Guntur: మలినేని ఉమెన్స్ ఇంజినీరింగ్ కళాశాలలో శ్రీకృష్ణాష్టమి వేడుకలు

గుంటూరు జిల్లా: మలినేని ఉమెన్స్ ఇంజినీరింగ్ కళాశాలలో శ్రీకృష్ణ జన్మాష్టమి వేడుకలను విద్యార్థినులు, అధ్యాపకులు, సిబ్బంది ఘనంగా నిర్వహించారు. ఈ కార్యక్రమం భక్తి, సంస్కృతి, సంప్రదాయాల సమ్మేళనంగా ఉత్సాహభరిత వాతావరణంలో జరిగింది.

ఈ కార్యక్రమానికి కళాశాల చైర్మన్ శ్రీ మలినేని పెరుమాళ్లు గారు ముఖ్య అతిథిగా హాజరై విద్యార్థినులను ఉద్దేశించి ప్రసంగించారు. శ్రీకృష్ణుని జీవితం, ఆయన బోధించిన ధర్మం, కర్తవ్యనిష్ఠ, ధైర్యం, సత్యం వంటి విలువలను విద్యార్థులు తమ జీవితంలో ఆచరించాలని ఆయన సూచించారు. విద్యార్థులు విద్యతో పాటు భారతీయ సంస్కృతి, సంప్రదాయాలను గౌరవించాలని తెలిపారు.

తదుపరి డీన్ అకడమిక్స్ ప్రొఫెసర్ కిశోర్ బాబు గారు మాట్లాడుతూ శ్రీకృష్ణుని జీవితం విద్యార్థులకు స్ఫూర్తిదాయకమని, సమస్యలను ధైర్యంగా ఎదుర్కొని లక్ష్య సాధన దిశగా ముందుకు సాగాలని సూచించారు.

సైన్స్ & హ్యుమానిటీస్ విభాగాధిపతి ప్రొఫెసర్ ASK చైతన్య గారు మాట్లాడుతూ శ్రీకృష్ణ జన్మాష్టమి పండుగ భారతీయ సంస్కృతి, ఆధ్యాత్మికత, నైతిక విలువలకు ప్రతీక అని వివరించారు. విద్యార్థులు తమ ప్రతిభను సాంస్కృతిక కార్యక్రమాల ద్వారా వెలికితీయడం అభినందనీయమని పేర్కొన్నారు.

ఈ సందర్భంగా కళాశాల ప్రిన్సిపాల్ డా. జె. అప్పారావు గారు, డైరెక్టర్ ప్రొఫెసర్ కె. వెంకటేశ్వరరావు గారు, వివిధ విభాగాల డీన్లు, అన్ని విభాగాల అధిపతులు విద్యార్థినులను ఉద్దేశించి ప్రసంగించారు. శ్రీకృష్ణుని బోధనలు నేటి యువతకు ఎంతో అవసరమని, విద్యార్థులు క్రమశిక్షణ, నాయకత్వ లక్షణాలు, నైతిక విలువలను పెంపొందించుకోవాలని వారు సూచించారు.

వేడుకల్లో భాగంగా విద్యార్థినులు కోలాటం, సాంస్కృతిక నృత్యాలు, స్కిట్లు, భక్తి గీతాలు, మేళం తదితర కార్యక్రమాలను ఉత్సాహంగా ప్రదర్శించారు. విద్యార్థినుల ప్రదర్శనలు అందరినీ ఆకట్టుకున్నాయి. సంప్రదాయ దుస్తుల్లో విద్యార్థినులు పాల్గొనడంతో కళాశాల ప్రాంగణం పండుగ వాతావరణాన్ని సంతరించుకుంది.

అనంతరం సంప్రదాయబద్ధంగా ఉట్టి కొట్టే కార్యక్రమం నిర్వహించారు. విద్యార్థినులు ఎంతో ఉత్సాహంగా పాల్గొని కార్యక్రమాన్ని విజయవంతం చేశారు. శ్రీకృష్ణ జన్మాష్టమి వేడుకలు విద్యార్థుల్లో భారతీయ సంస్కృతి, సంప్రదాయాల పట్ల అవగాహనతో పాటు ఐక్యత, ఆనందం, సృజనాత్మకతను పెంపొందించాయని కళాశాల యాజమాన్యం పేర్కొంది.

ఈ కార్యక్రమంలో కళాశాల చైర్మన్ శ్రీ మలినేని పెరుమాళ్లు గారు, డైరెక్టర్ ప్రొఫెసర్ కె. వెంకటేశ్వరరావు గారు, ప్రిన్సిపాల్ డా. జె. అప్పారావు గారు, డీన్ అకడమిక్స్ ప్రొఫెసర్ కిశోర్ బాబు గారు, S&H HOD ప్రొఫెసర్ ASK చైతన్య గారు, అన్ని విభాగాల డీన్లు, HODలు, అధ్యాపకులు, సిబ్బంది మరియు విద్యార్థినులు పాల్గొన్నారు.