ఒత్తిడి విపరీతంగా పెరుగుతుంది. దీనివల్ల బ్రెయిన్ స్ట్రోక్ లేదా హార్ట్ ఎటాక్ లాంటి ప్రాణాంతక సమస్యలు అకస్మాత్తుగా తలెత్తుతాయి. కొందరు నెలకు రూ. వెయ్యి నుంచి రూ. 2 వేల వరకు మందుల కోసం ఖర్చు అవుతుందని ఆలోచించి కూడా మధ్యలో మానేస్తుంటారు.

బీపీ నియంత్రణలోకి రాగానే చాలామంది రోగులు సొంత నిర్ణయాలు తీసుకుంటారు. ఇక తమకు జబ్బు తగ్గిపోయిందని భావించి డాక్టర్‌ను సంప్రదించకుండానే మందులు వాడటం ఆపేస్తుంటారు. రక్తపోటు అనేది సైలెంట్ కిల్లర్ లాంటిది. అది బయటకు ఎలాంటి లక్షణాలు చూపించకుండానే లోపల అవయవాలను తీవ్రంగా దెబ్బతీస్తుంది. ఏమాత్రం నిర్లక్ష్యం చేసినా కిడ్నీలు ఫెయిల్ కావడం, కంటి చూపు మందగించడం లాంటి శాశ్వత నష్టాలు కలుగుతాయి. ఎప్పుడూ సొంత నిర్ణయాలు తీసుకోకుండా డాక్టర్ చెప్పినట్లు క్రమం తప్పకుండా మందులు వాడాలని నిపుణులు పదేపదే చెబుతున్నారు.

మందుల వాడకం విషయంలో కచ్చితమైన సమయపాలన పాటించడం ఎంతో ముఖ్యం. రోజూ ఒకే సమయానికి బీపీ టాబ్లెట్ వేసుకోవడం అలవాటు చేసుకోవాలి. బీపీ సాధారణ స్థాయికి చేరుకున్నా సరే డాక్టర్ సలహా లేకుండా డోస్ తగ్గించడం లేదా మానేయడం చేయకూడదు. క్రమం తప్పకుండా వైద్యుడిని సంప్రదిస్తూ తగిన పరీక్షలు చేయించుకోవాలి. వైద్యులు సూచించిన మేరకు మాత్రమే మందులు వాడాలి. సరైన ఆహార నియమాలు, క్రమం తప్పని వ్యాయామం పాటిస్తూ రోజూ డాక్టర్ ఇచ్చిన మందులు వేసుకుంటే ఎలాంటి ముప్పు లేకుండా ఆరోగ్యంగా జీవించవచ్చు.