Infosys: నిరుద్యోగులకు గుడ్ న్యూస్ చెప్పిన ఇన్ఫోసిస్

Infosys Recruitment: భారత ఐటీ రంగంలో దిగ్గజ సంస్థ అయిన ఇన్ఫోసిస్, నిరుద్యోగ యువతలో సరికొత్త ఆశలు చిగురింపజేసింది. గడిచిన కొద్ది రోజులుగా ఐటీ రంగంలో నెలకొన్న అనిశ్చితి, లే-ఆఫ్స్ వార్తల మధ్య ఇన్ఫోసిస్ ప్రకటించిన తాజా నిర్ణయం టెక్కీలకు పెద్ద ఊరటనిస్తోంది. ఈ ఆర్థిక సంవత్సరంలో భారీ స్థాయిలో ఫ్రెషర్ల నియామకాలు చేపట్టనున్నట్లు కంపెనీ అధికారికంగా ప్రకటించింది.

20,000 మంది ఫ్రెషర్లకు అవకాశం

ఇన్ఫోసిస్ చీఫ్ ఫైనాన్షియల్ ఆఫీసర్ జయేశ్ సంఘ్‌రాజ్కా, జనవరి-మార్చి త్రైమాసిక ఫలితాల సందర్భంగా ఈ కీలక ప్రకటన చేశారు. ఈ ఏడాది దాదాపు 15,000 నుండి 20,000 మంది ఫ్రెషర్లను క్యాంపస్ సెలక్షన్స్ మరియు ఇతర మార్గాల ద్వారా తీసుకోవాలని లక్ష్యంగా పెట్టుకున్నట్లు ఆయన వెల్లడించారు. గతేడాది నియామకాల విషయంలో కొంత నెమ్మదించిన ఐటీ రంగం, ఇప్పుడు మళ్ళీ పుంజుకుంటుందనే సంకేతాలను ఈ నిర్ణయం ఇస్తోంది.

ఆర్థిక ఫలితాల్లో అదరగొట్టిన ఇన్ఫోసిస్

కేవలం నియామకాలు మాత్రమే కాదు, కంపెనీ లాభాల విషయంలోనూ ఇన్ఫోసిస్ రికార్డు స్థాయి వృద్ధిని నమోదు చేసింది. నికర లాభం రూ. 8,501 కోట్లు. గత ఏడాది కంటే 20.8% వృద్ధి సాధించింది.రాబడి రూ. 46,402 కోట్లు. కార్యకలాపాల ద్వారా వచ్చే ఆదాయంలో 13.4% పెరగింది. ఈ గణాంకాలు సంస్థ ఆర్థికంగా ఎంత పటిష్టంగా ఉందో చాటిచెబుతున్నాయి. ప్రపంచవ్యాప్తంగా ఆర్థిక మందగమనం భయాలు ఉన్నప్పటికీ, ఇన్ఫోసిస్ తన లాభదాయకతను కాపాడుకోవడం విశేషం.

ప్రస్తుత పరిస్థితి

మార్చి 2026 నాటికి ఇన్ఫోసిస్‌లో మొత్తం ఉద్యోగుల సంఖ్య 3,28,594 గా ఉంది. గత త్రైమాసికంతో పోలిస్తే ఉద్యోగుల సంఖ్యలో స్వల్ప తగ్గుదల కనిపించినప్పటికీ, గతేడాదితో పోలిస్తే సుమారు 5,000 మంది అదనపు సిబ్బంది సంస్థలో చేరారు. ప్రాజెక్టుల లభ్యత , అంతర్గత వనరుల వినియోగం ఆధారంగా ఉద్యోగుల సంఖ్యను బ్యాలెన్స్ చేస్తున్నట్లు జయేశ్ వివరించారు.ప్రస్తుతం మా వద్ద తగినంత మంది బెంచ్ పీరియడ్ లో ఉన్న ఫ్రెషర్లు ఉన్నారు. వారిని ప్రాజెక్టుల్లోకి తీసుకుంటూనే, భవిష్యత్తు అవసరాల దృష్ట్యా కొత్తవారిని కూడా ఆహ్వానిస్తున్నాం అని జయేశ్ చెప్పుకొచ్చారు.

నిరుద్యోగులకు గొప్ప అవకాశం

ఇన్ఫోసిస్ వంటి గ్లోబల్ కంపెనీలో కెరీర్ ప్రారంభించడం వల్ల ప్రపంచ స్థాయి సాంకేతికతపై పట్టు సాధించే అవకాశం ఉంటుంది.మైసూర్ క్యాంపస్‌లో ఇచ్చే ప్రపంచ స్థాయి శిక్షణ ఫ్రెషర్లను ప్రొఫెషనల్ టెక్కీలుగా మారుస్తుంది. నియామకాల్లో వేగం పెరగడం అనేది ఐటీ మార్కెట్ మళ్ళీ గాడిలో పడుతోందని చెప్పడానికి నిదర్శనం. ఇన్ఫోసిస్ తీసుకున్న ఈ నిర్ణయం కేవలం ఆ సంస్థకే పరిమితం కాకుండా, మొత్తం భారత ఐటీ ఇండస్ట్రీలో ఒక సానుకూల వాతావరణాన్ని సృష్టిస్తుంది. ఇంజనీరింగ్ పూర్తి చేసి ఉద్యోగ వేటలో ఉన్న వేలాది మంది విద్యార్థులకు ఇది ఒక గోల్డెన్ ఛాన్స్ అని చెప్పవచ్చు. నైపుణ్యాలను మెరుగుపరుచుకుని, ఇంటర్వ్యూలకు సిద్ధమవ్వడానికి ఇదే సరైన సమయం.